Iruẹru 28:1-31
28 Nọ ma te okpa gbẹsinẹdẹ no, ma tẹ riẹ nọ a re se ukoliko na Mọlta.
2 Ahwo ukoliko nana nọ a be ta ẹvẹrẹ mai hi na a dhesẹ uwowou* kẹ omai evaọ edhere ologbo. A dede omai rehọ sasasa je koko erae họ fiki oso nọ ọ jẹ rrọ gbe ekpahe nọ e jariẹ.
3 Rekọ nọ Pọl o koko ekru ire họ je fi ae họ erae na, ọwẹ o te no eva rai ze fiki ẹrrorro erae na ọ tẹ tatakọ họ obọ riẹ.
4 Nọ ahwo ukoliko na a ruẹ araomuomu na nọ o bi veghe evaọ obọ riẹ, a tẹ be ta kẹ ohwohwo nọ: “Ababọ avro, ọzae nana yọ ojihẹ, dede nọ o no abade na te okpa gbẹsinẹdẹ, ọnọ o re bruoziẹ kiete na* ọ kẹ riẹ uvẹ re ọ gbẹ jọ uzuazọ họ.”
5 Rekọ ọ tẹ frẹ araomuomu na fihọ erae na yọ oware uyoma ovo o via kẹe he.
6 Ahwo na a je rẹro nọ oma riẹ u ti fu hayo o ti kie fihọ otọ whu idudhe. Nọ a hẹrẹ oke krẹkri no yọ a ruẹ nọ oware uyoma ovo o via kẹe he, a te nwene iroro rai je muhọ ẹta nọ Pọl yọ ọghẹnẹ.
7 Whaọ osu ukoliko na nọ a re se Pọbliọs o wo idhu kẹle oria yena, yọ o dede omai rehọ jẹ rẹrote omai ziezi evaọ edẹ esa.
8 Evaọ oke yena yọ ọsẹ Pọbliọs o kiẹzẹ ehwa nọ ọ be mọ ifiva je bi ku eva, Pọl ọ tẹ nya bru rie ọ tẹ lẹ, rọ abọ kpahe iẹe, ẹyao riẹ o te kpo.
9 Nọ onana o via no, amọfa evaọ ukoliko na nọ a jẹ mọ a te mu ei họ ẹnya bru ze re o siwi ae.
10 A kẹ omai ekẹ buobu re, yọ okenọ ma jẹ gwọlọ lehọ, a kẹ omai eware kpobi nọ ma rẹ rọ rẹrote oma mai.
11 Nọ emerae esa e vrẹ no, ma tẹ ruọ okọ nọ a kere fihọ nọ “Emọ Zus.” Obọ Alẹkzandria okọ na u no ze yọ o jọ ukoliko na evaọ oke uriri na.
12 Nọ ma kpahe unueri Sirakus, ma tẹ jọ etẹe edẹ esa;
13 ma te no etẹe bi vrẹ, ma te te Rigiọm. Ẹdẹ nọ o lele i rie, ofou o te bi fou no obọze ovatha-ọre ze, ma te ti te Putẹoli evaọ ẹdẹ avọ ivẹ.
14 Ma jọ etenẹ ruẹ inievo, a tẹ lẹ omai re ma jọ kugbe ae edẹ ihrẹ, kọ etẹe ma no rọ ovao rri Rom.
15 Nọ inievo na e jọ obei yo kpahe omai, a tẹ ziọ ugbo obọ Oria Eki Apiọs gbe Iwhre Iwou Esa ti zere omai. Nọ Pọl ọ ruẹ e rai, o te yere Ọghẹnẹ je kru udu ga.
16 Ukuhọ riẹ nọ ma te Rom, a kẹ Pọl uvẹ re ọye ọvo ọ rria uwou avọ osoja nọ o bi rou* rie.
17 Rekọ nọ edẹ esa e vrẹ no, o te se isu ahwo Ju na kokohọ. Nọ a kokohọ no, ọ tẹ ta kẹ ae nọ: “Whai ahwo, inievo, dede nọ me ru oware ovo wọso ahwo na hayo iruemu esẹ-ode mai hi, a kru omẹ evaọ obọ Jerusalẹm a tẹ rehọ omẹ kẹ ahwo Rom wọhọ ohwo nọ ọ rrọ uwou-odi.
18 Nọ a kiẹ omẹ riwi no, a jẹ gwọlọ siobọno omẹ keme a ruẹ oware ovo nọ me ru thọ nọ a re ro kpe omẹ hẹ.
19 Rekọ fikinọ ahwo Ju na a rọwo ho, mẹ tẹ dhugbẹ kpare ẹdhọ na bru Siza ze, rekọ orọnọ fiki oware jọ nọ mẹ gwọlọ gu kpahe orẹwho mẹ hẹ.
20 Fiki onana mẹ rọ yare nọ mẹ rẹ ruẹ owhai je lele owhai ta ẹme, keme fiki ọnọ Izrẹl o bi rẹro riẹ anwẹdẹ na a rọ rehọ egbregba nana kare omẹ na.”
21 A tẹ ta kẹe nọ: “Ma ri wo ileta no obọ Judia ze kpahe owhẹ hẹ, yọ ohwo ọvo evaọ usu inievo nọ i no obei ze ọ re niyẹrẹ hayo ta ẹme oyoma ọvo kpahe owhẹ hẹ.
22 Rekọ ma roro nọ u fo re ma yo mi owhẹ, keme evaọ uzẹme, ma riẹ nọ ahwo a be ta ẹme oyoma kpahe ẹko-egagọ nana evaọ eria kpobi.”
23 A te fi ẹdẹ họ nọ a te rọ nya bru rie ze, a te zurie ze bu vi epaọ ọsosuọ ziọ oria nọ ọ jẹ rria. O te ru ẹme na vẹ kẹ ae ẹkwoma isẹri nọ o se ziezi kpahe Uvie Ọghẹnẹ no ohiohiẹ rite owọwọ, ọ ta eme no Uzi Mosis gbe ebe Eruẹaro na ze re o ro ru ae rọwo Jesu.
24 Ejọ i te mu eme nọ ọ ta họ ẹrọwo; efa e rọwo ho.
25 Fikinọ a rọwo kugbe ohwohwo ho, a te muhọ ẹnyavrẹ, Pọl ọ tẹ ta nọ:
“Ẹzi ọfuafo na ọ rehọ Aizaya ọruẹaro na ta gba nọ ọ ta kẹ esẹ-ode rai
26 inọ, ‘Nya bru ahwo nana re whọ ta nọ: “Wha ti gine yo rekọ wha ti wo otoriẹ vievie he, yọ wha ti gine rri rekọ wha te ruẹ vievie he.
27 Keme udu ahwo nana o rrọ gaga, yọ a be rọ ezọ rai yo rekọ a be daezọ họ, a tẹ jẹ fare ibiaro rai, re a gbẹ rehọ ibiaro rai ruẹ ude hayo rehọ ezọ rai yo hayo jọ udu rai wo otoriẹ ẹme na vievie he, o tẹ whae ze nọ a gbe bi zihe bru omẹ ze he re me siwi ai.”’
28 Fikiere, jọ wha riẹ nọ a whowho ovuẹ esiwo nana nọ o bi no obọ Ọghẹnẹ ze na kẹ erẹwho na no; yọ ababọ avro, a te gaviezọ kẹe.”
29 ——
30 Ọ tẹ jọ etẹe ikpe ivẹ soso evaọ uwou riẹ nọ ọ haya, yọ o je dede ahwo kpobi nọ a nya bru rie ze rehọ sasasa,
31 je whowho Uvie Ọghẹnẹ kẹ ae je wuhrẹ ae kpahe Olori na Jesu Kristi ududu, ababọ awhaha.
Eme-Obotọ
^ Hayo “uwowou nọ a re dhesẹ kẹ ibe ohwo-akpọ.”
^ Ẹme Griki nọ a fa na họ Diʹke, yọ o wọhọ nọ a jẹ rehọ iẹe ta kpahe Ẹdhọ-aye nọ a rọwo nọ ọ rẹ kẹ enọ i ruthọ uye. Hayo osa nọ u re te ọnọ o ru eyoma.
^ Hayo “rroro.”
