Jọn 5:1-47
5 Nọ onana o vrẹ no, a te je ru ehaa ahwo Ju jọ, Jesu o te kpobọ Jerusalẹm.
2 Whaọ evaọ Jerusalẹm, kẹle Unuẹthẹ Igodẹ na, ẹtẹre jọ ọ jariẹ nọ a rẹ rọ ẹvẹrẹ Hibru se Bẹtzeda, onọ u wo idhere esese isoi nọ a rẹ rọ nya ruọ iẹe.*
3 Ogbotu buobu ọrọ enọ e jẹ mọ, enọ i tuaro, emo, gbe enọ obọ hayo owọ rai o ko a kiẹzẹ idhere nana.
4 ——
5 Rekọ ọzae jọ ọ jọ etẹe ọnọ ọ mọ te ikpe ọgba gbe eree no.
6 Nọ Jesu ọ ruẹ ọzae nana nọ o kiẹzẹ etẹe, yọ ọ riẹ nọ u kri no nọ ọ be rọ mọ, ọ tẹ ta kẹe nọ: “Kọ whọ gwọlọ nọ ẹyao ra o kpo?”
7 Ọzae nọ ọ be mọ na ọ tẹ kẹe uyo nọ: “Ọga, me wo ohwo ọvo nọ ọ rẹ wọ omẹ fihọ ẹtẹre na ha nọ ẹvohẹ ọ tẹ rrọ ame na; rekọ nọ mẹ tẹ be nya re mẹ ruọ ame na, omọfa ọ vẹ ruọ aro mẹ.”
8 Jesu ọ tẹ ta kẹe nọ: “Kpama! Tọlọ uto* ra re whọ nya.”
9 Ẹsiẹvo na ẹyao ọzae na o te kpo, ọ tẹ tọlọ uto* riẹ o te muhọ ẹnya.
Ẹdẹ yena ọ jọ Ẹdijala.
10 Fikiere ahwo Ju na a tẹ be ta kẹ ọzae nọ ẹyao riẹ o kpo no na nọ: “Nẹnẹ yọ Ẹdijala, fikiere u fo ho re whọ wọ uto* ra.”
11 Rekọ ọ tẹ kpahe kẹ ae nọ: “Ohwo nọ o siwi omẹ ọye ọ ta kẹ omẹ nọ, ‘Tọlọ uto* ra re whọ nya.’”
12 A tẹ nọe nọ: “Ono họ ohwo nọ ọ ta kẹ owhẹ nọ, ‘Tọlọ iẹe re whọ nya’?”
13 Rekọ ọzae nọ ẹyao riẹ o kpo no na ọ riẹ ohwo na ha, keme Jesu ọ lẹlẹ ruọ udevie ogbotu nọ e jọ etẹe na no.
14 Nọ onana o vrẹ no, Jesu ọ tẹ ruẹ ọzae na evaọ etẹmpol na ọ tẹ ta kẹe nọ: “Rri, ẹyao ra o kpo no. Whọ gbẹ raha uzi vievie he, re oware nọ u yoma vi oyena o siọ owhẹ ba ẹvia kẹ.”
15 Ọzae na ọ tẹ nyavrẹ, ọ tẹ ta kẹ ahwo Ju na nọ Jesu họ ohwo nọ o siwi ẹyao riẹ.
16 Fiki onana ahwo Ju na a te je kpokpo Jesu fikinọ o je ru eware nana evaọ Ẹdijala.
17 Rekọ ọ tẹ ta kẹ ae nọ: “Ọsẹ mẹ o gbe bi ru iruo rite enẹna, yọ me gbe bi ru iruo re.”
18 Fiki onana ahwo Ju na a jẹ rọ gwọlọ oghẹrẹ kpobi nọ a re ro kpei, keme orọnikọ ọ jẹ raha uzi Ẹdijala na ọvo ho rekọ ọ be jẹ ta nọ Ọghẹnẹ yọ Ọsẹ riẹ, bi ru omariẹ ẹrẹrẹe kugbe Ọghẹnẹ.
19 Fikiere Jesu ọ tẹ kpahe kẹ ae nọ: “Uzẹme uzẹme mẹ be ta kẹ owhai, Ọmọ na ọ rẹ sae rọ udu obọriẹ ru uvumọ oware he, rekọ ajokpaọ oware nọ ọ ruẹ nọ Ọsẹ na o bi ru. Keme eware kpobi nọ Ọsẹ na o bi ru, eye Ọmọ na o re ru re evaọ oghẹrẹ ovona.
20 Keme Ọsẹ na o you Ọmọ na, o te bi dhesẹ eware kpobi nọ o bi ru kẹe, yọ o ti dhesẹ eware nọ e rro vi enana rọ kẹe, re u gbe owhai unu.
21 Keme wọhọ epanọ Ọsẹ na ọ rẹ kpare enọ i whu no ze ọ vẹ kẹ ae uzuazọ na, ere ọvona Ọmọ na ọ rẹ kẹ ohwo kpobi nọ u je rie uzuazọ re.
22 Keme Ọsẹ na o re gu ohwo ọvo ẹdhọ họ, rekọ ọ rehọ ẹdhoguo na kpobi kẹ Ọmọ na no,
23 re ahwo kpobi a ruẹse rọ ọghọ kẹ Ọmọ na wọhọ epanọ a be rọ ọghọ kẹ Ọsẹ na. Ohwo kpobi nọ ọ be rọ ọghọ kẹ Ọmọ na ha yọ ọ be rọ ọghọ kẹ Ọsẹ na ha ọnọ o vi rie ze.
24 Uzẹme uzẹme mẹ be ta kẹ owhai, ohwo kpobi nọ o yo ẹme mẹ jẹ rọwo Ọnọ o vi omẹ ze o re wo uzuazọ ebẹdẹ bẹdẹ, a ti bruoziẹ kpei hi rekọ o no uwhu kpohọ uzuazọ no.
25 “Uzẹme uzẹme mẹ be ta kẹ owhai, oke o be tha, yọ oye ma rrọ na, nọ enọ i whu no i ti ro yo urru Ọmọ Ọghẹnẹ, enọ e kezọ kẹe a vẹ ziọ uzuazọ.
26 Keme wọhọ epanọ Ọsẹ na ọ jọ omariẹ wo uzuazọ na,* ere ọ kẹ Ọmọ na udu re ọ jọ omariẹ wo uzuazọ re.
27 Yọ ọ kẹ riẹ udu nọ o re ro gu ẹdhọ, keme ọye họ Ọmọ ohwo.
28 Wha jọ onana u gbe owhai unu hu keme oke o be tha nọ enọ e rrọ iki ekareghẹhọ kpobi a ti ro yo urru riẹ
29 a vẹ te nya via, enọ i ru eware iwoma a ve ti wo ẹkparomatha uzuazọ, enọ i ru eware iyoma kọ ẹkparomatha ẹdhoguo obrukpe.*
30 Mẹ rẹ sae rọ udu obọmẹ ru uvumọ oware he. Epanọ me yo me re ro bruoziẹ, yọ oziẹ okiẹrẹe me re bru, keme orọnikọ oreva obọmẹ mẹ be gwọlọ họ rekọ oreva ọnọ o vi omẹ ze.
31 “Mẹ ọvo me te bi se isẹri kpahe omobọ mẹ, isẹri mẹ yọ uzẹme he.
32 Ọfa jọ ọ riẹ nọ o bi se isẹri kpahe omẹ, yọ mẹ riẹ nọ isẹri nọ o bi se kpahe omẹ na uzẹme.
33 Wha vi ahwo bru Jọn, yọ o se isẹri kpahe uzẹme na no.
34 Rekọ, me du gwọlọ isẹri no obọ ohwo ze he, rekọ mẹ be ta eme nana re a ruẹsi siwi owhai.
35 Ohwo yena ọ jọ ukpẹ nọ u bi lo, yọ evaọ omoke jọ o ruọ owhai nọ wha rẹ ghọghọ gaga evaọ elo riẹ.
36 Rekọ me wo isẹri nọ e rro vi erọ Jọn, keme iruo nọ Ọsẹ mẹ ọ kẹ omẹ nọ me ru, nọ me bi ru na, i bi se isẹri inọ Ọsẹ na o vi omẹ ze.
37 Ofariẹ, Ọsẹ na ọnọ o vi omẹ ze o se isẹri kpahe omẹ no. Wha ri yo urru riẹ oke ovo ho yọ wha re ruẹ oghẹrẹ nọ ọ rrọ gbe he,
38 yọ ẹme riẹ ọ rrọ owhai eva ha, keme wha rọwo ọnọ o vi ze he.
39 “Wha be kiẹ Ikereakere na, keme wha bi roro nọ wha te rọ ẹkwoma rai wo uzuazọ ebẹdẹ bẹdẹ; yọ enana* họ enọ i se isẹri kpahe omẹ.
40 Ghele na wha gwọlọ nya bru omẹ ze he re wha sai wo uzuazọ.
41 Me du gwọlọ oruaro no obọ ahwo ze he,
42 rekọ mẹ riẹ ziezi inọ wha you Ọghẹnẹ evaọ udu rai hi.
43 Mẹ rọ odẹ Ọsẹ mẹ nyaze, rekọ wha jẹ omẹ rehọ họ. Otẹrọnọ omọfa jọ ọ tẹ rọ odẹ obọriẹ nyaze, wha te jẹe rehọ.
44 Ẹvẹ wha sae rọ rọwo kpakiyọ wha be jọ obọ ohwohwo gwọlọ oruaro, yọ wha be gwọlọ oruaro nọ u no obọ Ọghẹnẹ uzẹme ọvo na ze he?
45 Wha du roro ho inọ me ti gu owhai kẹ Ọsẹ na; ọjọ ọ riẹ nọ eme nọ o kere i bi gu owhai inọ wha ru thọ, ọye họ Mosis, ọnọ wha fi ẹruore rai họ.
46 Evaọ uzẹme, wha tẹ rọwo Mosis wha rẹ rọwo omẹ, keme o kere kpahe omẹ.
47 Rekọ wha gbẹ rọwo eware nọ o kere he, ẹvẹ wha sae rọ rọwo ẹme nọ mẹ be ta?”
Eme-Obotọ
^ Idhere esese nana nọ a bọ wọhọ ogebara na i wo edẹẹ evaọ tabọ tabọ nọ a tehe ehru rai ruru.
^ Hayo “ehwa.”
^ Hayo “ehwa.”
^ Hayo “ehwa.”
^ Hayo “ehwa.”
^ Hayo “jọ omariẹ wo okẹ uzuazọ na.”
^ Eware nọ a ti ro gu ae ẹdhọ na yọ enọ a ru nọ a kpare ae ze no.
^ Koyehọ, Ikereakere na.
