Jọn 9:1-41
9 Epanọ ọ jẹ rọ nyavrẹ na, ọ tẹ ruẹ ọzae jọ nọ a yẹ tuaro.
2 Ilele riẹ a tẹ nọe nọ: “Owuhrẹ, ono ọ raha uzi, ọzae nana manikọ ọsẹgboni riẹ, nọ o soriẹ ze nọ a ro yẹi tuaro?”
3 Jesu ọ tẹ kuyo nọ: “Orọnikọ ọzae nana hayo ọsẹgboni riẹ a raha uzi hi, rekọ re a rọ ẹkwoma riẹ dhesẹ iruo Ọghẹnẹ via.
4 Ma re ru iruo Ọnọ o vi omẹ ze hrọ nọ o gbẹ rrọ oke uvo na; aso ọ be tha nọ ohwo ọvo ọ gbẹ sai ru iruo ho.
5 Nọ mẹ rrọ akpọ na, mẹ họ elo akpọ na.”
6 Nọ ọ ta eme nana no, o te nwo eya ku otọ o te gbe eya na kugbe ẹkpẹ, ọ tẹ rehọ iẹe wholo ibiaro ọzae na
7 ọ tẹ ta kẹe nọ: “Nyae wozẹ ovao ra evaọ ẹtẹre Siloam” (onọ otofa riẹ o rrọ “Onọ ame o re kporo no ze”). Ọ tẹ nyae wozẹ ovao, o te mu ude họ ẹruẹ.
8 Kẹsena ahwo okegbe riẹ gbe ahwo nọ a riẹ nọ ọ jọ ọyareware vẹre a te muhọ ẹta nọ: “Kọ ogbẹrọnọ ọzae nana ọ jẹ hae keria yare eware na?”
9 Ejọ e jẹ ta nọ: “Ọye.” Efa e jẹ ta nọ: “Ọye he, rekọ o tho rie.” Ọzae na ọ tẹ be ta nọ: “Mẹ họ ọye.”
10 Fikiere a tẹ nọe nọ: “Kọ ẹvẹ ibiaro ra i ro rovie?”
11 Ọ tẹ kuyo nọ: “Ọzae nọ a re se Jesu na ọye o gbe eya kugbe ẹkpẹ ro wholo ibiaro mẹ ọ tẹ ta kẹ omẹ nọ, ‘Nyae wozẹ ovao ra evaọ Siloam.’ Mẹ tẹ nyae wozẹ ovao mẹ, me te mu ude họ ẹruẹ.”
12 A tẹ nọe nọ: “Diẹse ọzae na ọ rrọ?” Ọ tẹ ta nọ: “Mẹ riẹ hẹ.”
13 A te kru ọzae nọ o tuaro vẹre na bru otu Farisi na.
14 Whaọ ẹdẹ nọ Jesu o ro gbe eya kugbe ẹkpẹ ro rovie ibiaro riẹ na o jọ Ẹdijala.
15 Fikiere otu Farisi na a te mu ọzae na họ ẹnọ epanọ o ro mu ude họ ẹruẹ. Ọ tẹ ta kẹ ae nọ: “O gbe eya kugbe ẹkpẹ ọ tẹ rehọ iẹe wholo ibiaro mẹ, mẹ tẹ nyae wozẹ ovao mẹ, me te mu ude họ ẹruẹ.”
16 Otu Farisi na jọ a te muhọ ẹta nọ: “Ọzae nana yọ ohwo Ọghẹnẹ hẹ, keme o bi koko Ẹdijala ha.” Efa e ta nọ: “Ẹvẹ ohwo nọ ọ rrọ ọrahauzi ọ sai ro ru oware igbunu utioye?” Fikiere ohẹriẹ o tẹ jọ udevie rai.
17 A tẹ wariẹ nọ ọzae nọ o tuaro vẹre na nọ: “Eme whọ rẹ sae ta kpahe iẹe nọ orọnọ ibiaro ra o rovie na?” Ọzae na ọ tẹ ta nọ: “Ọruẹaro ọ rrọ.”
18 Rekọ ahwo Ju na a jẹ rọwo ho inọ ọzae na o tuaro vẹre kọ obọnana o mu ude họ ẹruẹ, bẹsenọ a ro se ọsẹgboni riẹ ze.
19 A tẹ nọ ae nọ: “Kọ ọmọ rai nọ wha ta nọ a yẹ tuaro na ọna? Kọ ẹvẹ ọ be rọ ruẹ ude enẹna?”
20 Ọsẹgboni riẹ a tẹ kuyo nọ: “Ma riẹ inọ nọ ọmọ mai gbe nọ o tuaro okenọ ma yẹi.
21 Rekọ epanọ o ro mu ude họ ẹruẹ, ma riẹ hẹ; yọ ma riẹ ohwo nọ o rovie ibiaro riẹ hẹ. Wha nọe. Ọ kpako te ohwo no. Jọ ọye ọvo ọ rọ unu riẹ ta.”
22 Ọsẹgboni riẹ a ta eme nana fikinọ a jẹ dhozọ ahwo Ju na, keme ahwo Ju na a ta mu no inọ otẹrọnọ ohwo jọ ọ ta via nọ ọye họ Kristi na, a re le ohwo yena no uwou-egagọ na.
23 Oyejabọ nọ ọsẹgboni riẹ a rọ ta nọ: “Ọ kpako te ohwo no. Wha nọe.”
24 Fikiere a tẹ wariẹ se ọzae nọ o tuaro vẹre na a tẹ ta kẹe nọ: “Kẹ Ọghẹnẹ oruaro; ma riẹ nọ ọzae nana yọ ọrahauzi.”
25 Ọ tẹ kpahe kẹ ae nọ: “Sọ ọrahauzi ọ rrọ mẹ riẹ hẹ. Oware nọ mẹ riẹ họ, me tuaro vẹre, rekọ enẹna mẹ be ruẹ ude.”
26 Kẹsena a tẹ nọe nọ: “Eme o ru kẹ owhẹ? Ẹvẹ o ro rovie ibiaro ra?”
27 Ọ tẹ kẹ ae uyo nọ: “Mẹ vuẹ owhai no vẹre, rekọ wha gaviezọ họ. Fikieme wha rọ gwọlọ wariẹ yoi? Manikọ wha gwọlọ jọ ilele riẹ re?”
28 A tẹ rọ ẹkoko ta kẹe nọ: “Whẹ yọ olele ọzae yena, rekọ mai yọ ilele Mosis.
29 Ma riẹ nọ Ọghẹnẹ ọ ta ẹme kẹ Mosis, rekọ ọzae nana, ma riẹ obonọ o no ze he.”
30 Ọzae na ọ tẹ kpahe kẹ ae nọ: “Onana u gbunu kẹhẹ, inọ wha riẹ obonọ o no ze he, yọ o rovie ibiaro mẹ.
31 Ma riẹ nọ Ọghẹnẹ ọ rẹ gaviezọ kẹ erahaizi hi, rekọ ohwo o te wo ozodhẹ Ọghẹnẹ je bi ru oreva riẹ, ọ rẹ gaviezọ kẹe.
32 No anwae ze ma ri yo ho inọ ohwo jọ o rovie ibiaro ohwo nọ a yẹ tuaro.
33 Ọzae nana o gbe no obọ Ọghẹnẹ ze he, ọ hae sai ru oware ovo vievie he.”
34 A tẹ kpahe kẹe nọ: “A yẹ owhẹ avọ izieraha nọ e da owhẹ oma fia, ghele na who bi wuhrẹ omai?” A te lei no uwou-egagọ na!
35 Jesu o te yo nọ a le rie no uwou-egagọ na no, nọ ọ ruẹ e riẹ, ọ tẹ nọe nọ: “Kọ who fi ẹrọwọ họ Ọmọ ohwo?”
36 Ọzae na ọ tẹ nọe nọ: “Ọga, ono họ ọye, re me fi ẹrọwọ họ iẹe?”
37 Jesu ọ tẹ ta kẹe nọ: “Whọ ruẹ e riẹ no, evaọ uzẹme, ọye o bi lele owhẹ ta ẹme na.”
38 Ọ tẹ ta nọ: “Olori, me fi ẹrọwọ họ iẹe.” Ọ tẹ rọ uzou kpotọ kẹe.
39 Jesu ọ tẹ ta nọ: “Fiki ẹdhoguo nana mẹ rọ ziọ akpọ na, re enọ e be ruẹ ude he a ruẹse ruẹ ude, gbe re enọ e be ruẹ ude a ruẹsi tuaro.”
40 Nọ otu Farisi nọ e jọ etẹe kugbei a yo eme nana, a tẹ ta kẹe nọ: “Kọ ma tuaro re?”
41 Jesu ọ tẹ ta kẹ ae nọ: “O hae jọnọ wha tuaro, wha hai ti wo uzioraha ovo ho. Rekọ wha be ta nọ, ‘Ma be ruẹ ude.’ A te rọ izieraha rai rọvrẹ owhai hi.”
