Iruẹru 25:1-27
25 Fikiere nọ Fẹstọs ọ ziọ ubrotọ na je muhọ esu no, nọ edẹ esa e vrẹ no o te no Sisaria kpobọ Jerusalẹm.
2 Ilori izerẹ na avọ enọ e rrọ isu ahwo Ju a te gu eme kẹe kpahe Pọl. Fikiere a te mu Fẹstọs họ ẹlẹ
3 inọ o ru oware jọ kẹ ae, inọ o vi uwou nya re a rehọ Pọl ziọ Jerusalẹm. Rekọ a wo omaa nọ a ti dhere hẹrẹ Pọl re a kpei no evaọ edhere.
4 Rekọ Fẹstọs ọ tẹ ta nọ obọ Sisaria oye Pọl ọ rẹ gbẹ jọ, gbe nọ ọyomariẹ o bi ti zihe kpohọ obei kẹle.
5 Ọ tẹ ta nọ: “Jọ enọ e rrọ isu evaọ udevie rai a lele omẹ nya re a ta eware nọ o ru otẹrọnọ ọzae na o gine ru oware jọ thọ.”
6 Fikiere nọ ọ raha oware wọhọ edẹ eree hayo ikpe kugbe ai no, o te zihe kpobọ Sisaria, okiokiọ riẹ ọ tẹ keria akaba oziẹobro na jẹ ta nọ a rehọ Pọl ze.
7 Nọ ọ ruọ eva, ahwo Ju nọ a no obọ Jerusalẹm ze a te dikihẹ wariẹe họ, be ta eware iyoma buobu kpahe iẹe, enọ a sae kẹ imuẹro ọvo kpahe he.
8 Rekọ Pọl o te gu ẹkẹ-unu riẹ ta nọ: “Mẹ thọ uzi ọvo mukpahe Uzi ahwo Ju hayo etẹmpol na hayo Siza ha.”
9 Fikinọ Fẹstọs ọ gwọlọ re eva riẹ e were ahwo Ju na, ọ tẹ kpahe kẹ Pọl nọ: “Kọ whọ gwọlọ nọ who re kpobọ Jerusalẹm re a jọ aro mẹ gu owhẹ ẹdhọ evaọ obei kpahe eware nana?”
10 Pọl ọ tẹ ta nọ: “Aro akaba oziẹobro Siza me dikihẹ na, oria nọ u fo nọ a rẹ jọ gu omẹ ẹdhọ. Me ru ahwo Ju na oware ovo thọ họ, wọhọ epanọ whẹ omara whọ be ruẹ vevẹ na.
11 O tẹ ginẹ rọnọ me ru thọ yọ me ru oware nọ me ro fo uwhu, orọnikọ mẹ be lẹ nọ a siọ omẹ ba ekpe he; rekọ otẹrọnọ eku gheghe ezae nana a be gba fihọ omẹ uzou na, ohwo ọvo ọ rẹ sae rehọ omẹ kẹ ae re ọ ruẹsi ru ai eva were he. Mẹ kpare ẹdhọ mẹ bru Siza!”
12 Nọ Fẹstọs o lele ogbẹgwae ekiroro riẹ ta ẹme no, ọ tẹ ta nọ: “Whọ kpare ẹdhọ ra bru Siza no; who ti kpobọ Siza.”
13 Nọ edẹ jọ e vrẹ no, Agripa ovie na avọ Benaisi a tẹ ziọ Sisaria ti yere Fẹstọs.
14 Nọ orọnọ a jọ etẹe edẹ jọ na, Fẹstọs o te fi ẹme Pọl họ otọ kẹ ovie na, inọ:
“Ọzae jọ ọ riẹ nọ Fẹliks ọ nya seba uwou-odi,
15 yọ okenọ me kpobọ Jerusalẹm, ilori izerẹ na gbe ekpako ahwo Ju a ta eme jọ kpahe iẹe kẹ omẹ, be ta nọ me bruoziẹ uwhu kpei.
16 Rekọ mẹ tẹ ta kẹ ae nọ o rrọ uruemu ahwo Rom hu re a siobọno ohwo kẹ ahwo jọ ro ru ae eva were, ababọ uvẹ nọ a rẹ kẹ ohwo na gu ẹkẹ-unu riẹ evaọ iraro enọ e ta nọ o ru thọ na.
17 Fikiere nọ a nyaze, mẹ raha oke he, rekọ okiokiọ riẹ mẹ tẹ keria akaba oziẹobro na jẹ ta nọ a rehọ ọzae na ze.
18 Nọ ahwo nọ a gu eware fihọ iẹe uzou na a kpama muhọ egu, a ta eware iyoma evo nọ me je rẹro rai kpahe iẹe he.
19 Avro gheghe a wo kugbei kpahe egagọ rai gbe ọzae jọ nọ a re se Jesu ọnọ o whu rekọ nọ Pọl ọ be suobọhọ ta nọ ọ rrọ uzuazọ.
20 Fikinọ mẹ riẹ onọ me re ru evaọ ẹme na ha, mẹ tẹ nọe sọ o te were iẹe re o kpobọ Jerusalẹm re a jọ obei rehọ iẹe gu ẹdhọ.
21 Rekọ nọ Pọl ọ yare nọ a nyase iẹe ba uwou-odi re ọ hẹrẹ oziẹ Ọba Oride na, mẹ tẹ ta nọ ọ gbẹ jọ uwou-odi bẹsenọ me re vi ei bru Siza.”
22 Kẹsena Agripa ọ tẹ ta kẹ Fẹstọs nọ: “Mẹ gwọlọ nọ ọzae na o re gu ẹkẹ-unu riẹ kẹ omẹ.” Ọ tẹ ta nọ: “Odẹnotha, who ti yo ẹkẹ-unu riẹ.”
23 Fikiere evaọ okiokiọ riẹ, Agripa avọ Benaisi a tẹ nyaze avọ oma-udhesẹ ulogbo a tẹ ruọ evaọ ọgwa ẹdhoguo na, yọ enọ i wuzou egbaẹmo gbe ikpahwo ẹwho na a jọ kugbe ae, nọ Fẹstọs ọ kẹ udu no, a tẹ rehọ Pọl ze.
24 Fẹstọs ọ tẹ ta nọ: “Agripa Ovie gbe owhai kpobi nọ a rrọ etenẹ kugbe omai, wha be ruẹ ọzae nana, ọnọ ahwo Ju soso a yare omẹ kpahe evaọ obọ Jerusalẹm gbe evaọ etenẹ, je bo nọ o fo ohwo nọ ọ rẹ jọ uzuazọ họ.
25 Rekọ me muẹrohọ nọ o ru oware ọvo thọ nọ o ro fo uwhu hu. Fikiere nọ ọzae nana ọ kpare ẹdhọ riẹ bru Ọba Oride na, mẹ tẹ jiroro nọ me re vi ei nya.
26 Rekọ me wo ugogo oware ọvo nọ me re kere kpahe iẹe se Olori mẹ hẹ. Oyejabọ nọ mẹ rọ rehọ iẹe ziọ aro rai kpobi na, maero kọ owhẹ, Agripa Ovie, re nọ wha tẹ kiẹ otọ ẹme riẹ ziezi no, mẹ vẹ sae ruẹ oware jọ kere.
27 Keme o wọhọ oware ugheghẹ kẹ omẹ re me vi ohwo nọ ọ rrọ uwou-odi sei ababọ ẹfodẹ eware nọ a ta nọ o ru.”
