Jọn 10:1-42
10 “Uzẹme uzẹme mẹ be ta kẹ owhai, ọnọ ọ rehọ unuẹthẹ ruọ uwou-igodẹ na ha, rekọ ọ tẹ gadiẹ oria ofa jọ ruọ eva, ọyena yọ oji gbe owhewheriwhe.
2 Rekọ ọnọ ọ rọ unuẹthẹ na ruọ eva ọye họ othuru-igodẹ na.
3 Oriẹthẹ na o re rovie kẹ ọnana, yọ igodẹ na e rẹ kezọ kẹ urru riẹ. O re se igodẹ riẹ odẹ o ve su ae vrẹ.
4 Nọ ọ tẹ rọ igodẹ riẹ kpobi ruọ otafe no, ọ vẹ karo kẹ ae, igodẹ na i ve lele iei keme a riẹ urru riẹ.
5 A re lele ọrara vievie he rekọ a rẹ dhẹ se iẹe ba, keme a riẹ urru erara ha.”
6 Jesu ọ rehọ ọtadhesẹ nana ta ẹme kẹ ae, rekọ a wo otoriẹ ẹme nọ ọ jẹ ta kẹ ae na ha.
7 Fikiere Jesu ọ tẹ wariẹ ta nọ: “Uzẹme uzẹme mẹ be ta kẹ owhai, mẹ họ unuẹthẹ nọ igodẹ na e rẹ rọ ruọ eva.
8 Enọ e nyaze be ta nọ ae omarai họ omẹ yọ iji gbe iwhewheriwhe; rekọ igodẹ na e gaviezọ kẹ ae he.
9 Mẹ họ unuẹthẹ na; ohwo kpobi nọ ọ rọ ẹkwoma mẹ ruọ eva a ti siwi ei, yọ ohwo yena ọ te sae ruọ eva jẹ ruọ otafe jẹ ruẹ ẹbe nọ ọ rẹ re.
10 Oji ọ rẹ nyaze he ajokpaọ re o tho, kpe jẹ raha. Mẹ nyaze re a ruẹsi wo uzuazọ re a je woi vọvọ.
11 Mẹ họ emamọ othuru-igodẹ na; emamọ othuru-igodẹ na o re siobọno uzuazọ riẹ fiki igodẹ na.
12 Ohwo nọ a rehọ iruo, nọ ọ rrọ othuru-igodẹ hẹ, ọ gbẹ jẹ rrọ ọnọ o wo igodẹ na ha, ọ rẹ dhẹ siọ igodẹ na ba nọ ọ tẹ ruẹ ojera nọ ọ be nyaze—ojera na o ve mu ae je le ae vahabọ—
13 keme iruo a rehọ e riẹ yọ ọ rẹ daezọ igodẹ na ha.
14 Mẹ họ emamọ othuru-igodẹ na. Mẹ riẹ igodẹ mẹ yọ igodẹ mẹ e riẹ omẹ,
15 wọhọ epanọ Ọsẹ na ọ riẹ omẹ mẹ tẹ jẹ riẹ Ọsẹ na; yọ me ti siobọno uzuazọ mẹ fiki igodẹ na.
16 “Yọ me wo igodẹ efa, enọ e rrọ uthuru nana ha; mẹ te rehọ eyena ze hrọ re, yọ a te gaviezọ kẹ urru mẹ, a vẹ te jọ uthuru ọvo, evaọ otọ othuru-igodẹ ọvo.
17 Oyejabọ nọ Ọsẹ na o ro you omẹ, keme me bi siobọno uzuazọ mẹ, re mẹ ruẹse wariẹ woi tobọ.
18 Orọnikọ ohwo jọ ọ rehọ e riẹ mi omẹ hẹ, rekọ mẹ ọvo o bi siobọnoi. Me wo udu nọ me re ro siobọnoi, yọ me wo udu nọ mẹ rẹ rọ wariẹ woi tobọ. Obọ Ọsẹ mẹ me wo ujaje nana no ze.”
19 Ohẹriẹ o tẹ wariẹ ruọ udevie ahwo Ju na fiki eme nana.
20 Ibuobu rai a jẹ ta nọ: “Idhivẹri ọ riẹe oma yọ uzou riẹ o gbẹ gba ha. Fikieme wha be rọ gaviezọ kẹe?”
21 Efa e ta nọ: “Ohwo nọ idhivẹri ọ rrọ oma ọ rẹ ta eme itiena ha. Kọ idhivẹri ọ rẹ sai rovie ibiaro ohwo nọ o tuaro?”
22 Evaọ oke yena a je ru Ehaa Eromudhe evaọ Jerusalẹm. O jọ oke uriri,
23 yọ Jesu ọ jẹ nya evaọ etẹmpol na evaọ ogebara* Solomọn.
24 Kẹsena ahwo Ju na a tẹ wariẹ iẹe họ a te mu ei họ ẹta kẹ nọ: “Ẹvẹ whọ rẹ rọ omai hẹrẹ kri te re whọ tẹ ta uzẹme na kẹ omai? Otẹrọnọ whẹ họ Kristi na, ta kẹ omai vevẹ.”
25 Jesu ọ tẹ kẹ ae uyo nọ: “Mẹ ta kẹ owhai no, rekọ wha rọwo ho. Iruo nọ mẹ be rọ odẹ Ọsẹ mẹ ru, enana i bi se isẹri kpahe omẹ.
26 Rekọ wha be rọwo ho, keme wha rrọ igodẹ mẹ hẹ.
27 Igodẹ mẹ e rẹ gaviezọ kẹ urru mẹ, mẹ riẹ rai, yọ a re lele omẹ.
28 Mẹ rẹ kẹ ae uzuazọ ebẹdẹ bẹdẹ, yọ a te raha ae vievie he, yọ ohwo ọvo o ti vo ae rehọ no obọ mẹ hẹ.
29 Enọ Ọsẹ mẹ ọ kẹ omẹ na e ghare vi eware efa kpobi, yọ ohwo ọvo ọ rẹ sai vo ai rehọ no obọ Ọsẹ na ha.
30 Mẹ avọ Ọsẹ na ọvo.”*
31 Ahwo Ju na a tẹ wariẹ tọlọ itho re a ro fi ei.
32 Jesu ọ tẹ ta kẹ ae nọ: “Mẹ jọ iraro rai ru iruo iwoma buobu nọ Ọsẹ na o vi omẹ ze ti ru. Ovẹ evaọ iruo nana wha be rọ fiki riẹ gwọlọ rọ itho fi omẹ na?”
33 Ahwo Ju na a tẹ kẹe uyo nọ: “Orọnikọ fiki iruo iwoma jọ ma be rọ gwọlọ rehọ itho fi owhẹ hẹ, rekọ fiki eme-aghọ ra; keme who bi ru omara họ ọghẹnẹ, dede nọ whẹ yọ ohwo-akpọ gheghe.”
34 Jesu ọ tẹ kpahe kẹ ae nọ: “Kọ a gbe kere fihọ Uzi rai inọ, ‘Mẹ ta nọ: “Whai yọ eghẹnẹ”’?*
35 Otẹrọnọ o se enọ ẹme Ọghẹnẹ o brukpe ‘eghẹnẹ,’ ghele na oyena o raha ikereakere na ha—
36 kọ wha be ta kẹ omẹ ọnọ Ọsẹ na o ru fuafo je vi ze akpọ na inọ, ‘Whọ ta eme-aghọ,’ fikinọ mẹ ta nọ, ‘Mẹ yọ Ọmọ Ọghẹnẹ’?
37 Otẹrọnọ me bi ru iruo Ọsẹ mẹ hẹ, wha fi ẹrọwọ họ omẹ hẹ.
38 Rekọ otẹrọnọ me bi ru ai, wha gbẹ make rọwo omẹ hẹ, wha rọwo iruo na, re wha ruẹse riẹ jẹ riẹ ẹsikpobi inọ Ọsẹ na ọ rrọ usu kugbe omẹ yọ mẹ rrọ usu kugbe Ọsẹ na.”
39 Fikiere a tẹ wariẹ gwọlọ nọ a re kru rie, rekọ ọ tẹ vabọ.
40 Ọ tẹ wariẹ fa vrẹ kpohọ abọdekọ Jọdan oria nọ Jọn ọ jẹ jọ họ ahwo ame evaọ oke ọsosuọ, ọ tẹ jọ etẹe.
41 Ahwo buobu a tẹ nya bru rie ze, a te muhọ ẹta nọ: “Jọn o ru iruo igbunu ọvuọvo ho, rekọ eware kpobi nọ Jọn ọ ta kpahe ọzae nana uzẹme.”
42 Ahwo buobu a te fi ẹrọwọ họ iẹe evaọ etẹe.
