Jọn 19:1-42
19 Kẹsena Pailet ọ tẹ rehọ Jesu kẹ isoja na re a fae, a tẹ fae.
2 Isoja na a tẹ nwa etu idhigbo a tẹ rehọ iẹe tu ei uzou je fi ogbru ekọlọ ogorurẹ họ iẹe oma wọhọ ewu,
3 a tẹ be nya bru rie ze be ta nọ: “Do, whẹ Ovie ahwo Ju!” A jẹ tehe iẹe abovao re.
4 Pailet ọ tẹ wariẹ ruọ otafe ọ tẹ ta kẹ ogbotu na nọ: “Rri! Mẹ be rehọ iẹe ziọ otafe bru owhai ze re wha riẹ nọ mẹ jọ obọ riẹ ruẹ oruthọ ọvuọvo ho.”
5 Fikiere Jesu ọ tẹ nya lahwe, avọ etu idhigbo nọ a ro tu ei uzou gbe ogbru ekọlọ ogorurẹ nọ a fihọ iẹe oma na. Pailet ọ tẹ ta kẹ ae nọ: “Rri! Ọzae na!”
6 Rekọ nọ ilori izerẹ na gbe elakpa na a ruẹ e riẹ, a te bo nọ: “Kare iẹe fihọ ure! Kare iẹe fihọ ure!”* Pailet ọ tẹ ta kẹ ae nọ: “Whai ọvo wha rehọ iẹe re wha kpei,* keme mẹ jọ obọ riẹ ruẹ oruthọ ọvuọvo ho.”
7 Ahwo Ju na a tẹ kpahe kẹe nọ: “Ma wo uzi, yọ wọhọ epanọ uzi na o ta, o fo uwhu keme o ru omariẹ ọmọ Ọghẹnẹ.”
8 Nọ Pailet o yo ẹme nọ a be ta na, ozọ u te mu ei ga viere,
9 ọ tẹ wariẹ ruọ evaọ uwou na, ọ tẹ nọ Jesu nọ: “Diẹse who no ze?” Rekọ Jesu ọ kpahe ẹme kẹe he.
10 Fikiere Pailet ọ tẹ nọe nọ: “Kọ whọ be kpahe ẹme kẹ omẹ? Kọ whọ gbẹ riẹ nọ me wo udu nọ me re ro siobọno owhẹ gbe udu nọ mẹ rẹ rọ ta nọ a kpe owhẹ?”*
11 Jesu ọ tẹ kpahe kẹe nọ: “Who re wo udu nọ who re ro ru omẹ oware ovo vievie he ajokpanọ a rehọ iẹe kẹ owhẹ no obehru ze. Oyejabọ nọ uzioraha ohwo nọ ọ rehọ omẹ kẹ owhẹ o rọ mae rro na.”
12 Fikiere Pailet ọ tẹ gbẹ jẹ gwọlọ edhere nọ o re ro siobọnoi, rekọ ahwo Ju na a te bo nọ: “Who te siobọno ọzae nana, kiyọ whẹ ogbẹnyusu Siza ha. Ohwo kpobi nọ o bi ru omariẹ ovie ọ be wọso Siza.”
13 Kẹsena nọ Pailet o yo eme nana no, ọ tẹ rehọ Jesu nya lahwe, ọ tẹ keria akaba oziẹobro evaọ oria nọ a re se Ukpehru Utho na, rekọ evaọ ẹvẹrẹ Hibru kọ Gabata.
14 Whaọ o jọ ẹdẹ Omaruẹrẹ-Kpahe kẹ Ọnyavrẹ na; oke na o jọ oware wọhọ auwa avọ ezeza.* Ọ tẹ ta kẹ ahwo Ju na nọ: “Rri! Ovie rai!”
15 Rekọ a te bo nọ: “Rehọ iẹe vrẹ! Rehọ iẹe vrẹ! Kare iẹe fihọ ure!”* Pailet ọ tẹ nọ ae nọ: “Kọ me kpe ovie rai?” Ilori izerẹ na a tẹ kpahe kẹe nọ: “Ma wo ovie ọfa ha ajokpaọ Siza.”
16 Kẹsena ọ tẹ rehọ iẹe kẹ ae re a nyae kare iẹe fihọ ure kpe.
A tẹ rehọ Jesu vrẹ.
17 Nọ ọ wọ ure-oja* na, a te kpohọ oria nọ a re se Oria Ukolo-Uzou, onọ a rẹ jọ ẹvẹrẹ Hibru se Golgota.
18 A tẹ jọ etẹe tehe iẹe fihọ ure, yọ a kare ezae ivẹ jọ fihọ tabọ tabọ riẹ, Jesu ọ tẹ rrọ udevie.
19 Pailet o te je kere eme fihọ ẹwẹ-akpala jẹ tehe iẹe họ ehru ure-oja* na. Eme nọ o kere họ: “Jesu ohwo Nazarẹt na Ovie ahwo Ju.”
20 Ahwo Ju na buobu a se eme nana keme oria nọ a jọ tehe Jesu fihọ ure na o kẹle okpẹwho na, yọ a kere eme na evaọ ẹvẹrẹ Hibru, Latin, gbe Griki.
21 Rekọ, ilori izerẹ ahwo Ju na a tẹ ta kẹ Pailet nọ: “Who kere ‘Ovie ahwo Ju’ hu, rekọ inọ ọ ta nọ, ‘Mẹ họ Ovie ahwo Ju.’”
22 Pailet ọ tẹ ta nọ: “Onọ me kere, me kere no.”
23 Whaọ nọ isoja na a tehe Jesu fihọ ure na no, a tẹ rehọ iwu ehru riẹ a tẹ ghale ae kpohọ abane, isoja na a tẹ rehọ ọvuọ ọriẹ, a tẹ jẹ rehọ ewu obeva na. Rekọ ewu obeva na o wo oria ọvo nọ a jo koi hi, a zuo rie no ehru duwu otọ.
24 Fikiere, a tẹ ta kẹ ohwohwo nọ: “Ma bẹre iẹe he, rekọ wha joma fi edhọ re ma riẹ ohwo nọ ọ rẹ rehọ iẹe.” Onana o via re ikereakere na i rugba, onọ o ta nọ: “A ghale iwu mẹ kẹ omoma rai, yọ a fi edhọ fiki ewu mẹ.” Isoja na a gine ru eware nana.
25 Rekọ ahwo jọ a dikihẹ kẹle ure-oja* nọ a kare Jesu fihọ na, oni Jesu avọ oniọvo oni riẹ; Meri aye Klopas gbe Meri Magdalini.
26 Fikiere nọ Jesu ọ ruẹ oni riẹ gbe olele nọ o you na nọ a dikihẹ kẹle etẹe, ọ tẹ ta kẹ oni riẹ nọ: “Oni, rri! Ọmọ ra!”
27 Kẹsena ọ tẹ ta kẹ olele na nọ: “Rri! Oni ra!” No auwa yena vrẹ, olele na ọ tẹ rehọ oni na kpobọ uwou ọyomariẹ.
28 Nọ onana o vrẹ no, nọ Jesu ọ riẹ nọ eware kpobi i rugba no, re ikereakere na e ruẹsi rugba ọ tẹ ta nọ: “Uruame u bi kpe omẹ.”
29 Othẹ nọ udi-ogho o vọ o jọ etẹe. A te duwu uzi họ udi-ogho na, a tẹ jẹe họ umure hisọp, a tẹ kpare iẹe kpehru fihọ unu riẹ.
30 Nọ Jesu ọ dawo udi-ogho na no, ọ tẹ ta nọ: “U rugba no!” nọ o gbe uzou họ otọ, o te se ẹwẹ họ.*
31 Fikinọ o jọ ẹdẹ Omaruẹrẹ-Kpahe kẹ Ẹdijala yọ ahwo Ju na a gwọlọ nọ ahwo na a jọ ire-oja na evaọ Ẹdijala na ha, (keme ẹdẹ Ẹdijala yena o jọ ologbo,) a tẹ yare Pailet re a wiri awọ* rai jẹ wọ ae vrẹ.
32 Isoja na a tẹ nyaze a te wiri awọ ọzae ọsosuọ na gbe awọ ọzae ọdekọ nọ a kare fihọ ure evaọ abotọ riẹ na.
33 Rekọ nọ a nya te Jesu oma, a tẹ ruẹ nọ o whu no, a gbe wiri awọ riẹ hẹ.
34 Rekọ omọvo isoja na jọ ọ tẹ rehọ ozuẹ duwu abefẹ riẹ, azẹ gbe ame e tẹ nwani hwẹ ze.
35 Yọ ọnọ ọ ruẹ e riẹ o se isẹri nana, yọ isẹri riẹ uzẹme, yọ ọ riẹ nọ eme nọ ọ ta uzẹme, re wha sae rọwo re.
36 Evaọ uzẹme, eware nana e via re ikereakere na i rugba, onọ o ta nọ: “A ti wiri* ugbonwa riẹ ọvuọvo ho.”
37 Yọ ikereakere ọfa ọ tẹ jẹ ta nọ: “A ti rri ọnọ a duwu na.”
38 Nọ eware nana e vrẹ no, Josẹf ohwo Arimatia, ọnọ ọ jọ olele Jesu rekọ nọ o je dhesẹ omariẹ via ha fiki ozọ ahwo Ju, ọ tẹ yare Pailet sọ ọ sae rehọ ori Jesu vrẹ, Pailet ọ tẹ kẹe uvẹ na. Fikiere ọ tẹ nyaze, ọ tẹ rehọ ori riẹ vrẹ.
39 Nikodimọs, ọzae nọ ọ nya bru rie ze evaọ aso ẹdẹjọ na, ọ nyaze re, yọ ọ wha mọr gbe alọe nọ a gwa kugbe ze nọ e gbẹdẹ te oware wọhọ ikilogramo ọgba.*
40 A tẹ rehọ ori Jesu, a tẹ rehọ eware nọ i re gbo ore awere na ro wholo iei, a tẹ rehọ emehọ variẹ iẹe, wọhọ epaọ uruemu ahwo Ju nọ a re ro ki ohwo.
41 Whaọ, ọgbọ ọ jọ oria nọ a jọ kpei* na, yọ uki* okpokpọ jọ o jọ ọgbọ na, onọ a ri ki ohwo ọvo fihọ họ.
42 Fikinọ o jọ ẹdẹ Omaruẹrẹ-Kpahe ọrọ ahwo Ju na yọ uki na o kẹle etẹe, a tẹ wọ ori Jesu fihọ iẹe.
Eme-Obotọ
^ Hayo “Kare iẹe fihọ ure kpe! Kare iẹe fihọ ure kpe!”
^ Hayo “Kare iẹe fihọ ure kpe!”
^ Hayo “Kare owhẹ fihọ ure kpe!”
^ Oware wọhọ ighọjọ ikpegbivẹ uvo.
^ Hayo “Kare iẹe fihọ ure kpe!”
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Hayo “o te whu.”
^ O wọhọ nọ a wiri awọ rai re a whu vẹrẹ.
^ Hayo “whọlọ.”
^ O dina gbẹdẹ vrẹ ubro ẹkpa isimeti.
^ Hayo “kare iẹe fihọ ure na.”
^ Hayo “uki ekareghẹhọ.”
