Jọn 1:1-51
1 Ẹme na ọ jọ evaọ emuhọ, Ẹme na ọ jọ kugbe Ọghẹnẹ, yọ Ẹme na ọ jọ ọghẹnẹ.*
2 Ọnana ọ jọ kugbe Ọghẹnẹ evaọ emuhọ.
3 Ọye Ọghẹnẹ ọ rọ ma eware kpobi, yọ uvumọ oware o ziọ uzuazọ ababọ riẹ hẹ.
4 Ẹkwoma riẹ uzuazọ o rọ rrọ, yọ uzuazọ riẹ họ elo kẹ ahwo.
5 Elo na o bi lo evaọ ebi, rekọ ebi na o ruru rie he.
6 Ọzae jọ ọ jariẹ, ọnọ Ọghẹnẹ o vi ze; odẹ riẹ Jọn.
7 Ọzae nana ọ nyaze wọhọ osẹri, re ọ ruẹsi se isẹri kpahe elo na, re oghẹrẹ ahwo kpobi a rọ ẹkwoma eme riẹ rọwo elo na.
8 Ọye ọ jọ elo na ha, rekọ ọ nyaze ti se isẹri kpahe elo na.
9 Evaọ oke yena, yọ uvi elo nọ ọ rẹ rehọ elo kẹ oghẹrẹ ahwo kpobi ọ be te ziọ akpọ na.
10 Ọ jọ evaọ akpọ na, yọ ọye Ọghẹnẹ ọ rọ ma akpọ na, rekọ akpọ na ọ riẹ riẹ hẹ.
11 Ọ ziọ uwou obọriẹ, rekọ ahwo obọriẹ a jẹ riẹ rehọ họ.
12 Rekọ, ọ kẹ ahwo kpobi nọ a dede i rie rehọ udu nọ a rẹ rọ jọ emọ Ọghẹnẹ, fikinọ a fi ẹrọwọ họ odẹ riẹ.
13 Yọ orọnikọ ẹkwoma ahwo-akpọ hayo oreva ohwo jọ a ro yẹ ai wọhọ emọ riẹ hẹ, rekọ obọ Ọghẹnẹ u no ze.
14 Fikiere Ẹme na o zihe ruọ ohwo jẹ rria evaọ udevie mai, yọ ma ruẹ oruaro riẹ, oghẹrẹ oruaro nọ ọsẹ ọ rẹ kẹ ọmọ ọvo nọ o wo; ọ vọ avọ uwowou ulogbo Ọghẹnẹ, yọ ọ ta uzẹme ẹsikpobi.
15 (Jọn o se isẹri kpahe iẹe, ẹhẹ, ọ ta nọ: “Ọnana họ ọnọ mẹ ta kpahe na inọ, ‘Ọnọ ọ rrọ emu mẹ nyaze na o kparo vi omẹ no keme ọ kake rọ omẹ ziọ uzuazọ.’”)
16 O dhesẹ uwowou ulogbo kẹ omai kpobi keme uwowou ulogbo o da riẹ oma fia.
17 Keme ẹkwoma Mosis a rọ kẹ Uzi na, rekọ ẹkwoma Jesu Kristi ma ro wuhrẹ kpahe uwowou ulogbo gbe uzẹme na.
18 Ohwo ọvo ọ re ruẹ Ọghẹnẹ evaọ oke ovo ho; ọmọ ọvo nọ ọ wọhọ Ọghẹnẹ,* ọnọ ọ rrọ abotọ* Ọsẹ na họ ọnọ o dhesẹ oghẹrẹ nọ ọ rrọ kẹ omai.
19 Onana họ isẹri nọ Jọn o se okenọ ahwo Ju a vi izerẹ gbe otu Livai no obọ Jerusalẹm ze te nọe nọ: “Whẹ yọ ono?”
20 Ọ tẹ kẹ ae uyo gbagba nọ: “Mẹ họ Kristi na ha.”
21 A tẹ nọe nọ: “Kọ whẹ yọ ono? Whẹ yọ Elaeja?” Ọ tẹ kuyo nọ: “Ijo.” “Kọ whẹ họ ọruẹaro nọ ọ be tha na?” Ọ tẹ kuyo nọ: “Ijo!”
22 Fikiere a tẹ nọe nọ: “Whẹ yọ ono? Ta kẹ omai re ma sae ruẹ uyo kẹ enọ i vi omai ze. Eme whọ be ta kpahe omara?”
23 Ọ tẹ ta nọ: “Mẹ yọ uvou ohwo jọ nọ o bi se evaọ obọ udhude, ‘Wha ru edhere Jihova* liọ,’ wọhọ epanọ Aizaya ọruẹaro na ọ ta.”
24 Whaọ otu Farisi na họ enọ i vi ahwo nana ze.
25 Fikiere a tẹ nọe nọ: “Kọ fikieme whọ be rọ họ ahwo ame otẹrọnọ whẹ họ Kristi hayo Elaeja hayo ọruẹaro nọ ọ be tha na ha?”
26 Jọn ọ tẹ kẹ ae uyo nọ: “Ame mẹ be rọ họ owhai ame. Ohwo jọ ọ rrọ udevie rai na nọ wha riẹ hẹ,
27 ọnọ ọ rrọ emu mẹ nyaze, me te epanọ mẹ sae rọ ra ifi eviẹ riẹ hẹ.”
28 Eware nana e via evaọ Bẹtani, abọdekọ Jọdan, oria nọ Jọn ọ jọ jẹ họ ahwo ame.
29 Okiokiọ riẹ ọ tẹ ruẹ Jesu nọ ọ be nya bru rie ze, ọ tẹ ta nọ: “Rri Omogodẹ Ọghẹnẹ ọnọ ọ be wha izieraha akpọ na vrẹ!
30 Ọnana mẹ ta kpahe na inọ: Ọzae jọ ọ rrọ emu mẹ nyaze ọnọ o kparo vi omẹ no, keme ọ kake rọ omẹ ziọ uzuazọ.
31 Makọ omẹ, mẹ riẹ riẹ hẹ, rekọ ẹjiroro nọ mẹ rọ nyaze be rọ ame họ ahwo ame họ re ọ ruẹsi dhesẹ oma via kẹ Izrẹl.”
32 Jọn o te je se isẹri inọ: “Mẹ ruẹ ẹzi na nọ o bi no obọ odhiwu ze wọhọ erueruẹ, o te kiemu uzou riẹ.
33 Makọ omẹ, mẹ riẹ riẹ hẹ, rekọ Ọnọ o vi omẹ inọ mẹ rọ ame họ ahwo ame ọ ta kẹ omẹ nọ: ‘Ohwo kpobi nọ whọ ruẹ nọ ẹzi na o bi no ehru bru ze ọ jẹ daji ei, ọye họ ọnọ ọ te rọ ẹzi ọfuafo họ ahwo ame na.’
34 Mẹ ruẹ onana no, yọ me se isẹri no inọ ọnana họ Ọmọ Ọghẹnẹ.”
35 Evaọ okiokiọ riẹ re, Jọn avọ ilele ivẹ riẹ a dikihẹ,
36 epanọ o bi ro rri Jesu nọ ọ be nyavrẹ na, ọ tẹ ta nọ: “Rri Omogodẹ Ọghẹnẹ!”
37 Nọ ilele ivẹ na a yo ẹme nana nọ ọ ta na, a te lele Jesu.
38 Kẹsena Jesu o te kuomarẹriẹ, nọ ọ ruẹ e rai nọ a bi lele iei ọ tẹ nọ ae nọ: “Eme wha be gwọlọ?” A tẹ ta kẹe nọ: “Rabae (onọ otofa riẹ o rrọ “Owuhrẹ”), diẹse whọ be rria?”
39 Ọ tẹ ta kẹ ae nọ: “Wha nyaze, wha te ruẹ.” Fikiere a tẹ nya a tẹ ruẹ oria nọ ọ be rria, a tẹ jọ kugbei evaọ ẹdẹ ọyena; o jọ oware wọhọ auwa avọ ikpe.*
40 Andru oniọvo Saemọn Pita ọ jọ omọvo imava nọ i yo ẹme nọ Jọn ọ ta na nọ i lele Jesu.
41 Oniọvo riẹ nọ a re se Saemọn ọ kake ruẹ, ọ tẹ ta kẹe nọ: “Ma ruẹ Mesaya na no” (onọ otofa riẹ o rrọ, “Kristi”),
42 o te su ei bru Jesu. Nọ Jesu o rri rie ọ tẹ ta nọ: “Whẹ họ Saemọn, ọmọ Jọn; a re ti se owhẹ Sifas” (onọ a re je se “Pita”).
43 Okiokiọ riẹ Jesu ọ tẹ jẹ gwọlọ kpohọ Galili. Ọ tẹ ruẹ Filip, ọ tẹ ta kẹe nọ: “Jọ olele mẹ.”
44 Whaọ Filip yọ ohwo Bẹtsaida, tei te Andru avọ Pita a no ẹwho ọvona ze.
45 Filip ọ tẹ ruẹ Nataniẹl ọ tẹ ta kẹe nọ: “Ma ruẹ ọnọ Mosis o kere kpahe evaọ Uzi na gbe ọnọ Eruẹaro na a kere kpahe na no: Jesu, ọmọ Josẹf, ohwo Nazarẹt.”
46 Rekọ Nataniẹl ọ tẹ nọe nọ: “Kọ oware uwoma jọ o sai no Nazarẹt ze?” Filip ọ tẹ ta kẹe nọ: “Nyaze re whọ ruẹ.”
47 Nọ Jesu ọ ruẹ Nataniẹl nọ ọ be nya bru rie ze, ọ tẹ ta kpahe iẹe nọ: “Rri, ohwo Izrẹl dẹẹ ọnọ eviẹhọ e rrọ oma ha.”
48 Nataniẹl ọ tẹ nọe nọ: “Ẹvẹ whọ rọ riẹ omẹ?” Jesu ọ tẹ kẹe uyo nọ: “Taure Filip o te ti se owhẹ, nọ whọ jọ otọ ure ifigi na, mẹ ruẹ owhẹ.”
49 Nataniẹl ọ tẹ ta kẹe nọ: “Owuhrẹ, whẹ họ Ọmọ Ọghẹnẹ, whẹ họ Ovie Izrẹl.”
50 Jesu ọ tẹ kpahe kẹe nọ: “Fikinọ mẹ ta kẹ owhẹ nọ mẹ ruẹ owhẹ evaọ otọ ure ifigi na whọ rọ rọwo? Whọ te ruẹ eware nọ e rro vi enana.”
51 Kẹsena ọ tẹ ta kẹe nọ: “Uzẹme mẹ be ta kẹ owhai, wha te ruẹ odhiwu nọ o rovie gbe ikọ-odhiwu Ọghẹnẹ nọ i bi bru Ọmọ ohwo ze je zihe.”
Eme-Obotọ
^ Hayo “ọnọ ọ wọhọ Ọghẹnẹ.”
^ Evaọ Griki, “ọghẹnẹ ọvo nọ a ma.”
^ Hayo “evaọ igbama Ọsẹ na.” Onana u dhesẹ usu okpekpe.
^ Rri oria Otofa Eme.
^ Koyehọ, oware wọhọ ighọjọ ene owọwọ.
