Iruẹru 12:1-25
12 Evaọ oke oyena Herọd ovie na o te je gboja kẹ inievo ukoko na jọ.
2 Ọ rọ ọgbọdọ kpe Jemis oniọvo Jọn.
3 Nọ ọ ruẹ nọ onana o were ahwo Ju na, o te mu Pita re. (Onana o via evaọ etoke Ehaa Ebrẹdi nọ Ọ Kare Ẹvi na.)
4 O te fi ei họ uwou-odi, o te fi eko isoja ene họ re a rou* rie unọjọ utọjọ, isoja ene e jọ ẹko ọvuọvo, yọ o wo rie họ iroro nọ ọ te rehọ iẹe lahwe* evaọ aro ahwo na nọ a te ru ehaa ọnyavrẹ na no.
5 Fikiere Pita ọ tẹ jọ uwou-odi na, rekọ ukoko na o jẹ lẹ gaga se Ọghẹnẹ fiki riẹ.
6 Whaọ evaọ aso ọvo nọ o kiọkọ re Herọd ọ tẹ te rehọ iẹe lahwe na, Pita ọ jẹ wezẹ avọ egbregba ivẹ nọ a rọ kare iẹe fihọ udevie isoja ivẹ, yọ isoja nọ e jọ unuẹthẹ na a bi rou uwou-odi na.
7 Rekọ rri! ukọ-odhiwu Jihova* o te dikihẹ etẹe, elo jọ o te lo evaọ ubrukpẹ uwou-odi na. Nọ ọ rọ obọ te Pita abefẹ, ọ tẹ rọwo iẹe no owezẹ ze, ọ tẹ ta kẹe nọ: “Kpama vẹrẹ vẹrẹ!” Egbregba na i te kie no abọ riẹ.
8 Ukọ-odhiwu na ọ tẹ ta kẹe nọ: “Ruẹrẹ ewu ra họ je fi eviẹ ra họ.” O te ru ere. Ukuhọ riẹ, ọ tẹ ta kẹe nọ: “Ku ewu ehru ra họ re who lele omẹ.”
9 Ọ tẹ ruọ otafe, o te bi lele iei, rekọ ọ riẹ hẹ inọ oware nọ a be rọ ẹkwoma ukọ-odhiwu na ru na ginọ aruakpọ. Ẹhẹ, o roro nọ ọ jẹ ruẹ eruẹaruẹ.
10 Nọ a nya utu isoja ọsosuọ gbe ọrọ avọ ivẹ na vrẹ no, a te te unuẹthẹ ayọno nọ a re ro no uwou-odi na ruọ okpẹwho na, ẹthẹ na ọvo o te rovie kẹ ae. Nọ a ruọ otafe no, a tẹ nya ruọ iyẹrẹ jọ, ẹsiẹvo na, ukọ-odhiwu na ọ tẹ nyase iẹe ba.
11 Nọ Pita o vuhu oware nọ o be via na mu no, ọ tẹ ta nọ: “Obọnana, u mu omẹ ẹro no nọ Jihova* o vi ukọ-odhiwu riẹ ze ti siwi omẹ no obọ Herọd je no eware kpobi nọ ahwo Ju a bi rẹro nọ e te via.”
12 Nọ u mu ei ẹro no, o te kpobọ uwou Meri, oni Jọn nọ a re je se Mak, oria nọ ilele na buobu a kokohọ yọ a jẹ lẹ.
13 Nọ o kporo ẹthẹ unuighẹ na, odibo-ọmọtẹ nọ a re se Roda ọ tẹ nyaze re o rovie ẹthẹ na.
14 Nọ o vuhu uvou Pita, oghọghọ ogaga o jariẹ rovie ẹthẹ na ha, rekọ ọ tẹ dhẹ zihe ruọ evaọ uwou ọ tẹ ta kẹ ae nọ Pita ọ rrọ obọ unuẹthẹ ighẹ na.
15 A tẹ ta kẹe nọ: “Oware jọ u bi kpokpo owhẹ.” Rekọ ọ tẹ gbẹ be ta nọ uzẹme ọ be ta na. A te muhọ ẹta nọ: “Kiyọ ukọ-odhiwu riẹ.”
16 Rekọ Pita ọ tẹ gbẹ jọ etẹe bi kporo ẹthẹ na. Nọ a rovie ẹthẹ na, a tẹ ruẹ e riẹ, akpọ o te gbe ai unu.
17 Rekọ o te veghe obọ rọ ta kẹ ae nọ a fibo, o te gbiku na kpobi kẹ ae epanọ Jihova* o ro si ei no uwou-odi na ze, ọ tẹ ta nọ: “Wha niyẹrẹ eware nana kẹ Jemis gbe inievo na.” Kẹsena ọ tẹ ruọ otafe o te kpohọ oria ofa.
18 Whaọ nọ oke o ke no, ozighi ọ tẹ jọ udevie isoja na keme a riẹ oware nọ o via kẹ Pita ha.
19 Herọd ọ tẹ romatotọ gwọlọ iẹe, rekọ nọ ọ be ruẹ e riẹ hẹ ọ tẹ kiẹ isoja na riwi jẹ ta nọ a rehọ ae vrẹ re a kẹ ae uye; o te no Judia kpobọ Sisaria, ọ tẹ jọ etẹe omoke jọ.
20 Whaọ Herọd ọ jẹ dheva kpahe ahwo Taya avọ Saedọn. Fikiere a tẹ rọ ẹjiroro ọvo nya bru ei ze, nọ a lẹ Blastọs orieyero ovie na inọ o fiobọhọ kẹ ae no, a tẹ be yare inọ a gwọlọ re udhedhẹ o jọ udevie rai avọ ovie na, keme ẹwho rai o je wo emu no ẹkwotọ ovie na ze.
21 Evaọ ẹdẹ nọ a fihọ, Herọd ọ tẹ gọ obọdẹ ẹgọ ovie ọ tẹ keria akaba oziẹobro na, ọ tẹ be ta ẹme kẹ ahwo na.
22 Kẹsena ahwo nọ a kokohọ na a te muhọ ebo nọ: “Nọ urru ọghẹnẹ, orọnikọ orọ ohwo-akpọ họ!”
23 Ẹsiẹvo na, ukọ-odhiwu Jihova* ọ tẹ rehọ ẹyao tehe iẹe, keme ọ rehọ oruaro na kẹ Ọghẹnẹ hẹ, ihoi i te mu ei họ ẹre, o te whu.
24 Rekọ ẹme Jihova* o te je do ruọ eria kpobi, ahwo buobu a te bi kurẹriẹ.
25 Nọ Banabas avọ Sọl a jọ Jerusalẹm ru iruo ogbodhẹ na no, a te zihe ze jẹ rehọ Jọn nọ a re je se Mak kugbe oma.
Eme-Obotọ
^ Hayo “rroro.”
^ Hayo “rehọ iẹe lahwe kẹ ẹdhoguo.”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
