Jọn 7:1-52
7 Nọ onana o vrẹ no, Jesu ọ tẹ ruabọhọ iruo riẹ no oria ruọ oria evaọ Galili, keme ọ gwọlọ kpobọ Judia ha fikinọ ahwo Ju a jẹ gwọlọ iẹe kpe.
2 Rekọ Ehaa Iwou-Udhu* ahwo Ju na ọ be kẹle no.
3 Fikiere inievo riẹ a tẹ ta kẹe nọ: “No etenẹ re who kpobọ Judia re ilele ra a ruẹ iruo nọ who bi ru re.
4 Keme nọ ohwo ọ tẹ be gwọlọ nọ ahwo kpobi a riẹe o re ru oware ovo evaọ idhere he. Nọ who bi ru eware nana, dhesẹ omara kẹ akpọ na.”
5 Inievo riẹ a je fi ẹrọwọ họ iẹe he.
6 Fikiere Jesu ọ tẹ ta kẹ ae nọ: “Oke mẹ u ri te he, rekọ wha wo oke rai ẹsikpobi.
7 Akpọ na o wo uvumọ ẹjiroro nọ o re ro mukpahe owhai hi rekọ o mukpahe omẹ, keme me bi se isẹri kpahe iẹe inọ iruo riẹ e rrọ muomu.
8 Wha kpobọ ehaa na; me bi kpobọ ehaa nana tao ho keme oke mẹ u ri te ziezi hi.”
9 Fikiere nọ ọ ta eme nana kẹ ai no, ọ tẹ daji Galili.
10 Rekọ nọ inievo riẹ a kpobọ ehaa na no, ọyomariẹ ọ tẹ nya re, rekọ ọ lẹlẹ nya o dhesẹ oma via ha.
11 Fikiere, ahwo Ju na a te mu ei họ ẹgwọlọ evaọ obọ ehaa na, yọ a be ta nọ: “Bovẹ ọzae na ọ rrọ?”
12 Ogbotu na a jẹ ta eme imimẹ kpahe iẹe gaga. Ejọ e jẹ ta nọ: “Emamọ ohwo ọ rrọ.” Efa e jẹ ta nọ: “Emamọ ohwo ọ rrọ họ. O bi su ogbotu na thọ.”
13 Rekọ ohwo ọvo ọ jẹ ta ẹme kpahe iẹe evaọ ẹgbede he fiki ozọ ahwo Ju na.
14 Nọ a ru ehaa na te udevie no, Jesu o te kpohọ etẹmpol na o te mu ahwo họ ewuhrẹ.
15 U te gbe ahwo Ju na unu, a tẹ be ta nọ: “Ẹvẹ ọzae nana ọ sae rọ riẹ Ikereakere na te enẹ kpakiyọ o kpohọ isukulu egagọ* mai hi?”
16 Jesu ọ tẹ kpahe kẹ ae nọ: “Eware nọ me bi wuhrẹ emẹ hẹ, rekọ erọ ọnọ o vi omẹ ze.
17 Ohwo jọ ọ tẹ gwọlọ ru oreva Ọghẹnẹ, ọ te riẹ sọ obọ Ọghẹnẹ eware nọ me bi wuhrẹ na i no ze hayo orọ obọmẹ mẹ be ta.
18 Ohwo kpobi nọ ọ be ta orọ obọriẹ ọ be gwọlọ oruaro obọriẹ; rekọ ohwo kpobi nọ ọ be gwọlọ oruaro ọnọ o vi rie ze, ọnana yọ ọrọ uzẹme, yọ emuemu ọvo ọ rrọ eva riẹ hẹ.
19 Mosis ọ kẹ owhai Uzi na, o gbẹ rrọ ere? Rekọ whai ọvuọvo o bi koko Uzi na ha. Fikieme wha be rọ gwọlọ omẹ kpe?”
20 Ogbotu na a tẹ kpahe kẹe nọ: “Idhivẹri ọ rrọ owhẹ oma. Ono ọ be gwọlọ owhẹ kpe?”
21 Jesu ọ tẹ kpahe kẹ ae nọ: “Oware ovuọvo me ru, u te gbe owhai kpobi unu.
22 Fikiere, wha roro kpahe onana: Mosis ọ kẹ owhai uzi oyawo—orọnikọ obọ Mosis u jo muhọ họ rekọ obọ esẹ-ode na—yọ wha rẹ yawo ohwo evaọ ẹdijala.
23 Otẹrọnọ re a siọ Uzi Mosis ba ẹraha, a rẹ sae yawo ohwo evaọ ẹdijala, kọ wha be dheva kẹ omẹ fikinọ me siwi ohwo nọ ọ be mọ evaọ ẹdijala?
24 Wha gbẹ rọ eware okafe gheghe ro bruoziẹ hẹ, rekọ wha bruoziẹ okiẹrẹe.”
25 Ahwo jọ nọ a be rria Jerusalẹm a te muhọ ẹta nọ: “Kọ ogbẹrọnọ ọzae nọ a be gwọlọ kpe na ọna?
26 Rekọ, rri! ọ be jọ ẹgbede ta ẹme, yọ a be kpọe unu hu. Kọ o sae jọnọ isu na a vuhumu no inọ ọye họ Kristi na?
27 Whaọ, ma riẹ oria nọ ọzae nana o no ze; rekọ nọ Kristi na ọ te nyaze, ohwo ọvo ọ te riẹ oria nọ o no ze he.”
28 Epanọ Jesu o bi ro wuhrẹ evaọ etẹmpol na, ọ tẹ kpare urru riẹ ta nọ: “Wha riẹ omẹ wha tẹ jẹ riẹ oria nọ me no ze. Yọ udu obọmẹ mẹ rọ nyaze he, rekọ Ọnọ o vi omẹ ze ọ ginẹ rrọ, yọ wha riẹ riẹ hẹ.
29 Mẹ riẹ riẹ, keme mẹ yọ ọtota riẹ, Ọye o vi omẹ ze.”
30 Fikiere a tẹ be gwọlọ epanọ a re ro kru rie, rekọ ohwo ọvo ọ sai kru rie he keme auwa riẹ o ri te he.
31 Ghele na, ibuobu evaọ ogbotu na a fi ẹrọwọ họ iẹe, yọ a jẹ ta nọ: “Nọ Kristi na ọ tẹ ze, kọ o ti ru eware igbunu nọ i vi erọ ọzae nana?”
32 Nọ otu Farisi na a yo ogbotu na nọ a be lẹlẹ ta eme nana kpahe iẹe, ilori izerẹ na gbe otu Farisi na a te vi elakpa nya re a kru* rie.
33 Kẹsena Jesu ọ tẹ ta nọ: “Omoke kakao mẹ te gbẹ jọ kugbe owhai re me te zihe bru Ọnọ o vi omẹ ze.
34 Wha te gwọlọ omẹ, rekọ wha te ruẹ omẹ hẹ, yọ oria nọ mẹ te jọ wha te sae nyaze iẹe he.”
35 Fikiere ahwo Ju na a tẹ be ta kẹ omoma rai nọ: “Bovẹ ọzae nana ọ be gwọlọ nya nọ ma te gbẹ rọ ruẹ e riẹ hẹ? Kọ ọ be gwọlọ nya bru ahwo Ju nọ e vaha fihọ udevie ahwo Griki re o wuhrẹ ahwo Griki re?
36 Eme họ otọ ẹme riẹ na inọ, ‘Wha te gwọlọ omẹ, rekọ wha te ruẹ omẹ hẹ, yọ oria nọ mẹ te jọ wha te sae nyaze iẹe he’?”
37 Evaọ ẹdẹ urere na, nọ ọ rrọ ẹdẹ ologbo ọrọ ehaa na, Jesu o te dikihẹ jẹ kpare urru riẹ ta nọ: “Otẹrọnọ uruame u bi kpe ohwo jọ, jọ ọ nya bru omẹ ze re ọ da.
38 Ohwo kpobi nọ o fi ẹrọwọ họ omẹ, o te via kẹe wọhọ epanọ ikereakere na e ta inọ: ‘Eyeri-ame nọ ọ rẹ kẹ uzuazọ o ti kpo hwẹ no obọ edidi eva riẹ ze.’”
39 Rekọ ọ ta onana fiki ẹzi nọ o bi ti te enọ i fi ẹrọwọ họ iẹe obọ; keme rite oke yena yọ ẹzi na o ri te ai obọ họ keme a re kẹ Jesu oruaro ho.
40 Ejọ evaọ ogbotu na nọ i yo eme nana a tẹ be ta nọ: “Ababọ avro, ọruẹaro nọ ọ be tha na ọna.”
41 Efa e jẹ ta nọ: “Ọna họ Kristi na.” Rekọ ejọ e jẹ ta nọ: “Kristi na o ti no Galili ze he, manikọ ere he?
42 Kọ ikereakere na e gbẹ ta nọ Kristi na o ti no uyẹ Devidi gbe Bẹtlẹhẹm ze, ẹwho nọ Devidi ọ jọ?”
43 Fikiere, ohẹriẹ o tẹ jọ udevie ogbotu na fiki riẹ.
44 Rekọ ejọ rai a jẹ gwọlọ kru* rie, rekọ ohwo ọvo ọ sai kru rie he.
45 Kẹsena elakpa na a zihe ze, ilori izerẹ gbe otu Farisi na a tẹ nọ ae nọ: “Fikieme wha gbe ro mu ei ze he?”
46 Elakpa na a tẹ kuyo nọ: “Ma re ruẹ ohwo nọ ọ ta ẹme enẹ vievie he.”
47 Otu Farisi na a tẹ kpahe kẹ ae nọ: “Thakpinọ a su owhai thọ no re ha?
48 Kọ osu mai jọ hayo ohwo Farisi jọ o fi ẹrọwọ họ iẹe no?
49 Rekọ ogbotu nana nọ a riẹ Uzi na ha na yọ ahwo nọ a duwu iyei.”
50 Nikodimọs, ọnọ ọ nya bru rie ẹdẹjọ na, ọnọ ọ rrọ omọvo rai, ọ tẹ ta kẹ ae nọ:
51 “Wọhọ epanọ Uzi mai o ta, ma re brukpe ohwo ho ajokpanọ ma re yo mi ei tao jẹ riẹ oware nọ o bi ru, o gbẹ rrọ ere?”
52 A tẹ kpahe kẹe nọ: “Whẹ yọ ohwo Galili re? Nabe kiẹ, whọ te ruẹ oria ovo nọ a jọ ta nọ ọruẹaro jọ o ti no Galili ze he.”*
Eme-Obotọ
^ Hayo “Iwou-Owhre.”
^ Koyehọ, isukulu nọ a rẹ jọ wuhrẹ otu-iwuhrẹ na.
^ Hayo “mu ei.”
^ Hayo “mu ei.”
^ Ebe Ebaibol anwae buobu nọ a rọ obọ kere nọ a fievahọ i wo owọ avọ 53 rite uzou avọ 8 owọ avọ 11 ho.
