Iruẹru 14:1-28
14 Evaọ Aikoniọm, Pọl avọ Banabas a tẹ ruọ uwou-egagọ ahwo Ju, a tẹ ta ẹme ziezi te epanọ ogbotu obuobu ọrọ ahwo Ju gbe ahwo Griki a ro kurẹriẹ.
2 Rekọ ahwo Ju nọ a rọwo ho a tẹ lẹliẹ ahwo erẹwho na họ jẹ ta udu rai raha wọso inievo na.
3 Fikiere a tẹ jọ etẹe oke krẹkri, yọ a jẹ rehọ ẹgba Jihova* ta ẹme ududu. Ọ kẹ rai ogaga nọ a je ro ru eware eka gbe eware igbunu ro dhesẹ nọ ẹme riẹ a be ta, koyehọ, ovuẹ kpahe uwowou ulogbo riẹ.
4 Rekọ ahwo ẹwho na a tẹ ghale abava; ejọ e jọ abọ ahwo Ju na, edekọ kọ abọ ikọ na.
5 Nọ ahwo erẹwho na avọ ahwo Ju gbe isu rai a jowọ inọ a re ru ai oma vo jẹ rọ itho fi ai,
6 ahwo jọ a tẹ vuẹ ae, a tẹ dhẹ kpobọ Likonia, Listra gbe Dẹbi, gbe ewho nọ e wariẹ oyena họ.
7 A tẹ jọ obei je whowho usi uwoma na.
8 Whaọ evaọ Listra, ọzae jọ ọ jariẹ nọ ọ keria nọ awọ riẹ ọ ko. Ọ ko anwẹnọ a ro yẹi, ọ re nya ẹdẹvo ho.
9 Ọzae nana ọ jẹ gaviezọ kẹ ẹme nọ Pọl ọ jẹ ta. Nọ Pọl o rri rie ziezi jẹ ruẹ nọ o wo ẹrọwọ jẹ rọwo nọ a rẹ sai siwi ei,
10 ọ tẹ ta avọ urru oruarua nọ: “Kpama dikihẹ.” Ọzae na ọ tẹ sakpama je muhọ ẹnya.
11 Nọ ogbotu na a ruẹ oware nọ Pọl o ru na, a tẹ rehọ ẹvẹrẹ ahwo Likonia bo nọ: “Eghẹnẹ na i zihe oma ruọ ahwo-akpọ jẹ nya bru omai ze no!”
12 A te je se Banabas nọ Zus, rekọ Pọl kọ Hẹmis, keme ọye ọ jẹ mae ta ẹme.
13 Ozerẹ Zus, ọnọ etẹmpol riẹ ọ jọ oria nọ a rẹ rọ ruọ okpẹwho na, ọ tẹ rehọ iruẹ gbe etu-idodo ziọ obọ inuẹthẹ ẹwho na jẹ gwọlọ nọ tei te ogbotu na a re dhe idhe.
14 Rekọ nọ ikọ na Banabas avọ Pọl a yo kpahe onana, a tẹ bẹre iwu rai a te duola ruọ udevie ogbotu na je bi bo nọ:
15 “Whai na, fikieme wha bi ro ru onana? Mai yọ ahwo-akpọ gheghe nọ a gba ha wọhọ owhai re. Ma bi whowho usi uwoma na kẹ owhai, re wha kurẹriẹ no eware ifofe nana je bru Ọghẹnẹ nọ ọ rrọ uzuazọ na ze, ọnọ ọ ma odhiwu gbe otọakpọ na gbe abade gbe eware kpobi nọ e rrọ eva rai.
16 Evaọ ige nọ e vrẹ, ọ kẹ erẹwho na kpobi uvẹ re a ru epanọ u je rai,
17 dede nọ ọ ko oghẹrẹ ohwo nọ ọ rrọ dhere he keme o bi ru ewoma ẹkwoma iso gbe ezi nọ ekakọ e rẹ rọ mọ ziezi nọ ọ be kẹ owhai, ọ be kẹ owhai emuore buobu jẹ be rọ oghọghọ vọ udu rai.”
18 Ghele eme nana kpobi nọ a ta na, udugaga a sae rọ whaha ogbotu na nọ a gbe ro dhe idhe kẹ ae he.
19 Rekọ ahwo Ju a te no obọ Antiọk gbe Aikoniọm ze a tẹ bẹbẹ ogbotu na họ, a tẹ rọ itho fi Pọl je si ei ruọ otafe ẹwho na, bi roro nọ o whu no.
20 Rekọ nọ ilele na a nyaze jẹ wariẹe họ, ọ tẹ kpama ọ tẹ ruọ evaọ ẹwho na. Okiokiọ riẹ tei te Banabas a te kpohọ Dẹbi.
21 Nọ a jọ ẹwho ọyena whowho usi uwoma na je fiobọhọ kẹ ahwo buobu zihe ruọ ilele no, a te zihe kpobọ Listra, Aikoniọm, gbe Antiọk.
22 A tẹ jọ obei jẹ bọ inievo na ga, be tuduhọ ae awọ nọ a daji ẹrọwọ na jẹ be ta nọ: “Evaọ udevie ikpokpoma buobu nọ i re te omai hrọ ma te rọ ruọ Uvie Ọghẹnẹ.”
23 Ofariẹ, a tẹ rọ ekpako mu kẹ ae evaọ ukoko kpobi, yọ a be lẹ jẹ siọ emuọriọ ba, a te mu ai họ Jihova* obọ, ọnọ a rọwo no na.
24 Kẹsena a tẹ nya Pisidia vrẹ kpohọ Pamfilia,
25 nọ a jọ Pẹga whowho ẹme na no, a te kpohọ Atalaya.
26 A tẹ jọ etẹe ruọ okọ kpohọ Antiọk, oria nọ inievo na a kake jọ yare inọ jọ Ọghẹnẹ o dhesẹ uwowou ulogbo kẹ ae evaọ iruo na, onọ a kuhọ no enẹna.
27 Nọ a te etẹe je koko inievo na kpobi họ no, a te gbiku eware buobu nọ Ọghẹnẹ o ru ẹkwoma rai, gbe nọ o rovie edhere nọ a re ro wo ẹrọwọ* kẹ erẹwho na no.
28 Fikiere a tẹ raha oke krẹkri kugbe ilele na.
