Iruẹru 10:1-48
10 Whaọ ọzae jọ ọ jọ Sisaria nọ a re se Kọniliọs, oletu ogbaẹmo* evaọ utu ogbaẹmo* Itali.
2 Ọ jọ ọgba-egagọ nọ ọ be dhozọ Ọghẹnẹ, ere ahwo uwou riẹ kpobi re, ọ jẹ hae kẹ ahwo na ekẹ ohrọ buobu, yọ ọ jẹ hae lẹ olẹ-ayare se Ọghẹnẹ ẹsikpobi.
3 Ẹdẹjọ evaọ oware wọhọ auwa avọ izii,* ọ tẹ ruẹ ukọ-odhiwu Ọghẹnẹ nọ ọ romavia kẹe vevẹ evaọ eruẹaruẹ, o te sei nọ: “Kọniliọs!”
4 Kọniliọs o te bi rri rie avọ ozọ, ọ tẹ nọe nọ: “Eme, Olori?” Ọ tẹ ta kẹe nọ: “Ọghẹnẹ o yo elẹ ra no ọ tẹ jẹ ruẹ ekẹ ohrọ nọ whọ be kẹ.
5 Fikiere vi ahwo kpobọ Jọpa re a nyai se ọzae jọ nọ a re se Saemọn, nọ a re je se Pita.
6 Ọzae nana ọ kpahe uwou Saemọn, ọnọ o re ru oviẹ-erao lọhọ nọ uwou riẹ o kẹle abade na.”
7 Nọ ukọ-odhiwu nọ ọ ta ẹme kẹe na ọ nwane nyavrẹ no, o te se idibo ivẹ riẹ gbe osoja jọ nọ ọ rrọ ọgba-egagọ evaọ usu enọ e jẹ gbodibo kẹe,
8 o te gbiku na kpobi kẹ ae je vi ai kpobọ Jọpa.
9 Okiokiọ riẹ epanọ a rọ rrọ edhere na jẹ be kẹle ẹwho na no, Pita o te kpobọ ehru uwou evaọ oware wọhọ auwa avọ ezeza* nyae lẹ.
10 Rekọ ohọo u te je kpei gaga ọ tẹ gwọlọ nọ ọ rẹ re emu. Nọ a je there emu na, o tẹ wọhọ ẹsenọ owezẹ u su ei, ọ tẹ be ruẹ eruẹaruẹ,
11 ọ tẹ ruẹ odhiwu nọ o rovie gbe oware jọ nọ o wọhọ ẹwẹ-ohọ ologbo nọ a be rọ ibiezọ ene riẹ siobọno ziọ otọ;
12 yọ oghẹrẹ erao kpobi nọ i wo awọ ene, erao nọ i re siẹ gbe enọ e rẹ katiẹ, gbe evra obehru e rrọ eva riẹ.
13 Urru jọ o tẹ ta kẹe nọ: “Kpama, Pita, kpe re whọ re!”
14 Rekọ Pita ọ tẹ ta nọ: “Kakaka, Olori, keme mẹ re re oware otọtọ gbe onọ o rrọ gbegbe ẹdẹvo ho.”
15 Urru na o tẹ wariẹ ta ẹme kẹe orọ avọ isiava nọ: “Who gbe se eware nọ Ọghẹnẹ o ru fo no eware etọtọ họ.”
16 Onana o via orọ avọ esa, a tẹ nwane rehọ oware nọ o wọhọ ẹwẹ-ohọ na kpohọ odhiwu.
17 Nọ Pita o gbe bi roro avọ igbunu kpahe eruẹaruẹ na sọ ọ sae riẹ otofa riẹ na, ezae nọ Kọniliọs o vi na a tẹ nwane nọ onọ uwou Saemọn a te dikihẹ unuẹthẹ na.
18 A tẹ nọ sọ Saemọn nọ a re je se Pita ọ kpahe etẹe.
19 Nọ Pita o gbe bi roro didi kpahe eruẹaruẹ na, ẹzi na ọ tẹ ta kẹe nọ: “Rri! Ezae esa jọ a be nọ onọ ra.
20 Fikiere kpama, nwrotọ re who lele ai, whọ vro vievie he, keme mẹ o vi rai ze.”
21 Pita o te nwrotọ bru ezae na jẹ ta nọ: “Mẹ na, ohwo nọ wha be gwọlọ na. Fikieme wha rọ nyaze?”
22 A tẹ ta nọ: “Kọniliọs, oletu ogbaẹmo, ọzae nọ o kiẹrẹe jẹ be dhozọ Ọghẹnẹ, ọnọ ahwo Ju kpobi a be ta emamọ ẹme kpahe ọye o vi omai ze. Ọghẹnẹ ọ rehọ ẹkwoma ukọ-odhiwu jọ ta kẹe nọ o vi ahwo ze ti se owhẹ re whọ nyaze uwou riẹ re o yo eme nọ whọ te ta.”
23 Fikiere o te zizie ai ruọ eva, a tẹ jọ erara riẹ.
Okiokiọ riẹ ọ tẹ kpama, o te lele ai, yọ inievo jọ evaọ Jọpa a lele i rie nya.
24 Ẹdẹ nọ o lele i rie, ọ tẹ ruọ evaọ Sisaria. Kọniliọs o je rẹro rai, yọ o se imoni gbe egbẹnyusu ekpekpe riẹ kokohọ no.
25 Nọ Pita o te uwou na, Kọniliọs ọ tẹ nya bru rie ze, kigwẹ fihọ aro riẹ ọ tẹ rọ uzou kpotọ kẹe.
26 Rekọ Pita o te kru rie kpama, ta nọ: “Kpama; mẹ yọ ohwo-akpọ gheghe wọhọ owhẹ re.”
27 Nọ o bi lele iei ta ẹme na, ọ tẹ ruọ evaọ uwou na ọ tẹ ruẹ ahwo buobu nọ a kokohọ.
28 Ọ tẹ ta kẹ ae nọ: “Wha riẹ vevẹ nọ u fo ho re ohwo Ju o kuomagbe hayo nya bru ohwo uyẹ ofa, rekọ Ọghẹnẹ o dhesẹ kẹ omẹ no inọ me du se ohwo ọvo ọtọtọ hayo ogbegbe he.
29 Fikiere nọ a nyaze ti se omẹ, mẹ tẹ nyaze, mẹ se he. Fikiere, mẹ be nọ owhai oware nọ o lẹliẹ owhai vi ahwo ze ti se omẹ.”
30 Kẹsena Kọniliọs ọ tẹ ta nọ: “Edẹ ene nọ e vrẹ, nọ ma te kele no umuo oke nana kpemu, mẹ jẹ lẹ evaọ uwou mẹ evaọ oware wọhọ auwa avọ izi;* ọzae jọ nọ o ku iwu enwranwra họ ọ tẹ nwani dikihẹ aro mẹ
31 ọ tẹ ta nọ: ‘Kọniliọs, Ọghẹnẹ o yo elẹ ra no ọ tẹ jẹ ruẹ ekẹ ohrọ nọ whọ be kẹ.
32 Fikiere, vi ahwo kpobọ Jọpa re a nyai se Saemọn nọ a re je se Pita. Ọzae nana ọ kpahe uwou Saemọn, ọnọ o re ru oviẹ-erao lọhọ nọ uwou riẹ o kẹle abade na.’
33 Mẹ tẹ nwani vi ahwo ze ti se owhẹ, yọ whọ riẹ ru nọ whọ rọ nyaze. Obọnana mai kpobi ma rrọ aro Ọghẹnẹ re ma yo eme kpobi nọ Jihova* ọ vuẹ owhẹ nọ whọ ta.”
34 Pita o te mu ẹme họ ẹta, ọ tẹ ta nọ: “Enẹna mẹ ruẹ vevẹ no inọ Ọghẹnẹ o wo ọriẹwẹ hẹ,
35 rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiẹrẹe ọ rẹ jẹe rehọ.
36 O vi ẹme riẹ se emọ Izrẹl rọ vuẹ ae usi uwoma orọ udhedhẹ ẹkwoma Jesu Kristi, ọnana họ Olori ahwo kpobi.
37 Wha riẹ oware nọ ahwo a jẹ ta kpahe evaọ Judia soso, muhọ no Galili vrẹ nọ etoke nọ Jọn ọ jẹ rọ họ ahwo ame o vrẹ no:
38 ẹme kpahe Jesu ohwo Nazarẹt na, epanọ Ọghẹnẹ ọ rọ rehọ ẹzi ọfuafo rehọ iẹe mu jẹ kẹe ogaga, ọ tẹ nya ẹkwotọ na soso duwu bi ru ewoma je bi siwi ahwo kpobi nọ Ẹdhọ ọ jẹ lahiẹ, keme Ọghẹnẹ ọ jọ kugbei.
39 Yọ ma ruẹ eware kpobi nọ o ru evaọ ewho ahwo Ju gbe evaọ Jerusalẹm; rekọ a kpe rie ẹkwoma ure nọ a kare riẹ fihọ.
40 Ọghẹnẹ ọ kpare riẹ ze evaọ ẹdẹ avọ esa, o te ru nọ ọ rọ romavia,*
41 orọnikọ rọkẹ ahwo kpobi hi, rekọ rọkẹ omai, enọ Ọghẹnẹ ọ salọ kpahotọ re ma ruẹ e riẹ je se isẹri kpahe iẹe. Ma lele i rie re emu jẹ da nọ ọ kparoma no uwhu ze no.
42 O te je jie uzi kẹ omai inọ ma vuẹ ahwo je se isẹri ziezi inọ ọnana họ ọnọ Ọghẹnẹ o ro mu re ọ jọ obruoziẹ enọ e rrọ uzuazọ gbe enọ i whu no.
43 Eruẹaro na kpobi a se isẹri kpahe iẹe, inọ ohwo kpobi nọ o fi ẹrọwọ họ iẹe o re wo erọvrẹ izieraha ẹkwoma odẹ riẹ.”
44 Nọ Pita ọ gbẹ jẹ ta eme nana, ẹzi ọfuafo na o te te enọ i bi yo eme riẹ na kpobi obọ.
45 U te gbe ilele nọ e yawo nọ i lele Pita nyaze na unu inọ okẹ ọvọvẹ ẹzi ọfuafo na u bi te ahwo erẹwho na obọ re.
46 Keme a yo nọ a jẹ jẹ evẹrẹ* efa je bi jiri Ọghẹnẹ. Fikiere Pita ọ tẹ ta nọ:
47 “Kọ ohwo jọ ọ sae ta nọ a rehọ ame rọ họ ahwo nana ame he, enọ ẹzi ọfuafo na o te obọ no re wọhọ epanọ o te omai obọ na?”
48 Ọ tẹ kẹ udu inọ a họ ae ame evaọ odẹ Jesu Kristi. A tẹ lẹe re ọ jọ kugbe ai evaọ edẹ jọ.
Eme-Obotọ
^ Koyehọ, ọnọ o wuzou isoja udhusoi.
^ Koyehọ, ogbaẹmo Rom nọ isoja 600 e rrọ.
^ Oware wọhọ ighọjọ esa uvo.
^ Oware wọhọ ighọjọ ikpegbivẹ uvo.
^ Oware wọhọ ighọjọ esa uvo.
^ Rri oria Otofa Eme.
^ Hayo “a rọ ruẹ e riẹ.”
^ Evaọ Griki, “erọunu.”
