Iruẹru 22:1-30
22 “Whai ahwo, inievo gbe esẹ, jọ wha yo ẹkẹ-unu mẹ nọ me bi ti gu kẹ owhai na.”
2 Whaọ nọ a ruẹ nọ ẹvẹrẹ Hibru ọ be rọ ta ẹme kẹ ae, a tẹ fọ viere, ọ tẹ ta nọ:
3 “Mẹ yọ ohwo Ju, ọnọ a yẹ evaọ Tasọs ọrọ Silisia, rekọ evaọ okpẹwho nana Gamaliẹl ọ jọ wuhrẹ omẹ, a wuhrẹ omẹ epanọ mẹ rẹ rọ romatotọ koko Uzi nọ esẹ mai a koko, me te je wo ajọwha evaọ egagọ Ọghẹnẹ wọhọ epanọ whai kpobi wha wo nẹnẹ na.
4 Me kpokpo enọ e rrọ Edhere nana je ru nọ a ro kpe ai, me je mu te ezae te eyae fihọ uwou-odi,
5 wọhọ epanọ ozerẹ okpehru na gbe ekpako na kpobi a rẹ sai se isẹri. Mẹ rehọ ileta mi ai re, nọ me re ro se inievo mai nọ e rrọ obọ Damaskọs, mẹ tẹ ruọ edhere re mẹ nyai mu enọ e rrọ obei ziọ Jerusalẹm re a kẹ ae uye.
6 “Rekọ epanọ mẹ rọ jọ edhere be kẹle Damaskọs no na, evaọ ubrobọ udevie uvo, idudhe na elo ọgaga jọ o te lo no ehru ze wariẹ omẹ họ,
7 me te kie fihọ otọ, me te yo urru jọ nọ o ta kẹ omẹ nọ: ‘Sọl, Sọl, fikieme who bi ro kpokpo omẹ?’
8 Mẹ tẹ nọ inọ: ‘Whẹ yọ ono, Olori?’ Ọ tẹ ta kẹ omẹ nọ: ‘Mẹ yọ Jesu, ohwo Nazarẹt na, ọnọ who bi kpokpo na.’
9 Whaọ, ezae nọ e jọ kugbe omẹ a ruẹ elo na rekọ a yo urru ohwo nọ ọ jẹ ta ẹme kẹ omẹ na ha.
10 Mẹ tẹ nọ inọ: ‘Eme me re ru, Olori?’ Olori na ọ tẹ ta kẹ omẹ nọ: ‘Kpama, re whọ ruọ Damaskọs, a te jọ etẹe vuẹ owhẹ eware kpobi nọ a ruẹrẹ fihọ kẹ owhẹ no nọ who ti ru.’
11 Rekọ fikinọ mẹ jẹ ruẹ ude he fiki epanọ elo na ọ ga te, enọ e jọ kugbe omẹ a te kru omẹ obọ, a te su omẹ ruọ evaọ Damaskọs.
12 “Kẹsena ọzae nọ a re se Ananayas, ọnọ ọ rrọ ọgba-egagọ, nọ o bi koko Uzi na, ọnọ ahwo Ju kpobi nọ a be rria etẹe a be ta emamọ ẹme kpahe,
13 ọ tẹ nya bru omẹ ze. O te dikihẹ gba omẹ jẹ ta kẹ omẹ nọ: ‘Sọl, oniọvo, wariẹ ruẹ ude!’ Mẹ tẹ nwane kpare ovao, mẹ tẹ ruẹ e riẹ.
14 Ọ tẹ ta nọ: ‘Ọghẹnẹ esẹ-ode mai ọ salọ owhẹ no re whọ te riẹ oreva riẹ re whọ jẹ ruẹ ọnọ o kiẹrẹe na je yo urru riẹ,
15 keme who ti se isẹri kẹe rọkẹ ahwo kpobi kpahe eware nọ whọ ruẹ je yo no na.
16 Kọ fikieme whọ be rọ raha oke? Kpama, re whọ họ-ame, a te rọ izieraha ra rọvrẹ owhẹ ẹkwoma odẹ riẹ nọ who re se.’
17 “Rekọ nọ me zihe ziọ Jerusalẹm no nọ mẹ jẹ lẹ evaọ etẹmpol na, mẹ tẹ jọ evaọ eruẹaruẹ,
18 mẹ tẹ ruẹ e riẹ nọ ọ be ta kẹ omẹ nọ: ‘Ovẹrẹ, dhẹ no Jerusalẹm vẹrẹ vẹrẹ, keme a te rọwo isẹri nọ who bi se kpahe omẹ na ha.’
19 Mẹ tẹ ta nọ: ‘Olori, ae omarai a riẹ nọ me je no uwou-egagọ ruọ uwou-egagọ jẹ hai mu enọ e rọwo owhẹ fihọ uwou-odi jẹ fa ae;
20 yọ okenọ a je kpe Stivin osẹri ra, mẹ jọ etẹe yọ mẹ rọwo fihọ ekpe riẹ je rou* iwu enọ i je kpei na.’
21 Ghele na ọ tẹ ta kẹ omẹ nọ: ‘Nya, keme me ti vi owhẹ kpohọ erẹwho nọ e rrọ ugbothabọ.’”
22 Whaọ a jẹ gaviezọ kẹe rite ẹme nana. Kẹsena a tẹ kpare irru rai, bi bo nọ: “Wha kpe ohwo otiọnana no, keme o fo ohwo nọ ọ rẹ jọ uzuazọ họ!”
23 Fikinọ a je bo, bi gbolo iwu ehru rai kpenẹ avọ enẹ, jẹ be whẹ ovu kpehru,
24 ọnọ o wuzou ogbaẹmo na ọ tẹ ta nọ a rehọ Pọl ruọ evaọ ogba isoja na re a kiẹe riwi avọ eviaviẹ nọ a rẹ rọ fae, re a sae riẹ ugogo oware nọ o soriẹ ze nọ ogbotu na a bi ro bo nọ a kpe Pọl no.
25 Rekọ nọ a riẹ Pọl fihọ otọ no re a fae, ọ tẹ ta kẹ oletu ogbaẹmo nọ o dikihẹ etẹe nọ: “Kọ u fo re wha fa ohwo Rom* ọnọ a ri bruoziẹ kpe he?”*
26 Whaọ nọ oletu ogbaẹmo na o yo onana, ọ tẹ nya bru ọnọ o wuzou ogbaẹmo na ọ tẹ ta kẹe nọ: “Kọ eme who bi ti ru enẹna? Keme ọzae nana yọ ohwo Rom.”
27 Fikiere ọnọ o wuzou ogbaẹmo na ọ tẹ nya bru rie ọ tẹ ta kẹe nọ: “Ta kẹ omẹ, whẹ yọ ohwo Rom?” Ọ tẹ kuyo nọ: “Ee.”
28 Ọnọ o wuzou ogbaẹmo na ọ tẹ ta nọ: “Igho buobu mẹ rọ dẹ udu nọ mẹ rọ rrọ ọmotọ Rom na.” Pọl ọ tẹ ta nọ: “Rekọ a yẹ omẹ ọmotọ Rom.”
29 Fikiere, ezae nọ e jẹ te fae jẹ kiẹe riwi na a tẹ nwani zihe oma; ozọ u te mu ọnọ o wuzou ogbaẹmo na nọ ọ riẹ nọ ohwo Rom ọ rrọ, yọ ọ rehọ egbregba kare iẹe.
30 Fikiere, okiokiọ riẹ, fikinọ ọ jẹ gwọlọ riẹ oware nọ o soriẹ nọ ahwo Ju na a je ro gu eware fihọ iẹe uzou, ọ tẹ ta nọ a si egbregba noi, o te se ilori izerẹ na gbe ogbẹgwae Sanhẹdrin na soso kokohọ. Kẹsena ọ tẹ rehọ Pọl ze ro dikihẹ udevie rai.
