Iruẹru 15:1-41
15 Whaọ ezae jọ i no obọ Judia ze a te mu inievo na họ ewuhrẹ inọ: “Wha rẹ yawo wọhọ epanọ uzi Mosis o ta, o gbẹ rrọ ere he, wha sai wo esiwo ho.”
2 Rekọ nọ Pọl avọ Banabas a lele ai si ikẹ gaga kpahe ẹme nana no, a te ru ọruẹrẹfihotọ re Pọl, Banabas, gbe amọfa jọ a nya bru ikọ na gbe ekpako na evaọ obọ Jerusalẹm fiki ẹme nana.
3 Fikiere nọ inievo ukoko na a su ai họ aro omojọ no, ezae nana a tẹ ruabọhọ onya rai nya Fonisia gbe Sameria vrẹ, be rọ unu kotọ gbiku kẹ ae epanọ ahwo erẹwho na a bi ro kurẹriẹ, a tẹ be rọ ere wha oghọghọ ulogbo se inievo na kpobi.
4 Nọ a te Jerusalẹm, ukoko na gbe ikọ na gbe ekpako na a te dede ae rehọ sasasa, a te gbiku eware buobu nọ Ọghẹnẹ o ru ẹkwoma rai.
5 Rekọ ahwo otu Farisi na jọ nọ a zihe ruọ ilele no a tẹ kpama no egbara rai, a tẹ ta nọ: “O roja re a yawo ai je jie uzi kẹ ai inọ a koko Uzi Mosis.”
6 Fikiere ikọ na gbe ekpako na a te kokohọ re a jiroro kpahe ẹme nana.
7 Nọ a ta ẹme na gaga lelehie no, Pita ọ tẹ kpama ọ tẹ ta kẹ ae nọ: “Inievo, wha riẹ nọ no emuhọ ze, Ọghẹnẹ ọ salọ omẹ evaọ udevie rai re ahwo erẹwho na a sae jọ unu mẹ yo usi uwoma na re a kurẹriẹ.
8 Yọ Ọghẹnẹ, ọnọ ọ riẹ udu ahwo, ọ kẹ imuẹro nọ ọ jẹ rae rehọ no ẹkwoma ẹzi ọfuafo nọ ọ kẹ rai wọhọ epanọ ọ kẹ omai re.
9 Yọ o rri rai inọ a wo ohẹriẹ no omai hi, rekọ o ru udu rai fo fiki ẹrọwọ rai.
10 Kọ fikieme wha bi ro ru eva dha Ọghẹnẹ, ẹkwoma owha nọ wha be gwọlọ wọ họ ilele na uzou, onọ esẹ-ode mai hayo omai a sae wọ họ?
11 Ukpoye, ma wo ẹrọwọ inọ ma ti wo esiwo ẹkwoma uwowou ulogbo Olori na Jesu, yọ ere ọvona o rrọ kẹ ae re.”
12 Fikiere aikpobi a tẹ fọ tou, a tẹ be gaviezọ nọ Banabas avọ Pọl a bi gbiku eware eka gbe eware igbunu buobu nọ Ọghẹnẹ o ru ẹkwoma rai evaọ udevie ahwo erẹwho na.
13 Nọ a gbiku na re no, Jemis ọ tẹ ta nọ: “Inievo, wha gaviezọ kẹ omẹ.
14 Simiọn* ọ romatotọ gbiku kẹ omai no kpahe oke ọsosuọ nọ Ọghẹnẹ ọ rọ rẹriẹ ovao ku ahwo erẹwho na re ọ jọ udevie rai rehọ ahwo kẹ odẹ riẹ.
15 Yọ eme Eruẹaro na e rọwo kugbe onana, wọhọ epanọ a kere nọ:
16 ‘Nọ eware nana e tẹ vrẹ no, me ti zihe ze mẹ vẹ te wariẹ bọ uwou* Devidi nọ u kie no na; mẹ te wariẹ bọ uwou nọ u kporo kuotọ no na je ru ei fihọ epanọ o jọ,
17 re ahwo nọ a kiọkọ a sae rọ eva rai kpobi gwọlọ Jihova,* te ai te ahwo erẹwho na kpobi, ahwo nọ a rọ odẹ mẹ se, ere Jihova* ọ ta, ọnọ o bi ru eware nana,
18 enọ a riẹ no anwae ze.’
19 Fikiere iroro mẹ họ, wha joma rọ uye bẹ ahwo erẹwho na ha, enọ i bi kurẹriẹ bru Ọghẹnẹ ze na,
20 rekọ joma kere se ai re a siomano eware nọ i wobọ kugbe ẹdhọgọ, siomano ọfariẹ-ogbe,* erao nọ i whu avọ azẹ,* je no azẹ.
21 Keme no anwae ze, Mosis o wo ahwo nọ a bi whowho eme riẹ evaọ ewho sa-sa, keme a be hae jọ iwou-egagọ se eme riẹ do via evaọ ẹdijala kpobi.”
22 Kẹsena ikọ na avọ ekpako na gbe ukoko na soso a tẹ jiroro nọ a re vi ahwo nọ a salọ evaọ udevie rai lele Pọl avọ Banabas kpobọ Antiọk; ahwo nọ a vi họ Judas ọnọ a re se Basabas gbe Saelas, enọ e jẹ kobaro evaọ udevie inievo na.
23 A te kere eme nana jẹ rehọ iẹe kẹ ae ro se inievo na:
“Ikọ na gbe ekpako na, inievo rai, ro se inievo nọ e rrọ Antiọk, Siria, avọ Silisia, enọ e rrọ ahwo erẹwho na: Wha do!
24 Fikinọ ma yo nọ ejọ i no udevie mai ze, a tẹ rọ eme rai wha uye se owhai, be gwọlọ wha ozighi họ owhai oma, dede nọ ma ta ere kẹ ae he,
25 ma rọ iroro evo rọwo inọ ma rẹ salọ ahwo vi bru owhai ze kugbe inievo iyoyou mai na Banabas avọ Pọl,
26 ezae nọ i fi uzuazọ rai họ ọza no fiki odẹ Olori mai Jesu Kristi.
27 Fikiere ma bi vi Judas avọ Saelas ze, re a jẹ rọ unu rai ta eme nana kẹ owhai.
28 Keme ẹzi ọfuafo na gbe omai omamai ma gba riẹ mu no inọ ma re fi ewha efa ba kẹ owhai hi, ajokpaọ eware nana nọ e roja na:
29 inọ wha hai siomano eware nọ a ro dhe idhe kẹ edhọ, no azẹ, no erao nọ i whu avọ azẹ,* je no ọfariẹ-ogbe.* Wha tẹ romatotọ siomano eware nana, u ti woma kẹ owhai. Wha jọ tou!”
30 Ezae nana a tẹ ruọ edhere, a te kpobọ Antiọk, a te koko inievo na kpobi họ a tẹ kẹ ae ileta na.
31 Nọ a se ileta na no, a tẹ ghọghọ fiki uduotahawọ na.
32 Fikinọ Judas avọ Saelas a jọ eruẹaro re, a kẹ evuẹ buobu rọ tuduhọ inievo na awọ jẹ bọ ae ga.
33 Nọ a jọ etẹe omoke jọ no, inievo na a tẹ ta kẹ ae nọ a nya tou nọ a bi zihe bru inievo nọ i vi rai ze na.
34 ——
35 Rekọ Pọl avọ Banabas a tẹ gbẹ jọ Antiọk, bi wuhrẹ ahwo je bi whowho ẹme Jihova,* yọ amọfa buobu a kuomagbe ai je ru onana.
36 Nọ edẹ jọ e vrẹ no, Pọl ọ tẹ ta kẹ Banabas nọ: “Joma zihe enẹna bru inievo na evaọ ewho kpobi nọ ma jọ whowho ẹme Jihova* na re ma ruẹ epanọ a rrọ.”
37 Banabas ọ gba riẹ mu nọ ọ rẹ rehọ Jọn kugbe oma, ọnọ a re se Mak.
38 Rekọ o were Pọl ho re a rehọ iẹe kugbe oma keme ọ nyase ae ba evaọ obọ Pamfilia, o lele i rai kpohọ iruo na ha.
39 Fikiere ẹwhọ ọgaga o te du lahwe, a tẹ hẹrioma no ohwohwo; Banabas ọ tẹ rehọ Mak kugbe oma, a tẹ ruọ okọ kpohọ Saiprọs.
40 Pọl ọ tẹ salọ Saelas, a tẹ ruọ edhere nọ inievo na a lẹ no inọ jọ Jihova* o dhesẹ uwowou ulogbo kẹ ae.
41 Ọ tẹ nya te Siria gbe Silisia, yọ ọ be bọ ikoko na ga.
Eme-Obotọ
^ Oghẹrẹ ofa nọ a re ro se Saemọn (Pita).
^ Hayo “uwou-udhu.”
^ Rri oria Otofa Eme.
^ Rri oria Otofa Eme.
^ Evaọ Griki, por·neiʹa. Rri oria Otofa Eme.
^ Hayo “erao nọ a bru uriohọ họ re azẹ o hwẹ no ai oma.”
^ Hayo “erao nọ a bru uriohọ họ re azẹ o hwẹ no ai oma.”
^ Evaọ Griki, por·neiʹa. Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
