Jọn 12:1-50
12 Edẹ ezeza taure Ehaa Ọnyavrẹ na o te ti te, Jesu o te te Bẹtani, ẹwho Lazarọs ọnọ Jesu ọ kpare no uwhu ze na.
2 Fikiere a tẹ jọ etẹe se ẹkeriotọ emuọriọ fiki riẹ evaọ owọwọ, yọ Mata ọ jẹ gbodibo kẹ ae, rekọ Lazarọs ọ jọ omọvo enọ i je lele iei re emu na.
3 Kẹsena Meri ọ tẹ rehọ udẹ nọ u re gbo ore awere, uvi nard, nọ o ghare gaga, nọ u te ubro ilita, o te ku ei họ awọ Jesu, ọ tẹ rọ eto riẹ ro ririe awọ na. Ore udẹ na o tẹ da uwou na soso fia.
4 Rekọ Judas Iskariọt, omọvo ilele riẹ, ọnọ o bi ti vivie iei, ọ tẹ ta nọ:
5 “Fikieme a gbẹ rọ zẹ udẹ nana dinariọs* egba esa ha re a rehọ igho na kẹ iyogbere?”
6 Ọ ta onana, orọnọ fiki epanọ o je roro kẹ iyogbere he, rekọ fikinọ ọ jọ oji yọ ọye o je kru ẹkpẹti ugho na yọ ọ jẹ hai tho igho nọ a fihọ iẹe.
7 Kẹsena Jesu ọ tẹ ta nọ: “Wha vu ei wa, re o ru onana rọ ruẹrẹ omẹ kpahe kẹ ẹdẹ ukio mẹ.
8 Keme iyogbere na e rrọ kugbe owhai ẹsikpobi, rekọ mẹ te jọ kugbe owhai ẹsikpobi hi.”
9 Ogbotu ahwo Ju buobu a tẹ te riẹ nọ ọ rrọ etẹe, a tẹ nyaze, orọnikọ fiki Jesu ọvo ho rekọ re a jẹ ruẹ Lazarọs, ọnọ ọ kpare no uwhu ze na.
10 Ilori izerẹ na a tẹ gba ẹgwae inọ a re kpe Lazarọs re,
11 nọ orọnọ fiki riẹ ibuobu ahwo Ju na a je ro kpohọ etẹe je bi fi ẹrọwọ họ Jesu.
12 Okiokiọ riẹ, ogbotu ahwo buobu nọ a nyaze ehaa na a te yo nọ Jesu ọ be nyaze Jerusalẹm.
13 Fikiere a tẹ rehọ eya-iriẹ a tẹ nyai zere iei, a te muhọ ebo nọ: “Ma lẹ nọ, siwi ei! Oghale u te ọnọ ọ be rọ odẹ Jihova* nyaze, Ovie Izrẹl!”
14 Nọ Jesu ọ ruẹ ọmọ eketekete, ọ tẹ keria ehru riẹ, wọhọ epanọ a kere nọ:
15 “Ozọ u mu owhẹ hẹ, ọmọtẹ Zayọn. Rri! Ovie ra ọ be nyaze, ọ keria ehru ọmọ eketekete.”
16 Ilele riẹ a wo otoriẹ eware nana evaọ ọsosuọ họ, rekọ nọ a kẹ Jesu oruaro no, a tẹ kareghẹhọ nọ a kere eware nana kpahe iẹe gbe inọ a ru eware nana kẹe.
17 Whaọ ogbotu nọ a jọ kugbei okenọ ọ kpare Lazarọs no uki* ze na a je se isẹri oware nọ a rọ ẹro ruẹ na.
18 Onana o wha riẹ ze re nọ ogbotu na a rọ nyai zere iei na, keme a yo nọ o ru oware igbunu nana.
19 Fikiere otu Farisi na a tẹ be ta kẹ ohwohwo nọ: “Wha ruẹ inọ u re kẹ owhai no. Rri! Akpọ na kpobi ọ dhẹ lele iei no.”
20 Whaọ ahwo Griki jọ a jọ usu ahwo nọ a nyaze te gọ evaọ etoke ehaa na.
21 Ahwo nana a tẹ nya bru Filip ọnọ o no Bẹtsaida ọrọ Galili ze, a te mu ei họ ẹlẹ nọ: “Ọga, ma gwọlọ ruẹ Jesu.”
22 Filip ọ tẹ nyae ta kẹ Andru. Andru avọ Filip a tẹ nyae ta kẹ Jesu.
23 Rekọ Jesu ọ tẹ ta kẹ ae nọ: “Auwa na o te no nọ a rẹ rọ kẹ Ọmọ ohwo oruaro.
24 Uzẹme uzẹme mẹ be ta kẹ owhai, ajokpanọ ubi ọka o re kie fihọ otọ o ve gbo,* o gbẹ rrọ ere he, ubi ọka ọvo o rẹ gbẹ jọ; rekọ o te gbo, o vẹ mọ ibi buobu.
25 Ohwo kpobi nọ o you uzuazọ riẹ ọ te raha iẹe kufiẹ, rekọ ohwo kpobi nọ o mukpahe uzuazọ riẹ evaọ akpọ nana ọ te rọ ere sẹro riẹ kẹ uzuazọ ebẹdẹ bẹdẹ.
26 Otẹrọnọ ohwo jọ ọ rẹ gbodibo kẹ omẹ, jọ o lele omẹ, oria nọ mẹ rrọ etẹe ọgbodibo mẹ ọ rẹ jọ re. Otẹrọnọ ohwo jọ ọ rẹ gbodibo kẹ omẹ, Ọsẹ na o ti bru ọghọ họ iẹe oma.
27 Whaọ, mẹ be rova, kọ eme mẹ rẹ ta? Ọsẹ, siwi omẹ no auwa nana. Ghele na, fiki onana me ro te auwa nana.
28 Ọsẹ, kẹ odẹ ra oruaro.” Kẹsena urru jọ u te do no obọ odhiwu ze inọ: “Mẹ kẹ riẹ oruaro no yọ mẹ te wariẹ kẹe oruaro.”
29 Ogbotu nọ a dikihẹ etẹe na a yo urru na, a te muhọ ẹta inọ egbrara e va. Efa e ta nọ: “Ukọ-odhiwu ọ ta ẹme kẹe.”
30 Jesu ọ tẹ ta kẹ ae nọ: “Orọnikọ fiki mẹ urru nana u ro do na ha rekọ fiki rai.
31 Whaọ a bi gu akpọ nana ẹdhọ enẹna; yọ a ti le osu akpọ nana no.
32 Rekọ nọ a tẹ kpare omẹ kpehru no otọakpọ na no, me ti si oghẹrẹ ahwo kpobi bru omamẹ.”
33 Ọ jẹ ta onana ro dhesẹ oghẹrẹ uwhu nọ o bi ti whu.
34 Ogbotu na a tẹ kpahe kẹe nọ: “Ma jọ Uzi na yo inọ Kristi na ọ rẹ jọ bẹdẹ bẹdẹ. Kọ ẹvẹ whọ be rọ ta nọ a te kpare Ọmọ ohwo kpehru? Ono họ Ọmọ ohwo nana?”
35 Jesu ọ tẹ ta kẹ ae nọ: “Elo na ọ te gbẹ jọ kugbe owhai evaọ omoke. Wha nya nọ wha wo elo na, re ebi ọ siọ owhai ba eruru; ohwo kpobi nọ ọ be nya evaọ ebi ọ rẹ riẹ obonọ o bi kpohọ họ.
36 Nọ wha wo elo na, wha fi ẹrọwọ họ elo na, re wha sae jọ emọ elo.”
Nọ Jesu ọ ta eme nana no, ọ tẹ nyase ae ba nyai siomano.
37 Dede nọ ọ jọ iraro rai ru eware igbunu buobu, a je fi ẹrọwọ họ iẹe he,
38 u te ru nọ ẹme Aizaya ọruẹaro na u ro rugba, ọnọ ọ ta nọ: “Jihova,* ono o fi ẹrọwọ họ ẹme nọ a yo mi omai? Yọ kpahe ogaga Jihova,* ono a dhesẹ i rie via kẹ no?”
39 Aizaya ọ tẹ jẹ fodẹ oware nọ o wha riẹ ze nọ a gbẹ rọ rọwo ho inọ:
40 “O tu rai aro je ru udu rai gaga, re a gbẹ rọ ibiaro rai ruẹ ude jẹ jọ udu rai wo otoriẹ ẹme na ha, re a zihe bru omẹ ze me siwi ai.”
41 Aizaya ọ ta eme nana keme ọ ruẹ oruaro riẹ ọ tẹ ta kpahe iẹe.
42 Ghele na, ibuobu makọ evaọ udevie isu na a fi ẹrọwọ họ iẹe, rekọ a jẹ tae via fiki otu Farisi na ha re a siọ ae ba ele no uwou-egagọ na;
43 keme a you oruaro nọ u re no obọ ahwo-akpọ ze vi oruaro nọ u re no obọ Ọghẹnẹ ze.
44 Rekọ Jesu ọ tẹ rọ urru oruarua ta nọ: “Ohwo kpobi nọ o fi ẹrọwọ họ omẹ, orọnikọ mẹ ọvo o fi ẹrọwọ họ họ, rekọ te ọnọ o vi omẹ ze;
45 yọ ohwo kpobi nọ ọ ruẹ omẹ ọ ruẹ Ọnọ o vi omẹ ze re.
46 Mẹ nyaze wọhọ elo rọkẹ akpọ na, re ohwo kpobi nọ o fi ẹrọwọ họ omẹ ọ gbẹ jọ ebi hi.
47 Rekọ ohwo jọ o te yo eme mẹ o gbe ru ai hi, me re brukpei hi; keme orọnikọ mẹ nyaze ti brukpe akpọ na ha rekọ re me siwi akpọ na.
48 Ohwo kpobi nọ o rri omẹ vo nọ ọ jẹ eme mẹ rehọ họ, ọjọ ọ rrọ nọ o ti brukpei. Eme nọ mẹ ta eye i ti brukpei evaọ ẹdẹ urere na.
49 Keme orọnikọ eme obọmẹ mẹ be ta ha, rekọ Ọsẹ na ọnọ o vi omẹ ze ọ kẹ omẹ ujaje kpahe ẹme nọ mẹ rẹ ta gbe onọ me re wuhrẹ.
50 Yọ mẹ riẹ nọ ujaje riẹ o rẹ kẹ uzuazọ ebẹdẹ bẹdẹ. Fikiere, ẹme kpobi nọ mẹ be ta, mẹ be tae wọhọ epanọ Ọsẹ na ọ ta riẹ kẹ omẹ.”
Eme-Obotọ
^ Rri oria Otofa Eme.
^ Rri oria Otofa Eme.
^ Hayo “uki ekareghẹhọ.”
^ Evaọ Griki, “whu.”
^ Rri oria Otofa Eme.
^ Rri oria Otofa Eme.
