Iruẹru 8:1-40
8 Whaọ Sọl ọ rọwo fihọ ekpe Stivin.
Evaọ ẹdẹ ọyena, ukpokpoma ulogbo u te te ukoko nọ o jọ Jerusalẹm; ilele na kpobi a tẹ vahabọ ruọ ubrotọ Judia gbe Sameria soso, ajokpaọ ikọ na.
2 Rekọ ezae nọ e rrọ egba-egagọ a tẹ wọ Stivin nyai ki, inievo na a te weri gaga fiki riẹ.
3 Rekọ Sọl o te je gboja kẹ ukoko na. Ọ jẹ vẹ ruọ iwou rai unọjọ utọjọ, je si te ezae te eyae ruọ otafe, ọ vẹ nyai fi ai họ uwou-odi.
4 Rekọ enọ e vahabọ na a ruọ ẹkwotọ na soso, a te je whowho usi uwoma ẹme Ọghẹnẹ.
5 Whaọ Filip o kpobọ okpẹwho Sameria,* o te mu ae họ ẹta kẹ kpahe Kristi.
6 Ogbotu ahwo na kpobi a romatotọ jẹ kezọ kẹ eme nọ Filip ọ jẹ ta, yọ a be ruẹ eware eka nọ o bi ru.
7 Keme ibuobu rai a wo izi igbegbe, nọ izi igbegbe na i te bo gaga no, i ve no ai oma ze. Ofariẹ, o siwi ibuobu nọ okie o kie gbe emo.
8 Fikiere oghọghọ ulogbo o tẹ jọ okpẹwho yena.
9 Whaọ ọzae jọ ọ jọ okpẹwho na nọ a re se Saemọn, ọnọ ọ be hai ru iruẹru emajiki nọ i bi gbe ahwo Sameria soso unu, bi dhesẹ oma nọ ọyomariẹ yọ ohwo ologbo.
10 Aikpobi, te emaha te ekpako, a jẹ hae gaviezọ kẹe jẹ ta nọ: “Ọzae nana họ Ogaga Ọghẹnẹ, onọ a re se Ulogbo.”
11 Fikiere a jẹ hae gaviezọ kẹe keme u dina kri no nọ ọ be hae rọ rehọ iruẹru emajiki riẹ ru akpọ gbe ai unu.
12 Rekọ nọ a rọwo eme Filip, ọnọ o je whowho usi uwoma kpahe Uvie Ọghẹnẹ gbe odẹ Jesu Kristi, te ezae te eyae a tẹ jẹ họ-ame.
13 Saemọn omariẹ o kurẹriẹ re, nọ ọ họ-ame no ọ tẹ jẹ jọ kugbe Filip ẹsikpobi; eware eka gbe iruo igbunu nọ Filip o je ru i gbe rie unu.
14 Nọ ikọ na evaọ obọ Jerusalẹm a yo nọ ahwo Sameria a jẹ ẹme Ọghẹnẹ rehọ no, a te vi Pita avọ Jọn re a nya bru ai;
15 a tẹ nya a tẹ lẹ kẹ ae re ẹzi ọfuafo na o te ae obọ.
16 Keme ẹzi na o ri te ae ọvuọvo obọ họ, rekọ odẹ Olori na Jesu ọvo a rọ họ ae ame no.
17 A tẹ rehọ abọ kpahe ae uzou, ẹzi ọfuafo na o te mu ae obọ họ ete.
18 Nọ Saemọn ọ ruẹ nọ ẹzi na o bi te ahwo obọ ẹkwoma abọ nọ ikọ na a be rọ kpahe ae uzou, ọ tẹ be rehọ ugho kẹ ikọ na,
19 inọ: “Wha kẹ omẹ udu nana re, re ohwo kpobi nọ mẹ rọ abọ mẹ kpahe ọ sai wo ẹzi ọfuafo.”
20 Rekọ Pita ọ tẹ ta kẹe nọ: “Jọ isiliva ra e raha ku owhẹ abọ, keme who roro nọ whọ sae rọ ugho dẹ okẹ ọvọvẹ Ọghẹnẹ.
21 Who wo abọ hayo ẹkẹ ọvo evaọ iruo nana ha, keme udu ra o fo evaọ aro Ọghẹnẹ hẹ.
22 Fikiere kurẹriẹ no eyoma ra nana, re whọ yare Jihova,* o tẹ ruọ iẹe, ọ te rehọ iroro imuomu nọ e rrọ udu ra na rọvrẹ owhẹ;
23 keme mẹ ruẹ nọ whẹ yọ enua ọyayare* gbe ọrigbo emuemu.”
24 Saemọn ọ tẹ ta kẹ ae nọ: “Ivie, wha lẹ Jihova* kẹ omẹ re eware nọ wha ta na ọvuọvo e siọ omẹ ba ẹvia kẹ.”
25 Fikiere, nọ a romatotọ se isẹri jẹ ta ẹme Jihova* kẹ ae no, a tẹ ruọ edhere bi zihe kpohọ Jerusalẹm, bi whowho usi uwoma na evaọ iwhre ahwo Sameria buobu.
26 Rekọ ukọ-odhiwu Jihova* ọ tẹ ta kẹ Filip nọ: “Kpama re who kpohọ ofẹ obọze ovatha-ọre, kpohọ edhere nọ o no Jerusalẹm kpobọ Gaza na.” (Edhere nana ọ nya udhude vrẹ.)
27 Ọ tẹ kpama ọ tẹ nya, ọ tẹ ruẹ ọwharọ Ẹtiopia jọ, ọzae nọ o wo ọkwa ologbo evaọ otọ Kandase ovie-aye ahwo Ẹtiopia, ọye ọ jẹ rẹrote efe riẹ kpobi. Ọzae na o kpohọ Jerusalẹm nyae gọ,
28 o je zihe kpo yọ ọ keria akẹkẹ riẹ bi se obe Aizaya ọruẹaro na do via.
29 Ẹzi na ọ tẹ ta kẹ Filip nọ: “Nya re who bikẹle akẹkẹ nana.”
30 Filip ọ tẹ dhẹ tei oma, o te yo ọzae na nọ o bi se obe Aizaya ọruẹaro na do via, ọ tẹ nọe nọ: “Kọ whọ ginẹ riẹ otọ eme nọ who bi se na?”
31 Ọ tẹ ta nọ: “Kọ ẹvẹ mẹ sae rọ riẹ otọ rai ajokpanọ ohwo jọ o fiobọhọ kẹ omẹ?” Ọ tẹ yare Filip nọ ọ ruọ akẹkẹ na re ọ keria gbae.
32 Whaọ oria Ikereakere nọ o je se do via na ona: “A rehọ e riẹ ze wọhọ ogodẹ nọ a be nyai kpe, jẹ wọhọ omogodẹ nọ o bi bo ho evaọ aro enọ i bi bru eto riẹ, fikiere o rovie unu riẹ hẹ.
33 Okenọ a je kpomovuọ họ iẹe oma, a bruoziẹ kẹe he. Kọ ono ọ te sae riẹ iku oge riẹ gbe? Keme a kpe rie no otọakpọ na no.”
34 Ọwharọ na ọ tẹ ta kẹ Filip nọ: “Mẹ lẹ owhẹ, ono ọruẹaro na ọ be ta onana kpahe? Omobọ riẹ manikọ omọfa jọ?”
35 Filip o te mu ẹme họ, ọ tẹ rọ oria ikereakere nana muhọ, o te whowho usi uwoma kpahe Jesu kẹe.
36 Epanọ a rọ rrọ edhere be dhẹ vrẹ na, a te te ẹtẹre-ame jọ, ọwharọ na ọ tẹ ta nọ: “Rri! Ame ọ rrọ etenẹ; eme ọ rẹ whaha omẹ ame-ọhọ?”
37 ——
38 Ọ tẹ ta nọ akẹkẹ na ọ daji, Filip avọ ọwharọ na a tẹ ruọ ame na, ọ tẹ họe ame.
39 Nọ a no evaọ ame na ze, ẹzi Jihova* ọ tẹ nwani su Filip vrẹ, ọwharọ na ọ gbẹ ruẹ e riẹ ofa ha, ọ tẹ ruabọhọ erẹ riẹ be ghọghọ.
40 Rekọ Filip ọ tẹ ruẹ omariẹ evaọ Ashdọd, ọ tẹ nya ẹkwotọ na vrẹ bi whowho usi uwoma na evaọ ewho na kpobi bẹsenọ o ro te Sisaria.
Eme-Obotọ
^ Hayo o sae jọ nọ, “okpẹwho Sameria jọ.”
^ Rri oria Otofa Eme.
^ Hayo “ẹvẹvẹ.”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
