Jọn 18:1-40
18 Nọ Jesu ọ ta eme nana no, tei te ilele riẹ a te kpohọ abọdekọ Ukiekpotọ Kidrọn oria nọ ọgbọ ọ jọ, a tẹ ruọ eva riẹ.
2 Whaọ, Judas ọnọ o bi ti vivie iei, ọ riẹ oria na re, keme Jesu avọ ilele riẹ a jẹ hai kpohọ etẹe.
3 Fikiere Judas ọ tẹ rehọ utu isoja, gbe elakpa ilori izerẹ na gbe erọ otu Farisi na, a tẹ ziọ etẹe avọ ikpẹ gbe ekwakwa-ẹmo nọ a kru.
4 Fikinọ Jesu ọ riẹ eware kpobi nọ e be te via kẹe, ọ tẹ nya via, ọ tẹ nọ ae nọ: “Ono wha be gwọlọ?”
5 A tẹ kẹe uyo nọ: “Jesu ohwo Nazarẹt na.” Ọ tẹ ta kẹ ae nọ: “Mẹ họ ọye.” Whaọ Judas ọnọ o bi ti vivie iei na o dikihẹ kugbe ai re.
6 Rekọ nọ Jesu ọ ta kẹ ae nọ, “Mẹ họ ọye,” a te go kpemu je kie fihọ otọ.
7 Fikiere ọ tẹ wariẹ nọ ae nọ: “Ono wha be gwọlọ?” A tẹ ta nọ: “Jesu ohwo Nazarẹt na.”
8 Jesu ọ tẹ kpahe kẹ ae nọ: “Mẹ ta kẹ owhai no inọ mẹ họ ọye. Fikiere otẹrọnọ mẹ wha be gwọlọ, wha kẹ ezae nana uvẹ re a nyavrẹ.”
9 O jọ enẹ re eme nọ ọ ta e sai rugba inọ: “Evaọ usu enọ whọ kẹ omẹ na, ọvuọvo rai o vru hu.”
10 Kẹsena Saemọn Pita, ọnọ ọ wha ọgbọdọ, o te wolo iei lahwe, ọ tẹ nawo ozọ obọze ọrigbo ozerẹ okpehru na no. Odẹ ọrigbo na họ Malkọs.
11 Rekọ Jesu ọ tẹ ta kẹ Pita nọ: “Zihe ọgbọdọ na fihọ owa riẹ. Kọ mẹ gbẹ da egho nọ Ọsẹ mẹ ọ kẹ omẹ?”
12 Kẹsena isoja na gbe ọnọ o wuzou ogbaẹmo* na gbe elakpa ahwo Ju na a te kru* Jesu a tẹ gbae.
13 A tẹ kaki su ei bru Anas, keme ọ jọ ọgọ* Kayafas, ọnọ ọ jọ ozerẹ okpehru evaọ ukpe yena.
14 Kayafas họ ọnọ ọ hrẹ ahwo Ju na inọ o rrọ kẹ erere rai re omọvo o whu rọkẹ ahwo na.
15 Whaọ Saemọn Pita avọ olele ọfa jọ a je lele Jesu. Ozerẹ okpehru na ọ riẹ olele yena, fikiere o te lele Jesu ruọ ighẹ ozerẹ okpehru na,
16 rekọ Pita o te dikihẹ obọ otafe kẹle ẹthẹ* na. Fikiere olele ọdekọ na nọ ozerẹ okpehru na ọ riẹ na ọ tẹ ruọ otafe nyae ta ẹme kẹ oriẹthẹ na, ọ tẹ rọ Pita ruọ eva.
17 Odibo-ọmọtẹ nọ ọ rrọ oriẹthẹ na ọ tẹ nọ Pita nọ: “Thakpinọ whẹ yọ omọvo ilele ọzae yena ha?” Ọ tẹ ta nọ: “Mẹ yọ omọvo rai hi.”
18 Whaọ erigbo na avọ elakpa na a dikihẹ wariẹ erae nọ a koko họ be sasa oma rai keme ekpahe e jọ. Pita o dikihẹ kugbe ai re jẹ sasa oma riẹ.
19 Olori izerẹ na ọ nọ Jesu kpahe ilele riẹ gbe iwuhrẹ riẹ.
20 Jesu ọ tẹ kpahe kẹe nọ: “Evaọ ẹgbede mẹ jọ je wuhrẹ ahwo. Mẹ jẹ hai wuhrẹ evaọ uwou-egagọ gbe evaọ etẹmpol na, oria nọ ahwo Ju kpobi a re kokohọ, yọ mẹ lẹlẹ ta ẹme ọvo ho.
21 Fikieme whọ be rọ nọ omẹ? Nọ ahwo nọ a yo eme nọ mẹ ta kẹ ae. Rri! A riẹ eme nọ mẹ ta.”
22 Nọ ọ ta eme nana no, omọvo elakpa na nọ o dikihẹ etẹe ọ tẹ tehe Jesu abovao, ọ tẹ nọe nọ: “Ere whọ rẹ kpahe ẹme kẹ olori izerẹ na?”
23 Jesu ọ tẹ kpahe kẹe nọ: “Otẹrọnọ mẹ ta ẹme jọ thọ, fodẹ ẹme nọ mẹ ta thọ na; rekọ otẹrọnọ uzẹme mẹ ta na, fikieme whọ rọ tehe omẹ?”
24 Anas ọ tẹ ta nọ a rehọ iẹe se Kayafas ozerẹ okpehru na evaọ epanọ a rọ gbae na.
25 Whaọ Saemọn Pita o dikihẹ etẹe jẹ sasa oma riẹ. A tẹ nọe nọ: “Thakpinọ whẹ yọ omọvo ilele riẹ ha?” Ọ tẹ vro inọ: “Mẹ yọ omọvo rai hi.”
26 Omọvo erigbo ozerẹ okpehru na, omoni ọzae nọ Pita ọ nawo ozọ riẹ no na, ọ tẹ nọe nọ: “Mẹ ruẹ owhẹ nọ whọ jọ kugbei evaọ obọ ọgbọ na, mẹ ruẹ owhẹ?”
27 Rekọ Pita ọ tẹ wariẹ vro, ẹsiẹvo na, ọkpa o te bo.
28 Kẹsena a te su Jesu no uwou Kayafas kpobọ ighẹ ọba na. Oke nana yọ ohiohiẹ o te no. Rekọ ae omarai a ruọ ighẹ ọba na ha, re a siọ oma rai ba ezue re a sae re emu Ọnyavrẹ na.
29 Fikiere Pailet ọ tẹ ziọ otafe bru rai, ọ tẹ nọ ae nọ: “Oware uyoma vẹ wha ta nọ ọzae nana o ru?”
30 A tẹ kpahe kẹe nọ: “Ọzae nana ọ gbẹ raha uzi hi, ma hae rehọ iẹe se owhẹ hẹ.”
31 Pailet ọ tẹ ta kẹ ae nọ: “Whai ọvo wha rehọ iẹe re wha rọ uzi rai ro gu ei ẹdhọ.” Ahwo Ju na a tẹ ta kẹe nọ: “Ma wo udu nọ ma re ro kpe ohwo ọvo ho.”
32 Onana o via re u ru ẹme Jesu gba onọ ọ ta ro dhesẹ oghẹrẹ uwhu nọ o bi ti whu.
33 Fikiere Pailet ọ tẹ wariẹ ruọ evaọ uwou na, o te se Jesu ọ tẹ nọe nọ: “Kọ whẹ họ Ovie ahwo Ju na?”
34 Jesu ọ tẹ kuyo nọ: “Kọ iroro obọra whọ be rọ nọ onana, manikọ ahwo jọ a vuẹ owhẹ kpahe omẹ?”
35 Pailet ọ tẹ kpahe kẹe nọ: “Kọ mẹ yọ ohwo Ju? Ahwo orẹwho obọra gbe ilori izerẹ na a rehọ owhẹ bru omẹ ze. Eme who ru?”
36 Jesu ọ tẹ kpahe kẹe nọ: “Uvie mẹ u wo obọ kugbe akpọ nana ha. Uvie mẹ o hai wo obọ kugbe akpọ nana, idibo mẹ a hae te họre re a siọ omẹ ba ẹrọkẹ ahwo Ju. Rekọ Uvie mẹ o rrọ orọ akpọ nana ha.”
37 Fikiere Pailet ọ tẹ nọe nọ: “Koyehọ whẹ yọ ovie?”Jesu ọ tẹ kpahe kẹe nọ: “Whẹ ọvo whọ be ta nọ mẹ yọ ovie na. Keme fiki onana a ro yẹ omẹ, yọ fiki onana mẹ rọ nyaze akpọ na, re me se isẹri kpahe uzẹme na. Ohwo kpobi nọ ọ rrọ abọ uzẹme na ọ rẹ gaviezọ kẹ urru mẹ.”
38 Pailet ọ tẹ nọe nọ: “Eme họ uzẹme?”
Nọ ọ ta onana no, ọ tẹ wariẹ ruọ otafe bru ahwo Ju na, ọ tẹ ta kẹ ae nọ: “Mẹ jọ obọ riẹ ruẹ oruthọ ọvuọvo ho.
39 Ofariẹ, wha wo uruemu nọ wha rẹ rọ yare inọ me siobọno ohwo jọ kẹ owhai evaọ etoke Ehaa Ọnyavrẹ na. Kọ wha gwọlọ nọ me siobọno Ovie ahwo Ju na kẹ owhai?”
40 A tẹ wariẹ bo nọ: “Orọnikọ ọzae nana ha rekọ Barabas!” Whaọ Barabas ọ jọ ogbulegbu.
Eme-Obotọ
^ Osoja nọ o wuzou isoja odu ọvo (1,000).
^ Hayo “mu.”
^ Koyehọ, “ọsẹ aye.”
^ Hayo “unuẹthẹ.”
