Jọn 13:1-38
13 Whaọ Jesu ọ riẹ taure Ehaa Ọnyavrẹ na o te ti te inọ oke nọ o re ro no akpọ na re ọ nya bru Ọsẹ na u te no, yọ fikinọ o you eriẹ nọ e jọ akpọ na, o you rai te urere.
2 Nọ a jẹ re emu na, yọ Ẹdhọ o fi iroro na họ Judas Iskariọt, ọmọ Saemọn udu no re o vivie iei.
3 Fikinọ Jesu ọ riẹ nọ Ọsẹ na ọ rehọ eware kpobi họ obọ riẹ no gbe inọ obọ Ọghẹnẹ o no ze yọ o bi ti zihe bru Ọghẹnẹ,
4 ọ tẹ kpama evaọ udevie emu na, ọ tẹ ba iwu ehru riẹ no. Nọ ọ tọlọ omokpa, ọ tẹ rehọ iẹe mu eku.
5 O te ku ame họ odhe, o te mu awọ ilele na họ ẹwozẹ jẹ be rehọ omokpa nọ o ro mu eku na ririe awọ rai.
6 Kẹsena o te te Saemọn Pita oma. Ọ tẹ nọe nọ: “Olori, kọ whọ gwọlọ wozẹ awọ mẹ?”
7 Jesu ọ tẹ kpahe kẹe nọ: “Who wo otoriẹ oware nọ me bi ru na obọnana ha, rekọ who ti wo otoriẹ riẹ evaọ oke ọfa.”
8 Pita ọ tẹ ta kẹe nọ: “Whọ rẹ wozẹ awọ mẹ vievie he.” Jesu ọ tẹ kpahe kẹe nọ: “Mẹ gbẹ wozẹ awọ ra ha, kiyọ whọ rrọ usu kugbe omẹ hẹ.”
9 Saemọn Pita ọ tẹ ta kẹe nọ: “Olori, whọ wozẹ awọ mẹ ọvo ho, rekọ te abọ mẹ gbe uzou mẹ.”
10 Jesu ọ tẹ ta kẹe nọ: “Ohwo kpobi nọ ọ họ no, awọ riẹ ọvo o gwọlọ ẹwozẹ, keme oma riẹ kpobi o rrọ fuafo. Yọ wha rrọ fuafo, rekọ orọnọ whai kpobi hi.”
11 Keme ọ riẹ ohwo nọ o bi ti vivie iei. Oyejabọ nọ ọ rọ ta nọ: “Orọnọ whai kpobi a rrọ fuafo ho.”
12 Whaọ nọ ọ wozẹ awọ rai no je ku iwu ehru riẹ họ no, ọ tẹ wariẹ keria, ọ tẹ nọ ae nọ: “Kọ wha riẹ oware nọ me ru kẹ owhai na?
13 Wha bi se omẹ ‘Owuhrẹ,’ gbe ‘Olori,’ yọ wha se gba keme Owuhrẹ gbe Olori mẹ ginẹ rrọ.
14 Fikiere otẹrọnọ mẹ nọ ọ rrọ Olori gbe Owuhrẹ ọ wozẹ awọ rai, u fo* nọ wha rẹ wozẹ awọ ohwohwo re.
15 Keme me fi oriruo họ otọ kẹ owhai, re epanọ me ru kẹ owhai na, wha ru ere re.
16 Uzẹme uzẹme mẹ be ta kẹ owhai, ọrigbo ọ rro vi olori riẹ hẹ, yọ ọnọ a vi ọ rro vi ọnọ o vi rie he.
17 Wha tẹ riẹ eware nana, eva e rẹ were owhai nọ wha te ru ai.
18 Orọnikọ whai kpobi mẹ be ta kpahe he; mẹ riẹ enọ mẹ salọ. Rekọ o rrọ enẹ re ikereakere na e ruẹsi rugba: ‘Ọnọ ọ jẹ hae re ebrẹdi mẹ ọ wọso omẹ no.’
19 No oke nana vrẹ, mẹ be vuẹ owhai re o tẹ te via, re nọ o te via, wha vẹ sae rọwo nọ mẹ họ ọye.
20 Uzẹme uzẹme mẹ be ta kẹ owhai, ohwo kpobi nọ o dede ohwo kpobi nọ me vi rehọ o dede omẹ rehọ re, yọ ohwo kpobi nọ o dede omẹ rehọ o dede Ọnọ o vi omẹ ze rehọ re.”
21 Nọ ọ ta eme nana no, Jesu ọ tẹ jẹ rova evaọ ẹzi, ọ tẹ ta vevẹ nọ: “Uzẹme uzẹme mẹ be ta kẹ owhai, omọvo rai jọ o ti vivie omẹ.”
22 Ilele na a te mu ohwohwo họ erri avọ igbunu keme a riẹ ọnọ ọ be ta onana kpahe he.
23 Omọvo ilele na jọ, ọnọ Jesu o you, ọ keria kẹle* Jesu.
24 Fikiere Saemọn Pita o te fi uzou kẹ olele nana, ọ tẹ ta kẹe nọ: “Vuẹ omai ohwo nọ ọ be ta ẹme nana kpahe na.”
25 Olele yena o te nioma kpemu fihọ igbama Jesu, ọ tẹ nọe nọ: “Olori, ono họ ohwo na?”
26 Jesu ọ tẹ kpahe kẹe nọ: “Ọnọ mẹ be te rọ ẹwẹ ebrẹdi nọ me duhọ izuwo kẹ na.” Fikiere nọ o du ebrẹdi na họ izuwo no, ọ tẹ rehọ iẹe kẹ Judas, ọmọ Saemọn Iskariọt.
27 Nọ Judas o mi ei ebrẹdi na no, Setan ọ tẹ ruọ eva riẹ. Fikiere Jesu ọ tẹ ta kẹe nọ: “Ru oware nọ who bi ru na vẹrẹ vẹrẹ.”
28 Rekọ enọ a gbẹ jẹ re emu na a riẹ oware nọ ọ rọ ta onana kẹe he.
29 Ejọ i je tube roro inọ, nọ orọnọ Judas o bi kru ẹkpẹti ugho na, Jesu ọ be ta kẹe nọ, “Dẹ eware nọ ma gwọlọ kẹ ehaa na,” hayo inọ ọ nyae rọ oware jọ kẹ iyogbere.
30 Fikiere, nọ o mi ebrẹdi na no, ọ tẹ nwane ruọ otafe. O jọ aso.
31 Nọ ọ ruọ otafe no, Jesu ọ tẹ ta nọ: “A kẹ Ọmọ ohwo oruaro no, yọ Ọghẹnẹ o wo oruaro no ẹkwoma riẹ.
32 Ọghẹnẹ ọ te kẹe oruaro, yọ ọ te kẹe oruaro obọnana.
33 Emọ esese, omoke mẹ te gbẹ jọ kugbe owhai. Wha te gwọlọ omẹ; yọ wọhọ epanọ mẹ ta kẹ ahwo Ju na inọ, ‘Oria nọ me bi kpohọ wha te sae nyaze iẹe he’ na, obọnana mẹ be ta ere kẹ owhai re.
34 Mẹ be kẹ owhai ujaje okpokpọ inọ wha you ohwohwo; wọhọ epanọ me you owhai na, wha you ohwohwo epọvo na re.
35 Ẹkwoma onana ahwo kpobi a te rọ riẹ nọ whai yọ ilele mẹ, nọ wha te wo uyoyou evaọ udevie rai.”
36 Saemọn Pita ọ tẹ nọe nọ: “Olori, bovẹ who bi kpohọ?” Jesu ọ tẹ kpahe kẹe nọ: “Oria nọ me bi kpohọ whọ te sai lele omẹ obọnana ha, rekọ who ti lele omẹ evaọ obaro.”
37 Pita ọ tẹ ta kẹe nọ: “Olori, emejabọ mẹ gbẹ sai ro lele owhẹ obọnana ha? Mẹ sai whu fiki ra.”
38 Jesu ọ tẹ kpahe kẹe nọ: “Kọ whọ sai whu fiki mẹ? Uzẹme uzẹme mẹ be ta kẹ owhẹ, ọkpa o ti bo vievie he bẹsenọ whọ rẹ vro omẹ isiasa no.”
