Jọn 21:1-25
21 Nọ onana o vrẹ no, Jesu ọ tẹ wariẹ dhesẹ omariẹ via kẹ ilele na kẹle Abade Taibirias.* Oghẹrẹ nọ o ro dhesẹ oma via kẹ ae ona.
2 Saemọn Pita, Tọmọs (ọnọ a je se Ejime na), Nataniẹl nọ o no obọ Kena ọrọ Galili ze, emezae Zẹbẹdi, gbe ilele ivẹ riẹ efa a jọ kugbe.
3 Saemọn Pita ọ tẹ ta kẹ ae nọ: “Me bi kpohọ iyei-ikpe.” A tẹ ta kẹe nọ: “Ma bi lele owhẹ nya.” A tẹ nyavrẹ a tẹ ruọ okọ, rekọ evaọ aso yena a kpe eri ọvo ho.
4 Rekọ nọ oke o be ke no, Jesu o te dikihẹ unueri na, rekọ ilele na a riẹ nọ Jesu hu.
5 Jesu ọ tẹ nọ ae nọ: “Emaha na, kọ wha wo oware* jọ nọ a rẹ re?” A tẹ kuyo nọ: “Ijo!”
6 Ọ tẹ ta kẹ ae nọ: “Wha fi ẹriri rai họ obọze okọ na wha ti kpe iyei jọ.” A te fi ẹriri na họ, rekọ a gbẹ jẹ sai si ei fihọ okọ họ fikinọ iyei na e jọ buobu.
7 Kẹsena olele nọ Jesu o you na ọ tẹ ta kẹ Pita nọ: “Olori na!” Nọ Saemọn Pita o yo onana, o te ku ewu ehru riẹ họ, keme ọ jọ enwenọ ẹbẹba, ọ tẹ laruọ abade na.
8 Rekọ ilele edekọ na a te bi okọ osese nọ a jọ na ze bi si ẹriri nọ iyei e vọ na lele oma, keme a thabọ no okpa ha, o jọ oware wọhọ irula egba esa (300).*
9 Rekọ nọ a ruọ okpa a tẹ jọ etẹe ruẹ iwowo-erae nọ a fi emeri họ be tọ gbe ebrẹdi.
10 Jesu ọ tẹ ta kẹ ae nọ: “Wha rehọ iyei jọ nọ wha kpe obọnana ze.”
11 Fikiere, Saemọn Pita ọ tẹ ruọ okọ na, o te si ẹriri na fihọ okpa avọ iyei ilogbo nọ e vọ riẹ, i bu te udhuhrẹ gbe ikpegbesa (153). Dede nọ i bu gaga na, ẹriri na ọ bẹre he.
12 Jesu ọ tẹ ta kẹ ae nọ: “Wha nyaze te re emu.” Ilele na ọvuọvo ọ sae gbaudu nọe he inọ: “Whẹ yọ ono?” keme a riẹ nọ Olori na.
13 Jesu ọ tẹ nyaze ọ tẹ tọlọ ebrẹdi na ọ tẹ rehọ iẹe kẹ ae, ọ tẹ rehọ emeri na kẹ ai re.
14 Onana o jọ orọ avọ esa nọ Jesu ọ romavia kẹ ilele na nọ a kpare iẹe no uwhu ze no na.
15 Nọ a re emu na no, Jesu ọ tẹ nọ Saemọn Pita nọ: “Saemọn ọmọ Jọn, kọ who you omẹ vi eware nana?” Ọ tẹ kẹe uyo nọ: “Ee, Olori, whọ riẹ nọ me you owhẹ gaga.” Ọ tẹ ta kẹe nọ: “Kuọ imigodẹ mẹ.”
16 Ọ tẹ wariẹ nọe orọ avọ ivẹ nọ: “Saemọn ọmọ Jọn, kọ who you omẹ?” Ọ tẹ kẹe uyo nọ: “Ee, Olori, whọ riẹ nọ me you owhẹ gaga.” Ọ tẹ ta kẹe nọ: “Sẹro igodẹ esese mẹ.”
17 Ọ tẹ nọe orọ avọ esa nọ: “Saemọn ọmọ Jọn, kọ who you omẹ gaga?” O tẹ kẹ Pita uye inọ ọ wariẹ nọe orọ avọ esa nọ: “Kọ who you omẹ gaga?” Fikiere ọ tẹ ta kẹe nọ: “Olori, whọ riẹ eware kpobi; whọ riẹ nọ me you owhẹ gaga.” Jesu ọ tẹ ta kẹe nọ: “Kuọ igodẹ esese mẹ.
18 Uzẹme uzẹme mẹ be ta kẹ owhẹ, okenọ whọ gbẹ jọ ọmaha, whẹ ọvo whọ jẹ hai ku ewu họ jẹ nya kpohọ oria kpobi nọ u je owhẹ. Rekọ nọ whọ tẹ kpako no, whọ te riẹ abọ ra, omọfa o ve ku ewu họ owhẹ oma, o ve su owhẹ kpohọ oria nọ whọ gwọlọ họ.”
19 Ọ ta onana ro dhesẹ oghẹrẹ uwhu nọ Pita o ti whu nọ o te wha orro se Ọghẹnẹ. Nọ ọ ta onana no, ọ tẹ ta kẹe nọ: “Lele omẹ ẹsikpobi.”
20 Pita o te kuomarẹriẹ ọ tẹ ruẹ olele nọ Jesu o you na nọ o bi lele ai, ọnọ o nioma kpemu fihọ igbama Jesu evaọ etoke emu owọwọ na, nọ ọ nọ riẹ nọ: “Olori, ono o bi ti vivie owhẹ?”
21 Nọ Pita ọ ruẹ e riẹ ọ tẹ nọ Jesu nọ: “Olori, kọ ẹvẹ kpahe ọzae nana?”
22 Jesu ọ tẹ ta kẹe nọ: “O tẹ rrọ oreva mẹ nọ ọ rẹ jariẹ bẹsenọ mẹ rẹ nyaze, ovẹ o jariẹ te owhẹ? Thakpi lele omẹ ẹsikpobi.”
23 Fikiere, inievo na a tẹ jẹ jọ udevie rai ta ẹme nana, inọ olele yena o ti whu hu. Rekọ, ere Jesu ọ ta ha inọ o ti whu hu, rekọ ẹme nọ ọ ta họ: “O tẹ rrọ oreva mẹ nọ ọ rẹ jariẹ bẹsenọ mẹ rẹ nyaze, ovẹ o jariẹ te owhẹ?”
24 Olele nana họ ọnọ o se isẹri kpahe eware nana je kere eware nana, yọ ma riẹ nọ isẹri riẹ yọ uzẹme.
25 Evaọ uzẹme, eware efa buobu e riẹ nọ Jesu o ru, yọ a hai kere ai kpobi, me roro nọ akpọ na dede ọ rẹ sae gba iko-ebe nọ a kere i rai fihọ họ.
