Iruẹru 7:1-60
7 Rekọ ozerẹ okpehru na ọ tẹ nọe nọ: “Kọ eme nana uzẹme?”
2 Stivin ọ tẹ kuyo nọ: “Whai ahwo, inievo gbe esẹ, wha gaviezọ. Ọghẹnẹ oruaro na ọ romavia kẹ ọsẹ-ode mai Abraham okenọ ọ jọ obọ Mẹsopotemia, taure o te ti muọ Heran họ ẹria,
3 Ọghẹnẹ ọ tẹ ta kẹe nọ: ‘Nya no ẹkwotọ ra jẹ nyasiọ imoni ra ba re who kpohọ ẹkwotọ nọ me bi ti dhesẹ kẹ owhẹ.’
4 Ọ tẹ nya no ẹkwotọ Kaldia o te muọ Heran họ ẹria. Nọ ọsẹ riẹ o whu no, Ọghẹnẹ ọ tẹ ta kẹe nọ ọ kwa no etẹe ziọ ẹkwotọ nana nọ wha be rria na.
5 Rekọ, Ọghẹnẹ ọ kẹ riẹ ukuoriọ ovo evaọ otọ na ha, ijo, makọ omoria nọ owọ riẹ o rẹ gba dede; rekọ ọ ya eyaa nọ ọ te rọ otọ na kẹe avọ emọ riẹ dede nọ evaọ oke yena o ri wo ọmọ họ.
6 Ofariẹ, Ọghẹnẹ ọ ta kẹe nọ emọ riẹ e te jọ erara evaọ ẹkwotọ nọ ọ rrọ ọrai hi, ahwo na a vẹ te rehọ ai ru erigbo, a ve ti gboja kẹ ae ikpe egba ene (400).
7 Ọghẹnẹ ọ ta nọ: ‘Me ti gu orẹwho nọ a te jọ erigbo kẹ na ẹdhọ, nọ oke jọ o tẹ vrẹ no a ve ti no obei ze a vẹ te gọ omẹ evaọ oria nana.’
8 “Ọ re ọvọ oyawo kugbei re, o te ti yẹ Aiziki, ọ tẹ yawo iẹe evaọ ẹdẹ avọ eree, Aiziki o te yẹ Jekọp, Jekọp o te yẹ esẹ-erua ikpegbivẹ na.
9 Esẹ-erua na a tẹ jẹ re Josẹf ihri, a tẹ zẹe kpobọ Ijipti. Rekọ Ọghẹnẹ ọ jọ kugbei,
10 o siwi rie no ikpokpoma riẹ kpobi je ru ei wo areghẹ gbe aruoriwo evaọ aro Fẹro ovie Ijipti. Fẹro ọ tẹ rehọ iẹe mu re o su Ijipti gbe uwou riẹ soso.
11 Rekọ ohọo u te je mu evaọ Ijipti gbe Kenan soso, o jọ uye ulogbo, esẹ-ode mai a gbẹ jẹ ruẹ emu re he.
12 Rekọ Jekọp o te yo nọ emu ọ rrọ obọ Ijipti, o te vi esẹ-ode mai nya orọ ọsosuọ.
13 Nọ a zihe orọ avọ ivẹ, Josẹf o te dhesẹ oma riẹ kẹ inievo riẹ, Fẹro ọ tẹ te riẹ uviuwou Josẹf.
14 Fikiere Josẹf o te vi uwou nya inọ a rehọ Jekọp ọsẹ riẹ gbe imoni riẹ kpobi no obei ze, aikpobi a bu te udhosa gbe ikpegbisoi (75).
15 Jekọp ọ tẹ kwa kpobọ Ijipti, yọ obei ọ jọ whu, ere esẹ-ode mai re.
16 Yọ a wọ rai kpobọ Shẹkẹm, a te ki ai họ uki nọ Abraham ọ rehọ ugho isiliva dẹ mi emọ Hamọ evaọ Shẹkẹm.
17 “Nọ oke erugba ọrọ eyaa nọ Ọghẹnẹ ọ ya kẹ Abraham o be kẹle no, ahwo na a te vihọ je bu gaga evaọ Ijipti,
18 bẹsenọ ovie ọfa o ro muọ Ijipti họ esuo, ọnọ ọ riẹ Josẹf ho.
19 Ovie nana ọ rọ ẹghẹ gboja kẹ uyẹ mai jẹ gba esẹ-ode mai họ gbabọkẹ emọboba rai, re a siọ uzuazọ ba ẹjọ.
20 Evaọ oke yena a ro yẹ Mosis, yọ o wo erru gaga makọ evaọ aro Ọghẹnẹ. A yọrọ e riẹ emerae esa evaọ uwou ọsẹ riẹ.
21 Rekọ okenọ a wọe fihọ oria jọ nyaseba, ọmọtẹ Fẹro ọ tẹ wọe rehọ, ọ tẹ yọrọ iẹe wọhọ ọmọ obọriẹ.
22 Fikiere a tẹ rehọ ereghẹ Ijipti kpobi wuhrẹ Mosis. Evaọ uzẹme, eme riẹ i wo ẹgba yọ o ru ikpeware.
23 “Nọ o te ikpe udhuvẹ no, o tẹ ziọ iroro riẹ* nọ ọ rẹ nyae ruẹ inievo riẹ, emọ Izrẹl.
24 Nọ ọ ruẹ ọjọ rai nọ ohwo Ijipti jọ ọ be lahiẹ, ọ tẹ thọe, o te kpe ohwo Ijipti na, rọ ere kioja kẹ ọnọ a jẹ lahiẹ na.
25 O roro nọ inievo riẹ a ti vuhumu nọ Ọghẹnẹ ọ be rọ ẹkwoma riẹ ro siwi ai, rekọ a rehọ e riẹ ere he.
26 Okiokiọ riẹ nọ ọ nya bru ai, ọ tẹ ruẹ imava rai nọ e be họre, ọ tẹ gwọlọ ruẹrẹ ai họ, be ta nọ: ‘Ezae, whai inievo. Fikieme wha be rọ họre ohwohwo?’
27 Rekọ ọnọ ọ jẹ họre ọrivẹ riẹ na o te tunyei họ akotọ inọ: ‘Ono ọ rehọ owhẹ mu osu gbe obruoziẹ kẹ omai?
28 Kọ whọ gwọlọ omẹ kpe epanọ who kpe ohwo Ijipti na odẹnukpo na?’
29 Nọ Mosis o yo onana ọ tẹ dhẹ, o te zihe ruọ ọrara evaọ ẹkwotọ Midian, ọ tẹ jọ etẹe yẹ emezae ivẹ.
30 “Nọ ikpe udhuvẹ e vrẹ no, ukọ-odhiwu jọ ọ tẹ romavia kẹe evaọ udhude kẹle Ugbehru Sainai evaọ udevie erae nọ e jẹ ware evaọ ure inwe.
31 Nọ Mosis ọ ruẹ oware nana, u te gbei unu. Rekọ epanọ ọ be rọ nya kẹle iẹe re o rri rie ziezi na, o te yo urru Jihova:*
32 ‘Mẹ họ Ọghẹnẹ esẹ-ode ra, Ọghẹnẹ Abraham gbe Aiziki gbe Jekọp.’ Mosis o te je nuhu, o gbe yiwi rri rie viere he.
33 Jihova* ọ tẹ ta kẹe nọ: ‘Ba eviẹ ra no awọ keme oria nọ who dikihẹ na yọ otọ ọrẹri.
34 Mẹ ruẹ okienyẹ ọrọ ahwo mẹ nọ a rrọ obọ Ijipti no, me te je yo imẹ-idio rai no, yọ mẹ nyaze no re me siwi ai. Nyaze, me ti vi owhẹ kpobọ Ijipti.’
35 Mosis ọvona nọ a vro, nọ a kpahe ẹme kẹ inọ: ‘Ono ọ rehọ owhẹ mu osu gbe obruoziẹ?’ ọye Ọghẹnẹ ọ rehọ ẹkwoma ukọ-odhiwu nọ ọ romavia kẹe evaọ ure inwe na vi re ọ jọ osu gbe osiwi.
36 Ọzae nana o su rai no Ijipti, avọ eware igbunu gbe eware eka nọ o ru evaọ Ijipti gbe evaọ Abade Ọwawae na gbe evaọ udhude na evaọ ikpe udhuvẹ.
37 “Mosis nana họ ọnọ ọ ta kẹ emọ Izrẹl nọ: ‘Ọghẹnẹ ọ te jọ udevie inievo rai rọ ọruẹaro nọ ọ wọhọ omẹ ro mu.’
38 Ọnana họ ọnọ ọ jọ udevie emọ Izrẹl evaọ udhude na, ọ jọ kugbe ukọ-odhiwu nọ ọ ta ẹme kẹe evaọ Ugbehru Sainai na gbe esẹ-ode mai, yọ Ọghẹnẹ ọ kẹ riẹ evuẹ nọ e rẹ jọ ribri inọ ọ kẹ omai.
39 Esẹ-ode mai a rọwo yoẹme kẹe he, rekọ a tunye i rie họ akotọ, a tẹ jọ udu rai kuomarẹriẹ zihe kpobọ Ijipti,
40 be ta kẹ Erọn nọ: ‘Ma eghẹnẹ kẹ omai nọ e rẹ karo kẹ omai. Keme ma riẹ oware nọ o via kẹ Mosis nana no ho, ọnọ o su omai no otọ Ijipti ze.’
41 Fikiere a tẹ ma ọmọ-eruẹ evaọ edẹ yena, a te bi dhe idhe kẹ ẹmẹdhọ na je muhọ ẹghọghọ bi ru ehaa fiki oware nọ a rehọ abọ rai ru na.
42 Fikiere Ọghẹnẹ ọ tẹ nyase ae ba re a gọ ọre, ọvẹre gbe isi obọ ehru, wọhọ epanọ a kere fihọ obe Eruẹaro na nọ: ‘Orọnikọ mẹ wha jẹ rọ erao gbe eware efa ro dhe idhe kẹ ikpe udhuvẹ evaọ udhude na ha, manikọ ere, O uwou Izrẹl?
43 Rekọ uwou ẹdhọ Molọk gbe esi ọrọ ẹdhọ Refan eye wha wọ, emema nọ wha ma nọ wha jẹ gọ. Fikiere me ti vi owhai kpohọ igbo evaọ oria nọ u thabọ vi Babilọn.’
44 “Esẹ-ode mai a jọ udhude na wo uwou-udhu egagọ na nọ o jọ isẹri, wọhọ epanọ Ọghẹnẹ o dhesẹ okenọ ọ jẹ ta kẹ Mosis re ọ bọe wọhọ epaọ onọ ọ ruẹ na.
45 A nyase iẹe ba kẹ esẹ-ode mai, yọ a wọ riẹ lele oma okenọ a lele Joshua ruọ ẹkwotọ nọ erẹwho na a jọ, enọ Ọghẹnẹ o le no kẹ esẹ-ode mai. Etenẹ o jọ ri bọo edẹ Devidi.
46 O wo aruoriwo evaọ aro Ọghẹnẹ, ọ tẹ yare nọ ọ kẹe uvẹ re ọ bọ uwou kẹ Ọghẹnẹ Jekọp.
47 Rekọ Solomọn họ ọnọ ọ bọ uwou kẹe.
48 Rekọ, Ọnọ Ọ Mai Kpehru na ọ rẹ rria iwou nọ a rọ abọ bọ họ, wọhọ epanọ ọruẹaro na ọ ta inọ:
49 ‘Odhiwu họ agbara-uvie mẹ, otọakpọ na kọ oria nọ mẹ rẹ rọ awọ mẹ kpahe. Oghẹrẹ uwou vẹ wha rẹ sae bọ kẹ omẹ? ere Jihova* ọ ta. Hayo kọ diẹse họ oria nọ mẹ rẹ sae rria?
50 Kọ ogbẹrọnọ obọ mẹ u ru eware nana kpobi?’
51 “Whai etakoruhọ, nọ i wo udu ogaga, nọ ẹme ọ rẹ ruọ ezọ họ, wha be wọso ẹzi ọfuafo na ẹsikpobi; wọhọ epanọ esẹ-ode rai a ru, ere wha bi ru.
52 Ọvẹ evaọ usu eruẹaro na esẹ-ode rai a kpokpo ho? Ẹhẹ, a kpe enọ i whowho ẹnyaze ọnọ o kiẹrẹe na kpahotọ, ọnọ wha vivie je kpe na,
53 whai enọ a kẹ Uzi na, onọ a rọ ẹkwoma ukọ-odhiwu kpeze ze, rekọ wha koko i rie he.”
54 Nọ a yo eme nana eva e tẹ dha ae thesiwa evaọ udu rai, a te mu akọ họ ẹre be ta eme kẹe avọ ofu.
55 Rekọ avọ ẹzi ọfuafo nọ ọ vọ riẹ oma, o te rri kpobọ odhiwu, ọ tẹ ruẹ oruaro Ọghẹnẹ gbe Jesu nọ o dikihẹ obọze Ọghẹnẹ,
56 ọ tẹ ta nọ: “Rri! Mẹ ruẹ idhiwu na nọ i rovie gbe Ọmọ ohwo nọ o dikihẹ obọze Ọghẹnẹ.”
57 Nọ a yo onana a te bo avọ urru oruarua a tẹ rọ abọ di ezọ rai, aikpobi a tẹ họrọ mu ei ẹsiẹvo.
58 Nọ a si rie ruọ otafe okpẹwho na no, a tẹ be rọ itho fi ei. Enọ i se isẹri kpei na a tẹ ba iwu ehru rai no fihọ aro ọmoha jọ nọ a re se Sọl.
59 Epanọ a jẹ rọ rehọ itho fi Stivin na, ọ tẹ yare nọ: “Jesu Olori, mẹ rehọ uzuazọ* mẹ họ owhẹ obọ.”
60 Kẹsena, nọ o kigwẹ, ọ tẹ rọ urru oruarua bo via nọ: “Jihova,* who kele uzioraha nana rọ kẹ ae he.” Nọ ọ ta onana no o te whu.*
Eme-Obotọ
^ Hayo “ọ tẹ jiroro.”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Hayo “ẹzi.”
^ Rri oria Otofa Eme.
^ Evaọ Griki, “kie ruọ owezẹ uwhu.”
