Iruẹru 18:1-28
18 Nọ onana o vrẹ no, o te no Athẹns ziọ obọ Kọrint.
2 Ọ tẹ ruẹ ohwo Ju jọ nọ a re se Akwila, ọmotọ Pọntọs nọ avọ aye riẹ Prisila a no obọ Itali ze kẹle na, keme Klọdiọs o jie uzi nọ ahwo Ju kpobi a no Rom. Fikiere ọ tẹ nya bru rai,
3 yọ fikinọ oghẹrẹ iruo ọvona a je ru, ọ tẹ jẹ rria uwou rai, je lele ai ru iruo keme enọ i re ru iwou-owhre a jọ.
4 Ọ jẹ hae jọ uwou-egagọ na kẹ ovuẹ* evaọ ẹdijala kpobi, yọ ọ jẹ ta ẹme ruọ ahwo Ju gbe ahwo Griki oma.
5 Whaọ nọ Saelas avọ Timoti a no obọ Masidonia ze no, Pọl ọ tẹ jẹ rehọ oke riẹ kpobi vuẹ ẹme na, bi se isẹri kẹ ahwo Ju ro dhesẹ nọ Jesu họ Kristi na.
6 Rekọ nọ a gbẹ be wọso jẹ be ta emiẹsọ, o te nuhu iwu ehru riẹ jẹ ta kẹ ae nọ: “Jọ azẹ rai ọ jọ uzou obọrai. Azẹ ohwo ọvo ọ rrọ omẹ uzou hu. No umuo enẹna vrẹ mẹ te nya bru ahwo erẹwho na.”
7 Fikiere o te no etẹe* o te kpobọ uwou ọzae jọ nọ a re se Tishọs Jọstọs, ọnọ ọ be gọ Ọghẹnẹ, nọ uwou riẹ o kẹle uwou-egagọ na.
8 Rekọ Krispọs, ọnọ o wuzou evaọ uwou-egagọ na o te zihe ruọ olele Olori na, te ahwo uwou riẹ kpobi re. Ibuobu ahwo Kọrint nọ a yo ẹme na a te mu ẹrọwọ họ efihọ Olori na, a tẹ họ-ame.
9 Ofariẹ, evaọ aso, Olori na ọ tẹ ta kẹ Pọl evaọ eruẹaruẹ nọ: “Ozọ u mu owhẹ hẹ, rekọ gbẹ hai whowho ẹme na, who fibo ho,
10 keme mẹ rrọ kugbe owhẹ yọ ohwo ọvo ọ te họre owhẹ jẹ nwa owhẹ oma ha; keme me gbe wo ahwo buobu evaọ okpẹwho nana.”
11 Fikiere ọ tẹ jọ etẹe ẹgbukpe gbe emerae ezeza, bi wuhrẹ ae ẹme Ọghẹnẹ.
12 Nọ Gallio ọ jọ osu ubrotọ Akeya, ahwo Ju na a te kuomagbe wọso Pọl a tẹ rehọ iẹe kpohọ oria oziẹobro na,
13 be ta nọ: “Ọzae nana ọ be bẹbẹ ahwo họ re a gọ Ọghẹnẹ evaọ edhere nọ o wọso uzi na.”
14 Rekọ epanọ Pọl ọ be te rọ ta ẹme na, Gallio ọ tẹ ta kẹ ahwo Ju na nọ: “O hae jọnọ fiki oruthọ jọ hayo uzioraha ulogbo jọ wha rọ nyaze, O ahwo Ju, mẹ hai wo ẹjiroro nọ mẹ rẹ rọ gaviezọ kẹ owhai avọ odiri.
15 Rekọ otẹrọnọ fiki ikẹ-isio kpahe ẹmeunu, edẹ ahwo, gbe uzi obọrai, whai ọvo wha nyai ku ẹme na họ. Mẹ gwọlọ jọ obruoziẹ eware nana ha.”
16 O te le ai vrẹ no oria oziẹobro na.
17 Fikiere a te kru Sostẹnes, ọnọ o wuzou evaọ uwou-egagọ na a te mu ei họ ekpe evaọ aro oria oziẹobro na. Rekọ Gallio o dhomahọ eware nana vievie he.
18 Rekọ, nọ Pọl ọ gbẹ jọ etẹe edẹ buobu no, ọ tẹ ta kẹ inievo na nọ a jọ tou, ọ tẹ ruọ okọ re o kpohọ Siria, yọ Prisila avọ Akwila a jọ kugbei. Ọ jọ Sẹnkria bru eto riẹ kpẹre, keme ọ ya eyaa jọ.
19 A te ti te Ẹfisọs, ọ tẹ nyase ae ba etẹe; ọ tẹ ruọ evaọ uwou-egagọ na ọ tẹ rehọ Ikereakere na lele ahwo Ju na jiroro.
20 Dede nọ a jẹ lẹe nọ ọ gbẹ jọ kugbe ai omoke jọ, ọ rọwo ho
21 rekọ ọ tẹ ta kẹ ae nọ a jọ tou jẹ ta nọ: “O tẹ rrọ oreva Jihova,* mẹ te wariẹ zihe bru owhai ze.” Ọ tẹ jọ Ẹfisọs ruọ okọ,
22 ọ tẹ ziọ obọ Sisaria. Ọ tẹ nya kpobọ Jerusalẹm o te yere ukoko na, kẹsena o te kpobọ Antiọk.
23 Nọ ọ jọ etẹe raha omoke jọ no, o te no etẹe, o te je no oria ruọ oria evaọ ubrotọ Galesha gbe Frijia, be bọ ilele na kpobi ga.
24 Whaọ ohwo Ju jọ nọ a re se Apọlọs, ọmotọ Alẹkzandria, ọ ziọ Ẹfisọs; ọzae nọ ọ riẹ ẹme ẹta ziezi, ọ tẹ jẹ riẹ Ikereakere na ziezi.
25 A wuhrẹ ọzae nana edhere Jihova* yọ fikinọ ẹzi ọfuafo na ọ vọ riẹ oma ọ jẹ ta ẹme je wuhrẹ eware kpahe Jesu gbagba, rekọ ame-ọhọ Jọn ọvo ọ riẹ kpahe.
26 O te mu ẹme Ọghẹnẹ họ ẹta ududu evaọ uwou-egagọ na, nọ Prisila avọ Akwila a yo eme riẹ, a tẹ rehọ iẹe fihọ usu rai a te ru idhere Ọghẹnẹ vẹ kẹe gbagba vi epanọ ọ riẹ vẹre.
27 Ofariẹ, fikinọ ọ gwọlọ kpobọ Akeya, inievo na a te kere se ilele nọ e rrọ obei, be tuduhọ ae awọ re a dede iei rehọ sasasa. Fikiere nọ o te obei, o fiobọhọ gaga kẹ enọ e rehọ fiki uwowou ulogbo Ọghẹnẹ zihe ruọ ilele no;
28 keme ọ jọ evaọ ẹgbede jẹ rehọ ọwhọ ọgaga dhesẹ via vevẹ inọ ahwo Ju na a bi wuhrẹ ahwo thọ, yọ o bi dhesẹ kẹ ai no Ikereakere na ze inọ Jesu họ Kristi na.
Eme-Obotọ
^ Hayo “lele ai jiroro.”
^ Koyehọ, uwou-egagọ na.
^ Rri oria Otofa Eme.
^ Rri oria Otofa Eme.
