Ahwo Filipai 1:1-30
1 Pọl avọ Timoti, erigbo Kristi Jesu, ro se erezi na kpobi nọ e rrọ usu kugbe Kristi Jesu nọ e rrọ Filipai, gbe esẹro avọ idibo iruiruo:
2 Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.
3 Me re yere Ọghẹnẹ mẹ ẹsikpobi nọ mẹ tẹ kareghẹhọ owhai
4 evaọ olẹ-ayare mẹ kpobi nọ mẹ be lẹ fiki rai kpobi. Mẹ be lẹ olẹ-ayare kpobi avọ oghọghọ,
5 fiki obọ nọ wha bi fihọ* evaọ ẹwhaharo usi uwoma na no ẹdẹ ọsosuọ ze rite enẹna.
6 Keme u mu omẹ ẹro nọ ọnọ ọ jọ oma rai mu iruo iwoma họ na o ti ru ei te urere bọo ẹdẹ Kristi Jesu.
7 U kiehọ re me roro enẹ kpahe owhai kpobi keme me wo owhai họ iroro, whai nọ i bi lele omẹ wo erere no uwowou ulogbo Ọghẹnẹ ze nọ e be tha omẹ uke evaọ uwou-odi nọ mẹ rrọ gbe evaọ ẹthọ usi uwoma na je ru ei dikihẹ evaọ abọ egọmeti.
8 Ọghẹnẹ họ osẹri mẹ inọ mẹ gwọlọ ruẹ owhai kpobi, keme me wo ọkpọ uyoyou Kristi Jesu kẹ owhai.
9 Olẹ mẹ ẹsikpobi họ re uyoyou rai u gbe dhe ẹruẹruọ avọ eriariẹ egbagba gbe orimuo kpobi;
10 re wha sai vuhu eware nọ e mae roja, wha vẹ sae kare afuẹwẹ jẹ siọ amọfa ba ezoruẹ ri bọo ẹdẹ Kristi;
11 gbe re wha sae rọ ẹkwoma Jesu Kristi vọ avọ ibi ikiẹrẹe nọ e rẹ wha orro gbe ajiri se Ọghẹnẹ.
12 Whaọ mẹ gwọlọ re wha riẹ, inievo, inọ eware nọ e via kẹ omẹ i fiobọhọ no evaọ ẹnyaharo usi uwoma na,
13 te epanọ elakpa nọ i bi rou* Ọba na kpobi gbe amọfa kpobi a rọ riẹ no inọ fiki Kristi mẹ rọ rrọ uwou-odi.
14 Whaọ inievo mai buobu evaọ Olori na a wo udu no fiki uwou-odi nọ mẹ rrọ, yọ a bi dhesẹ aruọwha vi epaọ anwẹdẹ evaọ ẹta ẹme Ọghẹnẹ ababọ ozodhẹ.
15 Uzẹme, ahwo jọ a be rọ ihri-eriọ gbe ẹwhọ whowho ovuẹ kpahe Kristi, rekọ efa a be rọ emamọ eva ru ei.
16 Enọ e be rọ emamọ eva ru ei na a bi whowho ovuẹ kpahe Kristi fiki uyoyou, keme a riẹ nọ a rehọ omẹ mu re mẹ thọ usi uwoma na;
17 rekọ otu ọdekọ na a bi ru ei fiki oma-uhrowo, orọnikọ avọ emamọ ẹjiroro ho, keme a gwọlọ wha ukpokpoma se omẹ evaọ uwou-odi nọ mẹ rrọ na.
18 Eme u bi no onana ze? Oghẹrẹ kpobi nọ o rrọ kẹhẹ, te a ru rie avọ ẹghẹ hayo evaọ uzẹme, a bi whowho odẹ Kristi, yọ mẹ be ghọghọ fiki onana. Evaọ uzẹme, mẹ te gbẹ ghọghọ
19 keme mẹ riẹ nọ onana o te wha esiwo se omẹ fiki olẹ-ayare rai gbe uketha ẹzi Jesu Kristi.
20 Onana o rọwokugbe irẹro egaga gbe ẹruore nọ me wo inọ oma o te vuọ omẹ vievie he, rekọ fiki ẹme nọ mẹ be ta ududu, Kristi o ti wo orro wọhọ epaọ anwẹdẹ ẹkwoma oma mẹ, te mẹ rrọ uzuazọ hayo me whu.
21 Keme rọkẹ omẹ, mẹ tẹ rrọ uzuazọ, mẹ rrọ uzuazọ kẹ Kristi, yọ me te whu me wo erere.
22 Whaọ mẹ tẹ gbẹ rrọ uzuazọ, me ti gbe ru iruo buobu; ghele na mẹ be ta onọ mẹ salọ via ha.
23 Mẹ riẹ onọ mẹ rẹ salọ evaọ eware ivẹ nana ha, keme o rrọ isiuru mẹ re a siobọno omẹ re mẹ jọ kugbe Kristi, keme oye o mai woma.
24 Rekọ, o mae roja re mẹ gbẹ jọ uzuazọ evaọ otọakpọ na fiki rai.
25 Fikinọ onana u mu omẹ ẹro, mẹ riẹ nọ mẹ te gbẹ jariẹ jẹ jọ kugbe owhai re wha gbe wo ẹnyaharo je wo oghọghọ evaọ ẹrọwọ na,
26 re nọ mẹ tẹ wariẹ rrọ kugbe owhai, oghọghọ nọ wha rọ rrọ ilele Kristi Jesu o vẹ da owhai oma fia.
27 Thakpinọ wha yeri evaọ oghẹrẹ nọ u fo usi uwoma kpahe Kristi na, re o tẹ make rọnọ mẹ nyaze te ruẹ owhai hayo mẹ nyaze he, me ve yo kpahe owhai jẹ riẹ nọ wha dikihẹ ga evaọ ẹzi ọvo, be rọ okugbe ọvo họre kẹ ẹrọwọ nọ wha wo fiki usi uwoma na,
28 yọ wha be kuvẹ re ewegrẹ rai a ru ozọ mu owhai vievie he. Onana yọ imuẹro ọrọ ọraha nọ o ti te ai, rekọ esiwo kẹ owhai; yọ obọ Ọghẹnẹ onana u no ze.
29 Keme a kẹ owhai uvẹ-ọghọ nọ wha re ro fi ẹrọwọ họ Kristi re wha jẹ ruẹ uye fiki riẹ.
30 Keme wha be rẹriẹ ovao dhe oghẹrẹ uye nọ wha ruẹ nọ u te omẹ, onọ wha bi yo nọ u gbe bi te omẹ.
