Jọn 6:1-71
6 Nọ onana o vrẹ no, Jesu ọ tẹ fa vrẹ kpohọ abọdekọ Abade Galili, hayo Taibirias.*
2 Yọ ogbotu obuobu a je lele iei, keme a jẹ ruẹ edhere igbunu nọ o je ro siwi enọ e be mọ.
3 Fikiere, Jesu o te kpobọ ehru ugbehru, ọ tẹ keria etẹe kugbe ilele riẹ.
4 Whaọ, Ehaa Ọnyavrẹ ahwo Ju ọ kẹle no.
5 Nọ Jesu ọ kpare ovao jẹ ruẹ ogbotu obuobu nọ a be nya bru rie ze, ọ tẹ ta kẹ Filip nọ: “Diẹse ma te jọ ruẹ ebrẹdi dẹ kẹ ahwo nana kpobi nọ a rẹ re?”
6 Rekọ, ọ nọ onọ nana rọ dawo iẹe, keme ọ riẹ oware nọ ọyomariẹ o bi ti ru.
7 Filip ọ tẹ ta kẹe nọ: “Ebrẹdi nọ i re te dinariọs* egba ivẹ e rẹ sai te ahwo na kpobi hi a tẹ make ghale ebrẹdi na umumutho.”
8 Olele riẹ jọ nọ a re se Andru, oniọvo Saemọn Pita ọ tẹ ta kẹe nọ:
9 “Ọmọzae ọsese jọ ọ rrọ etenẹ nọ o wo ikulu ebrẹdi ebali isoi gbe imiyei ivẹ. Rekọ eme enana i re te ru evaọ ogbotu nana?”
10 Jesu ọ tẹ ta nọ: “Wha ta kẹ ahwo na re a keria.” Whaọ, ẹbe ọ vọ oria na, fikiere a tẹ keria. Ezae nọ e jariẹ a bu te oware wọhọ idu isoi (5,000).
11 Jesu ọ tẹ tọlọ ebrẹdi na, nọ ọ lẹ yere Ọghẹnẹ no, ọ tẹ ghale iẹe kẹ enọ e keria na; epọvo na o ru re kpahe imiyei na, aikpobi a tẹ re eva vọ.
12 Rekọ nọ a re eva vọ no, ọ tẹ ta kẹ ilele riẹ nọ: “Wha koko ewẹ nọ i kiọkọ họ, re oware ovo o seba ẹraha kufiẹ.”
13 Fikiere a te koko ewẹ nọ ahwo na a re kiọkọ evaọ ikulu ebrẹdi isoi na họ, e vọ ikete ikpegbivẹ.
14 Nọ ahwo na a ruẹ iruo igbunu nọ o ru, a te muhọ ẹta nọ: “Ababọ avro, ọnana họ Ọruẹaro nọ a ta nọ ọ te ziọ akpọ na.”
15 Nọ Jesu ọ riẹ nọ a be te gwọlọ nyaze re a kru rie ro mu ovie, o te sioma rehọ wariẹ kpobọ ugbehru na, ọye ọvo ọ tẹ jọ etẹe.
16 Nọ owọwọ u te, ilele riẹ a te kpobọ abade na,
17 a tẹ ruọ okọ be fa abade na vrẹ kpobọ Kapaniọm. Whaọ, oke nana yọ oria kpobi u muebi no, yọ Jesu ọ re nya bru rai ze he.
18 Ofariẹ, ẹkporo ọ jọ abade na fiki ofou ọgaga nọ o je fou.
19 Rekọ nọ a bi thabọ te oware wọhọ emaele esa hayo ene no, a tẹ ruẹ Jesu nọ ọ be nya evaọ ehru abade na jẹ be nya kẹle okọ na, ozọ u te mu ae.
20 Rekọ ọ tẹ ta kẹ ae nọ: “Mẹ wha be ruẹ na; ozọ u mu owhai hi!”
21 Kẹsena o tẹ ruọ ae nọ a re fi ei họ okọ na, nọ u ri kri hi na, okọ na o tẹ nwani te obọ okpa nọ a je bi kpohọ na.
22 Okiokiọ riẹ, ogbotu ahwo nọ a daji abọdekọ abade na a tẹ te kareghẹhọ nọ okọ ofa o jọ etẹe he ajokpaọ okọ osese ovo, gbe nọ Jesu ọ ruọ okọ na kugbe ilele riẹ hẹ, ae ọvo a bi vrẹ.
23 Rekọ ekọ nọ i no obọ Taibirias ze i bi kpahe kẹle oria nọ a jọ re ebrẹdi okenọ Olori na ọ lẹ yere Ọghẹnẹ no.
24 Fikiere ogbotu na a tẹ nyai rri, rekọ nọ a ruẹ nọ Jesu hayo ilele riẹ a rrọ etẹe he, a tẹ ruọ ekọ na a tẹ ziọ Kapaniọm te gwọlọ Jesu.
25 Nọ a duku ei evaọ abọdekọ abade na a tẹ nọe nọ: “Owuhrẹ, oke vẹ who ro te obonẹ?”
26 Jesu ọ tẹ kpahe kẹ ae nọ: “Uzẹme uzẹme mẹ be ta kẹ owhai, wha be gwọlọ omẹ orọnọ fiki eka nọ wha ruẹ hẹ, rekọ fiki ebrẹdi nọ wha re eva e tẹ vọ owhai.
27 Wha du ru iruo kẹ emu nọ ọ rẹ raha ha, rekọ rọkẹ emu nọ ọ rẹ kẹ uzuazọ ebẹdẹ bẹdẹ, onọ Ọmọ ohwo ọ te kẹ owhai; keme ọnana họ ọnọ Ọsẹ na, Ọghẹnẹ omariẹ, o kpoka ọjẹrehọ riẹ họ no.”
28 Fikiere a tẹ nọe nọ: “Eme ma re ru hrọ re ma ru iruo Ọghẹnẹ?”
29 Jesu ọ tẹ kẹ ae uyo nọ: “Onana họ iruo Ọghẹnẹ, inọ wha re fi ẹrọwọ họ ọnọ o vi ze.”
30 Kẹsena a tẹ nọe nọ: “Kọ didi oka who ti dhesẹ kẹ omai, re ma ruẹ jẹ rọwo owhẹ? Iruo igbunu vẹ who ti ru?
31 Esẹ-ode mai a re emana evaọ obọ udhude na, wọhọ epanọ a kere nọ: ‘Ọ kẹ rai ebrẹdi no obọ odhiwu ze re a re.’”
32 Jesu ọ tẹ ta kẹ ae nọ: “Uzẹme uzẹme mẹ be ta kẹ owhai, orọnọ uvi ebrẹdi nọ o no obọ odhiwu ze na Mosis ọ kẹ owhai hi, rekọ Ọsẹ mẹ ọ be kẹ owhai uvi ebrẹdi nọ o no obọ odhiwu ze na.
33 Keme ebrẹdi Ọghẹnẹ họ ọnọ o no obọ odhiwu ze te kẹ akpọ na uzuazọ.”
34 Fikiere a tẹ ta kẹe nọ: “Olori, hae kẹ omai ebrẹdi nana ẹsikpobi.”
35 Jesu ọ tẹ ta kẹ ae nọ: “Mẹ họ ebrẹdi uzuazọ na. Ohwo kpobi nọ ọ nya bru omẹ ze ohọo u re gbe kpei ofa ha, yọ ohwo kpobi nọ o fi ẹrọwọ họ omẹ uruame u re gbe kpei ofa ha.
36 Rekọ wọhọ epanọ mẹ ta kẹ owhai no vẹre, wha ruẹ omẹ no ghele na wha rọwo ho.
37 Ahwo kpobi nọ Ọsẹ na ọ kẹ omẹ a te nya bru omẹ ze, yọ me ti le ọnọ ọ nya bru omẹ ze vrẹ vievie he;
38 keme me no obọ odhiwu ze ti ru oreva obọmẹ hẹ, rekọ oreva ọnọ o vi omẹ ze.
39 Onana họ oreva ọnọ o vi omẹ ze, inọ ọvuọvo evaọ usu ahwo kpobi nọ ọ kẹ omẹ na o re vru hu, rekọ inọ mẹ rẹ kpare ae ze evaọ ẹdẹ urere na.
40 Keme onana họ oreva Ọsẹ mẹ, inọ ohwo kpobi nọ o vuhu Ọmọ na je fi ẹrọwọ họ iẹe o re wo uzuazọ ebẹdẹ bẹdẹ, yọ mẹ te kpare iẹe ze evaọ ẹdẹ urere na.”
41 Kẹsena ahwo Ju na a te muhọ ẹgo kpahe iẹe fikinọ ọ ta nọ: “Mẹ họ ebrẹdi nọ o no obọ odhiwu ze na.”
42 A tẹ be ta nọ: “Kọ ogbẹrọnọ Jesu ọna, ọmọ Josẹf, nọ ma riẹ ọsẹ avọ oni riẹ? Ẹvẹ ọ be rọ ta nọ, ‘Obọ odhiwu me no ze’?”
43 Jesu ọ tẹ kpahe kẹ ae nọ: “Wha seba ẹgo evaọ udevie rai.
44 Ohwo ọvo ọ rẹ sae nya bru omẹ ze he ajokpanọ Ọsẹ na, ọnọ o vi omẹ ze, o si rie se omẹ, yọ mẹ te kpare iẹe ze evaọ ẹdẹ urere na.
45 A kere fihọ ebe Eruẹaro na nọ: ‘Jihova* o ti wuhrẹ ai kpobi.’ Ohwo kpobi nọ ọ gaviezọ kẹ Ọsẹ na je wuhrẹ mi ei ọ rẹ nya bru omẹ ze.
46 Ohwo ọvo ọ re ruẹ Ọsẹ na ha, ajokpaọ ọnọ o no obọ Ọghẹnẹ ze; ọnana ọ ruẹ Ọsẹ na no.
47 Uzẹme uzẹme mẹ be ta kẹ owhai, ohwo kpobi nọ ọ rọwo o re wo uzuazọ ebẹdẹ bẹdẹ.
48 “Mẹ họ ebrẹdi uzuazọ na.
49 Esẹ-ode rai a re emana evaọ udhude na ghele na a whu.
50 Rekọ ọnana họ ebrẹdi nọ o no obọ odhiwu ze, re ohwo kpobi nọ ọ re riẹ o gbe whu hu.
51 Mẹ họ ebrẹdi uzuazọ nọ o no obọ odhiwu ze. Ohwo kpobi nọ ọ re ebrẹdi nana ọ te rria bẹdẹ bẹdẹ; yọ ebrẹdi nọ mẹ te kẹ họ uwo mẹ nọ o te kẹ akpọ na uzuazọ.”
52 Ahwo Ju na a te bi lele ohwohwo si ikẹ inọ: “Ẹvẹ ọzae nana ọ rẹ rọ kẹ omai uwo riẹ re ma re?”
53 Fikiere Jesu ọ tẹ ta kẹ ae nọ: “Uzẹme uzẹme mẹ be ta kẹ owhai, ajokpanọ wha rẹ re uwo Ọmọ ohwo jẹ da azẹ riẹ, o gbẹ rrọ ere he wha rẹ jọ omarai wo uzuazọ họ.
54 Ohwo kpobi nọ ọ re uwo mẹ jẹ da azẹ mẹ o re wo uzuazọ ebẹdẹ bẹdẹ, yọ mẹ te kpare iẹe ze evaọ ẹdẹ urere na;
55 keme uwo mẹ yọ uvi emu, azẹ mẹ yọ uvi udi.
56 Ohwo kpobi nọ ọ re uwo mẹ jẹ da azẹ mẹ ọ rrọ usu kugbe omẹ, yọ mẹ rrọ usu kugbei.
57 Wọhọ epanọ Ọsẹ nọ ọ rrọ uzuazọ na o vi omẹ ze yọ mẹ rrọ uzuazọ fiki Ọsẹ na, ere ọvona re ọnọ ọ re uwo mẹ ọ te jọ uzuazọ fiki mẹ.
58 Ọnana họ ebrẹdi nọ o no obọ odhiwu ze. Orọnikọ o wọhọ onọ esẹ-ode rai a re a te whu ghele he. Ohwo kpobi nọ ọ re ebrẹdi nana ọ te rria bẹdẹ bẹdẹ.”
59 Ọ ta eme nana okenọ ọ jọ uwou-egagọ je wuhrẹ evaọ Kapaniọm.
60 Nọ a yo onana, ilele riẹ buobu a tẹ ta nọ: “Ẹme nana ọ tọtọ kẹhẹ; ono ọ rẹ sae gaviezọ kẹe?”
61 Rekọ fikinọ Jesu ọ riẹ nọ ilele riẹ a be go kpahe ẹme nọ ọ ta na, ọ tẹ nọ ae nọ: “Kọ ẹme nana ọ lẹliẹ owhai zoruẹ?
62 Kọ ẹvẹ wha ti ru nọ wha tẹ ruẹ Ọmọ ohwo nọ o bi muvrẹ kpohọ obonọ ọ jọ vẹre?
63 Ẹzi na ọ rẹ kẹ uzuazọ; uwo na u wo iruo vievie he. Eme nọ mẹ ta kẹ owhai na e rọwokugbe ẹzi ọfuafo na yọ e rẹ kẹ uzuazọ.
64 Rekọ ejọ e rrọ usu rai na nọ e rọwo ho.” Keme no emuhọ ze Jesu ọ riẹ enọ e rọwo ho gbe ọnọ o ti vivie iei.
65 Ọ tẹ ta nọ: “Oyejabọ nọ mẹ rọ ta kẹ owhai nọ, ohwo ọvo ọ rẹ sae nya bru omẹ ze he ajokpanọ Ọsẹ na ọ kẹ riẹ uvẹ.”
66 Fiki onana, ilele riẹ buobu a te zihe bru eware nọ a nya seba, a gbe je lele iei hi.
67 Fikiere Jesu ọ tẹ ta kẹ Ikpegbivẹ na nọ: “Kọ wha gwọlọ nyavrẹ re?”
68 Saemọn Pita ọ tẹ kẹe uyo nọ: “Olori, ono ma rẹ nya bru? Who wo eme nọ e rẹ kẹ uzuazọ ebẹdẹ bẹdẹ.
69 Ma rọwo no jẹ riẹ nọ whẹ họ Ọrẹri Ọghẹnẹ.”
70 Jesu ọ tẹ ta kẹ ae nọ: “Kọ ogbẹrọnọ whai ikpegbivẹ mẹ salọ? Rekọ ọvo rai jọ yọ ọnọ ọ rẹ ta ahwo raha.”*
71 Judas, ọmọ Saemọn Iskariọt ọ jẹ ta kpahe na, keme ọnana o bi ti vivie iei dede nọ ọ jọ omọvo Ikpegbivẹ na.
