Jọn 14:1-31
14 “Wha jọ udu rai o jọ awawa ha. Wha fi ẹrọwọ họ Ọghẹnẹ; wha fi ẹrọwọ họ omẹ re.
2 Evaọ uwou Ọsẹ mẹ, eria buobu e riẹ nọ a rẹ rria. O gbẹ rrọ ere he, mẹ hae te vuẹ owhai, keme mẹ be nyae ruẹrẹ oria họ kẹ owhai.
3 Ofariẹ, nọ mẹ tẹ nyavrẹ jẹ ruẹrẹ oria họ kẹ owhai, mẹ te wariẹ nyaze mẹ vẹ rehọ owhai kugbe oma, re oria nọ mẹ rrọ wha vẹ jọ etẹe re.
4 Yọ oria nọ me bi kpohọ na, wha riẹ edhere na.”
5 Tọmọs ọ tẹ ta kẹe nọ: “Olori, ma riẹ oria nọ who bi kpohọ họ. Ẹvẹ ma sae rọ riẹ edhere na?”
6 Jesu ọ tẹ ta kẹe nọ: “Mẹ họ edhere na gbe uzẹme na gbe uzuazọ na. Ohwo ọvo ọ rẹ nya bru Ọsẹ na ze he ajokpaọ ẹkwoma mẹ.
7 Otẹrọnọ wha riẹ omẹ, wha rẹ riẹ Ọsẹ mẹ re; no umuo enẹna vrẹ wha riẹ riẹ yọ wha ruẹ e riẹ no.”
8 Filip ọ tẹ ta kẹe nọ: “Olori, dhesẹ Ọsẹ na kẹ omai, oyena u te kẹ omai.”
9 Jesu ọ tẹ ta kẹe nọ: “Ghele epanọ mẹ rrọ kugbe owhai kri te no na, Filip, whọ re riẹ omẹ hẹ? Ohwo kpobi nọ ọ ruẹ omẹ ọ ruẹ Ọsẹ na no re. Kọ ẹvẹ whọ be rọ ta nọ, ‘Dhesẹ Ọsẹ na kẹ omai’?
10 Kọ whọ rọwo nọ mẹ rrọ usu kugbe Ọsẹ na, gbe inọ Ọsẹ na ọ rrọ usu kugbe omẹ? Eware nọ mẹ be ta kẹ owhai na orọnikọ erọ obọmẹ hẹ, rekọ Ọsẹ na nọ ọ rrọ usu kugbe omẹ o bi ru iruo riẹ.
11 Jọ wha rọwo ẹme mẹ inọ mẹ rrọ usu kugbe Ọsẹ na yọ Ọsẹ na ọ rrọ usu kugbe omẹ; o gbẹ rrọ ere he, wha rọwo fiki iruo nọ me ru.
12 Uzẹme uzẹme mẹ be ta kẹ owhai, ohwo kpobi nọ o fi ẹrọwọ họ omẹ o ti ru iruo nọ me bi ru na re; yọ o ti ru iruo nọ e rro vi enana, keme mẹ be nyavrẹ bru Ọsẹ na.
13 Ofariẹ, oware kpobi nọ wha yare evaọ odẹ mẹ, me ti ru ei, re Ọsẹ na ọ sai wo oruaro ẹkwoma Ọmọ na.
14 Wha tẹ yare oware jọ evaọ odẹ mẹ, me ti ru ei.
15 “Wha te you omẹ, wha ti koko ijaje mẹ.
16 Yọ mẹ te yare Ọsẹ na ọ vẹ te kẹ owhai ofiobọhọ* ọfa nọ ọ rẹ te jọ kugbe owhai bẹdẹ bẹdẹ,
17 ẹzi uzẹme na, onọ akpọ na ọ rẹ sai wo ho, keme ọ rẹ ruẹ e riẹ hẹ yọ ọ riẹ riẹ hẹ. Wha riẹ riẹ, keme ọ rẹ jọ kugbe owhai yọ ọ rrọ owhai oma.
18 Mẹ te nyasiọ owhai ba iruori* hi. Mẹ te nya bru owhai ze.
19 Omoke u kiọkọ akpọ na ọ gbẹ te ruẹ omẹ ofa ha, rekọ wha te ruẹ omẹ, keme mẹ rrọ uzuazọ yọ wha te jọ uzuazọ.
20 Evaọ ẹdẹ yena wha te riẹ nọ mẹ rrọ usu kugbe Ọsẹ mẹ, yọ wha rrọ usu kugbe omẹ, yọ mẹ rrọ usu kugbe owhai.
21 Ohwo kpobi nọ ọ riẹ ijaje mẹ je bi koko ai ọye họ ọnọ o you omẹ. Yọ ohwo kpobi nọ o you omẹ, Ọsẹ mẹ o ti you rie, yọ me ti you rie je dhesẹ oma mẹ kẹe vevẹ.”
22 Judas, orọnikọ Iskariọt ho, ọ tẹ nọe nọ: “Olori, eme ọ via nọ whọ rọ gwọlọ dhesẹ omara vevẹ kẹ omai rekọ who ti ru ere kẹ akpọ na ha?”
23 Jesu ọ tẹ kpahe kẹe nọ: “Ohwo kpobi nọ o you omẹ, o re koko eme mẹ, yọ Ọsẹ mẹ o ti you rie, ma te nya bru rie ze, ma vẹ te rria kugbe.
24 Ohwo kpobi nọ o you omẹ hẹ o re koko eme mẹ hẹ. Ẹme nọ wha bi yo na orọnikọ ọmẹ hẹ, rekọ ọrọ Ọsẹ na nọ o vi omẹ ze.
25 “Mẹ ta eme nana kẹ owhai no nọ mẹ rrọ kugbe owhai na.
26 Rekọ ofiobọhọ na, ẹzi ọfuafo na, nọ Ọsẹ na o ti vi ze evaọ odẹ mẹ, ọyena o ti wuhrẹ owhai eware kpobi jẹ kareghẹhọ owhai eware kpobi nọ mẹ ta kẹ owhai.
27 Mẹ be nyasiọ udhedhẹ ba kẹ owhai; mẹ be kẹ owhai udhedhẹ mẹ. Epanọ akpọ na ọ rẹ kẹ udhedhẹ orọnikọ ere mẹ be rehọ iẹe kẹ owhai hi. Wha jọ udu rai o jọ awawa ha hayo dhozọ họ.
28 Wha yo nọ mẹ ta kẹ owhai nọ, Mẹ be nyavrẹ yọ me ti zihe bru owhai ze. Wha te you omẹ, wha rẹ ghọghọ nọ mẹ be nya bru Ọsẹ na, keme Ọsẹ na ọ rro vi omẹ.
29 Fikiere mẹ vuẹ owhai no re o tẹ te via, re nọ o te via, wha vẹ sae rọwo.
30 Me ti gbe lele owhai ta eme buobu hu, keme osu akpọ na ọ be nyaze, yọ ọ sae kpọ omẹ hẹ.
31 Rekọ re akpọ na ọ ruẹse riẹ nọ me you Ọsẹ na, me bi ru epanọ Ọsẹ na ọ ta kẹ omẹ. Wha kpama re ma nya no etenẹ.
