Ahwo Ẹfisọs 6:1-24
6 Whai emọ, wha yoẹme kẹ esẹgbini rai evaọ oghẹrẹ nọ o rẹ were Olori na, keme onana u kiẹrẹe.
2 “Rọ ọghọ kẹ ọsẹ ra avọ oni ra” họ ujaje ọsosuọ nọ a jie avọ eyaa inọ:
3 “Re u woma kẹ owhẹ re whọ jẹ rria tọ evaọ otọakpọ na.”
4 Whai esẹ, wha ru emọ rai eva dha ha, rekọ wha rehọ ọwhọkuo gbe ehrẹ* Jihova* rọ yọrọ ae.
5 Whai erigbo, wha yoẹme kẹ enọ e rrọ ilori rai evaọ otọakpọ na, wha ru ei no udu rai ze avọ ozodhẹ gbe enuho, wọhọ ẹsenọ wha bi ru ei kẹ Kristi,
6 orọnikọ okenọ a te bi rri owhai ọvo ho re wha ruẹsi ru ahwo eva were, rekọ wọhọ erigbo Kristi, nọ e be rọ udu kpobi ru oreva Ọghẹnẹ.
7 Wha rọ emamọ eva gbodibo wọhọ ẹsenọ wha bi ru ei kẹ Jihova* orọnikọ ahwo ho,
8 keme wha riẹ nọ ewoma kpobi nọ ohwo o ru, o ti wo osohwa riẹ no obọ Jihova* ze, makọ ọ rrọ ọrigbo hayo ọmuyẹ.
9 Yọ whai ilori, wha yerikugbe ai epọvo na re, wha guegue ai hi, keme wha riẹ nọ ọnọ ọ rrọ Olori kẹ ae gbe owhai omarai ọ rrọ obọ odhiwu, yọ o wo ọriẹwẹ hẹ.
10 Orọ urere, wha hai wo ogaga no obọ Olori na ze je no ẹgba ologbo riẹ ze.
11 Wha whẹ ẹgọ-ẹmo ọsoso nọ o no obọ Ọghẹnẹ ze na họ oma re wha sai dikihẹ ga wọso iruẹru ẹghẹ Ẹdhọ;
12 keme ma wo ohọre, orọnikọ wọso azẹ gbe uwo ho, rekọ wọso egọmeti, wọso enọ e rrọ udu-esuo, wọso isu akpọ erọ ebi nana, wọso izi imuomu nọ e rrọ obọ idhiwu na.
13 Fiki onana, wha whẹ ẹgọ-ẹmo ọsoso nọ o no obọ Ọghẹnẹ ze na họ oma, re wha sai mudhe evaọ ẹdẹ omuomu na je dikihẹ ga nọ wha te ru eware na kpobi gba no.
14 Fikiere wha dikihẹ ga avọ umueku uzẹme na nọ wha rọ gba eku rai wariẹ, avọ ẹgọ-ẹroo igbama ọrọ ẹrẹreokie nọ wha kuhọ,
15 gbe awọ rai nọ wha rẹ ruẹrẹ kpahe re wha whowho usi uwoma udhedhẹ na.
16 U te no enana kpobi no, wha tọlọ ojese ologbo ọrọ ẹrọwọ na onọ wha sai ro furie ese kpobi nọ e be ware erae nọ omuomu na ọ be sa.
17 Ofariẹ, wha rọ etu esiwo na tu, re wha je kru ọgbọdọ ẹzi na, koyehọ ẹme Ọghẹnẹ,
18 wha hae jọ evaọ uyero kpobi lẹ oghẹrẹ olẹ kpobi gbe oghẹrẹ olẹ-ayare kpobi evaọ ẹzi. Fiki onana, wha jaja aro vi ẹsikpobi, re wha hae lẹ olẹ-ayare roro erezi na kpobi.
19 Wha hae lẹ roro omẹ re, re a kẹ omẹ eme nọ mẹ rẹ ta okenọ me te rovie unu mẹ, mẹ vẹ sae ta ẹme ududu kpahe oware udidi ọrẹri orọ usi uwoma na,
20 onọ mẹ rọ fiki riẹ rrọ ọnyukọ avọ egbregba nọ a rọ kare omẹ, gbe re mẹ sae ta kpahe iẹe ududu wọhọ epanọ u fo nọ mẹ rẹ tae.
21 Re wha sae riẹ kpahe iruẹru mẹ gbe epanọ eware e rrọ kẹ omẹ, Tikikọs, oniọvo oyoyou gbe odibo Olori na nọ ọ vọ avọ ẹrọwọ, o ti gbiku kẹ owhai.
22 Fiki onana me bi ro vi ei bru owhai ze, re wha riẹ epanọ ma rrọ, ọ vẹ jẹ sasa owhai oma.
23 Jọ inievo na a wo udhedhẹ gbe uyoyou gbe ẹrọwọ no obọ Ọghẹnẹ Ọsẹ na gbe Olori na Jesu Kristi ze.
24 Jọ Ọghẹnẹ o dhesẹ uwowou ulogbo riẹ kẹ ahwo kpobi nọ a wo uvi uyoyou kẹ Olori mai Jesu Kristi.
