Iruẹru 20:1-38
20 Nọ ozighi na o serihọ no, Pọl ọ tẹ vuẹ se ilele na nọ a nyaze, nọ ọ tuduhọ ae awọ jẹ ta kẹ ae nọ a jọ tou no, ọ tẹ ruọ edhere bi kpohọ Masidonia.
2 Nọ ọ nya ibrotọ yena vrẹ jẹ ta eme buobu rọ tuduhọ ilele nọ e jọ oyena awọ no, o te te Grisi.
3 Ọ jọ etẹe emerae esa, rekọ fikinọ ahwo Ju na a gba ẹgwae nọ a re kpei no okenọ ọ jẹ gwọlọ nọ ọ rẹ ruọ okọ kpobọ Siria, ọ tẹ jiroro nọ ọ rẹ rehọ orọ Masidonia zihe.
4 Ahwo nọ a jọ kugbei họ Sopata ọmọ Pirọs ọrọ obọ Bẹria gbe Aristakọs avọ Sekundos erọ obọ Tẹsalonika, Geyọs ọrọ obọ Dẹbi, Timoti gbe Tikikọs avọ Trọfimọs nọ i no ubrotọ Esia ze.
5 Ezae nana a tẹ kake nya a tẹ jẹ hẹrẹ omai evaọ Troas;
6 rekọ ma tẹ jọ Filipai ruọ okọ nọ edẹ Ehaa Ebrẹdi nọ Ọ Kare Ẹvi na e gba no, yọ evaọ oware wọhọ edẹ isoi ma te te ae oma evaọ Troas, ma tẹ jọ etẹe edẹ ihrẹ.
7 Evaọ ẹdẹ ọsosuọ ọrọ oka na,* nọ ma kokohọ re ma re emu, Pọl ọ tẹ jẹ ta ẹme Ọghẹnẹ kẹ ae keme o bi ti no etẹe evaọ okiokiọ riẹ; yọ ọ ta ẹme rite udevie aso.
8 Fikiere a rọ ikpẹ buobu tu ubruwou ehru nọ ma kokohọ na.
9 Whaọ ọmọzae jọ nọ a re se Yutikọs ọ keria unwido, o te kie ruọ owezẹ udidi nọ Pọl ọ gbẹ jẹ ta ẹme na, owezẹ na u te ru ei kie no edhe avọ esa uwou ehru na fihọ otọ, nọ a te etẹe a tẹ ruẹ nọ o whu no.
10 Rekọ Pọl o te kpobọ otọ, o te kie ruru ei jẹ gbae họ oma ọ tẹ ta nọ: “Wha gbe ru edo ho, ọ rrọ uzuazọ.”
11 Ọ tẹ wariẹ gadiẹ kpobọ ehru, ọ tẹ rehọ emu na,* ọ tẹ re. Ọ tẹ ruabọhọ ẹmeọta riẹ, bẹsenọ oke o rọ ke, kẹsena ọ tẹ ruọ edhere vrẹ.
12 A tẹ rehọ ọmọzae na vrẹ, yọ a ghọghọ gaga fikinọ ọ wariẹ ziọ uzuazọ no.
13 Ma tẹ karo kpobọ okọ na ma te mu obọ Asọs họ ebi kpohọ, oria nọ Pọl ọ te jọ ruọ okọ na kugbe omai, wọhọ epanọ ọ ta kẹ omai, keme ọ gwọlọ nọ ọ rẹ nya owotọ kpohọ obei.
14 Nọ ọ nya bru omai ze evaọ Asọs, ọ tẹ ruọ okọ na kugbe omai ma te kpobọ Mitilini.
15 Nọ ma lehọ no etẹe okiokiọ riẹ, ma te te Kiọs, rekọ ẹdẹ nọ o lele i rie ma te bi kpahe Samọs jẹ raha omoke evaọ etẹe, okiokiọ riẹ ma te te Malitọs.
16 Pọl ọ jiroro nọ ọ rẹ ruotọ evaọ Ẹfisọs ho, re ọ gbẹ raha oke ovo evaọ ubrotọ Esia ha, keme o je ru ovẹrẹ re o te Jerusalẹm evaọ ẹdẹ Ehaa Pẹntikọst na otẹrọnọ o rẹ sae lọhọ.
17 Rekọ, ọ jọ Malitọs vi uwou kpobọ Ẹfisọs nọ ekpako ukoko na a nyaze.
18 Nọ a nya bru rie ze ọ tẹ ta kẹ ae nọ: “Wha riẹ epanọ me ru omamẹ evaọ udevie rai anwọ ẹdẹ ọsosuọ nọ mẹ rọ rehọ ithihi te ubrotọ Esia,
19 be rọ omaurokpotọ kpobi gbodibo kẹ Olori na avọ irui-oviẹ gbe edawọ nọ i te omẹ fiki omaa nọ ahwo Ju a ma unuẹse buobu inọ a re kpe omẹ no,
20 ghele na, mẹ siọ ẹme ọvuọvo nọ ọ rẹ kẹ erere ba ẹta kẹ owhai hi, yọ mẹ siọ owhai ba ewuhrẹ hẹ evaọ ẹgbede je no uwou ruọ uwou.
21 Rekọ mẹ romatotọ se isẹri kẹ ahwo Ju gbe ahwo Griki inọ a kurẹriẹ bru Ọghẹnẹ ze je fi ẹrọwọ họ Olori mai Jesu.
22 Whaọ enẹna, o gba omẹ họ nọ me re kpohọ Jerusalẹm wọhọ epanọ ẹzi na ọ gwọlọ, dede nọ mẹ riẹ oware nọ o te jọ obei via kẹ omẹ hẹ,
23 ajokpaọ oware nọ ẹzi ọfuafo na o bi dhe omẹ ẹtẹta kẹ nọ me bi no ẹwho ruọ ẹwho na inọ uwou-odi gbe ikpokpoma e be hẹrẹ omẹ.
24 Rekọ me rri uzuazọ mẹ fihọ oware oghaghae jọ kẹ omẹ hẹ, thakpinọ mẹ dhẹ ohrẹ mẹ na te urere je ru iruo odibọgba nọ Olori na Jesu ọ kẹ omẹ na gba inọ me se isẹri ziezi kpahe usi uwoma orọ uwowou ulogbo Ọghẹnẹ.
25 “Whaọ enẹna, mẹ riẹ nọ ọvuọvo evaọ usu rai nọ mẹ ta usi uwoma Uvie na kẹ na ọ te gbẹ ruẹ ovao mẹ ofa ha.
26 Fikiere, mẹ gwọlọ nọ wha jọ isẹri mẹ nẹnẹ na inọ azẹ ohwo ọvo ọ rrọ omẹ uzou hu,
27 keme mẹ siọ ehrẹ* Ọghẹnẹ kpobi ba ẹta kẹ owhai hi.
28 Wha sẹro omarai gbe uthuru na soso, enọ ẹzi ọfuafo na ọ rehọ owhai mu esẹro evaọ udevie rai, re wha sẹro ukoko Ọghẹnẹ, onọ ọ rehọ azẹ Ọmọ obọriẹ dẹ.
29 Mẹ riẹ nọ mẹ te nyavrẹ no na, ijera egeva e te ruọ udevie rai yọ a ti tete uthuru na ha,
30 yọ evaọ udevie rai na ezae e te romavia a ve ti wuhrẹ iwuhrẹ erue re a ruẹsi si ilele na lele oma.
31 “Fikiere wha jaja aro vi, jẹ kareghẹhọ ẹsikpobi inọ ikpe esa soso, taso tuvo, mẹ jẹ hrẹ owhai omomọvo avọ irui-oviẹ ẹsikpobi.
32 Whaọ enẹna, me bi mu owhai họ Ọghẹnẹ obọ gbe ẹme uwowou ulogbo riẹ, ẹme nọ ọ rẹ sae bọ owhai ga je ru owhai wo ukuoriọ na kugbe enọ a ru fo no na kpobi.
33 Me siuru isiliva hayo igoru hayo ewu ohwo ọvo ho.
34 Whai omarai wha riẹ nọ abọ mẹ nana me ro ru iruo rọ rẹrote ẹgwọlọ mẹ gbe ẹgwọlọ ahwo nọ a rrọ kugbe omẹ.
35 Me dhesẹ kẹ owhai evaọ eware kpobi inọ wha te bi ru iruo gaga epọvo na re, wha re fiobọhọ kẹ enọ e ga ha, wha ve je wo ẹme Olori na Jesu họ iroro, nọ ọyomariẹ ọ ta nọ: ‘Ẹkẹ evawere e mae rrọ vi emio.’”
36 Nọ ọ ta eme nana no, ọyomariẹ avọ ahwo na kpobi a te kigwẹ a tẹ lẹ.
37 Inievo na kpobi a te muhọ ẹviẹ gaga, a tẹ gbalọ Pọl* jẹ nabe viọlọ iẹe,
38 keme ẹme nọ ọ ta na ọ da rai gaga inọ a te gbẹ ruẹ ovao riẹ ofa ha. Kẹsena a te su ei kpobọ okọ na.
Eme-Obotọ
^ Ẹdẹ nana ma bi se Ẹdoka nẹnẹ na. Rọkẹ ahwo Ju, ẹdẹ yena ọ jọ ẹdẹ ọsosuọ oka na.
^ Evaọ Griki, “o te wiri ebrẹdi na.”
^ Hayo “ẹjiroro.”
^ Evaọ Griki, “a tẹ rọ uzou kpahe ẹkoko Pọl.”
