Jọn 15:1-27
15 “Mẹ họ uvi evaene* na, yọ Ọsẹ mẹ họ ọnọ ọ kọ riẹ.
2 Ọ rẹ gbẹre ogha kpobi nọ o rrọ omẹ nọ o be mọ ibi hi no, yọ ọ rẹ rẹrote* onọ o be mọ ibi re o gbẹ mọ ibi viere.
3 Wha rrọ fuafo no fiki eme nọ mẹ ta kẹ owhai.
4 Wha daji usu mẹ, mẹ te daji usu kugbe owhai. Wọhọ epanọ ogha ure o rẹ sae mọ ibi hi ajokpanọ o rrọ kugbe ure na, ere ọvona wha rẹ sae mọ ibi hi ajokpanọ wha daji usu mẹ.
5 Mẹ họ evaene na; whai họ egha na. Ohwo kpobi nọ ọ daji usu mẹ, mẹ tẹ rrọ usu kugbei, ọnana ọ rẹ mọ ibi buobu; keme ababọ mẹ wha rẹ sai ru oware ovo vievie he.
6 Ọnọ ọ daji usu mẹ hẹ, a re gbolo iei kufiẹ wọhọ ogha, o ve whu no. Ahwo a re koko egha yena họ a ve gbolo ai fihọ erae e vẹ to no.
7 Wha tẹ daji usu mẹ, yọ eme mẹ e rrọ eva rai, wha yare oware kpobi nọ wha gwọlọ, u ti te owhai obọ.
8 Onana o rẹ kẹ Ọsẹ mẹ oruaro, nọ wha tẹ be mọ ibi buobu je bi dhesẹ nọ whai yọ ilele mẹ.
9 Wọhọ epanọ Ọsẹ na o you omẹ, ere me you owhai na; wha daji uyoyou mẹ.
10 Wha te koko ijaje mẹ, wha te daji uyoyou mẹ, wọhọ epanọ me bi koko ijaje Ọsẹ na mẹ jẹ daji uyoyou riẹ na.
11 “Mẹ be ta eme nana kẹ owhai re wha sai wo oghọghọ mẹ, re oghọghọ rai o sae jọ vọvọ.
12 Onana họ ujaje mẹ, inọ wha you ohwohwo wọhọ epanọ me you owhai na.
13 Ohwo ọvo o wo uyoyou nọ o rro vi onana ha, inọ ohwo jọ o re siobọno uzuazọ riẹ fiki egbẹnyusu riẹ.
14 Whai yọ egbẹnyusu mẹ nọ wha te bi ru eware nọ me jie uzi rai kẹ owhai.
15 Me gbe bi se owhai erigbo ho, keme ọrigbo ọ rẹ riẹ oware nọ olori riẹ o bi ru hu. Rekọ me bi se owhai egbẹnyusu, keme mẹ ta eware kpobi nọ me yo mi Ọsẹ mẹ kẹ owhai no.
16 Orọnikọ whai a salọ omẹ hẹ rekọ mẹ ọ salọ owhai, yọ mẹ rọ owhai mu re wha hae mọ ibi, ibi rai e vẹ jọ ribri, re oware kpobi nọ wha yare Ọsẹ na evaọ odẹ mẹ, ọ vẹ rehọ iẹe kẹ owhai.
17 “Me bi jie uzi eware nana kẹ owhai re wha you ohwohwo.
18 Akpọ na o te mukpahe owhai, wha riẹ inọ o mukpahe omẹ no taure o te ti mukpahe owhai.
19 O hae rọnọ wha wo obọ kugbe akpọ na, akpọ na ọ hai you owhai fikinọ whai yọ eriẹ. Whaọ fikinọ wha wo obọ kugbe akpọ na ha, rekọ mẹ salọ owhai no akpọ na no, fiki onana akpọ na o mukpahe owhai.
20 Wha kareghẹhọ ẹme nọ mẹ ta kẹ owhai: Ọrigbo ọ rro vi olori riẹ hẹ. Otẹrọnọ a kpokpo omẹ, a ti kpokpo owhai re; a hai koko ẹme mẹ, a hai koko ẹme rai re.
21 Rekọ a ti ru owhai eware nana kpobi fiki odẹ mẹ keme a riẹ Ọnọ o vi omẹ ze he.
22 Mẹ gbẹ hae nyaze jẹ ta eme nana kẹ ae he, a hai wo uzioraha ha. Rekọ obọnana a wo unoma nọ a re gu kẹ uzioraha rai hi.
23 Ohwo kpobi nọ o mukpahe omẹ o mukpahe Ọsẹ mẹ re.
24 Mẹ gbẹ hae jọ udevie rai ru iruo nọ ohwo ọvuọvo o ri ru hu, a hai wo uzioraha ha; rekọ a rọ ẹro ruẹ omẹ no je mukpahe omẹ avọ Ọsẹ mẹ.
25 Rekọ onana o via re u ru eme nọ a kere fihọ Uzi rai gba: ‘A mukpahe omẹ gheghe.’
26 Nọ ofiobọhọ na nọ me ti vi se owhai no obọ Ọsẹ na ze na ọ tẹ ze, koyehọ ẹzi uzẹme na, onọ o re no obọ Ọsẹ na ze, ọyena o ti se isẹri kpahe omẹ;
27 whai omarai wha re se isẹri re, keme wha rrọ kugbe omẹ no emuhọ ze.
