Ahwo Filipai 3:1-21
3 Orọ urere, inievo mẹ, wha gbẹ hae ghọghọ evaọ Olori na. O rrọ uye kẹ omẹ hẹ re mẹ wariẹ kere eware evona se owhai, keme o rrọ kẹ ewoma rai.
2 Wha fiẹrohọ erakọ na; wha fiẹrohọ enọ e rẹ wha enwoma ze; wha fiẹrohọ enọ i re si ikẹ nọ u fo re a yawo.
3 Keme mai họ enọ i wo uvi oyawo na, mai nọ ma be gọ Ọghẹnẹ ẹkwoma ẹzi riẹ jẹ be rọ Kristi Jesu seha nọ e be rẹroso eware otọakpọ họ.
4 Rekọ otẹrọnọ ohwo jọ o wo eware otọakpọ na jọ nọ ọ rẹ rẹroso, mẹ họ ohwo na.
Omọfa jọ o te roro nọ o wo eware otọakpọ na jọ nọ ọ rẹ rẹroso, me tube wo viere:
5 a yawo omẹ ẹdẹ avọ eree, mẹ ohwo orẹwho Izrẹl, ọrọ orua Bẹnjamin, mẹ ohwo Hibru ọnọ ahwo Hibru a yẹ; evaọ ekoko uzi na mẹ ohwo Farisi;
6 evaọ edhesẹ ajọwha, me kpokpo ukoko na; evaọ ekoko uzi na re ohwo ọ sai kiẹrẹe, mẹ kare afuẹwẹ.
7 Rekọ mẹ kpairoro vrẹ eware nọ e jẹ kẹ omẹ erere no fiki Kristi.
8 U te no ere no, mẹ kpairoro vrẹ eware kpobi fiki eriariẹ kpahe Kristi Jesu Olori mẹ nọ e ghare vi eware kpobi. Fiki riẹ, mẹ kpairoro vrẹ eware kpobi no, mẹ tẹ rehọ ae wọhọ eware ezuzu re mẹ sai wo Kristi,
9 jẹ jọ usu kugbei, orọnikọ fiki ekoko Uzi na nọ u re ru omẹ kiẹrẹe he, rekọ fiki ẹrẹreokie nọ o re no ẹrọwọ nọ a fihọ Kristi ze, ẹrẹreokie nọ o re no obọ Ọghẹnẹ ze fiki ẹrọwọ.
10 Utee mẹ họ re mẹ riẹe gbe ogaga ẹkparomatha riẹ, re me je wobọ evaọ uye-oruẹ riẹ, jẹ rọwo nọ me re whu oghẹrẹ uwhu riẹ,
11 re mẹ ruẹ sọ o sae lọhọ re mẹ jọ usu ẹkparomatha ọsosuọ* no uwhu ze.
12 Orọnikọ u te omẹ obọ no ho hayo kọ a ru omẹ gba no ho, rekọ mẹ be daoma kpobi sọ oware nọ Kristi Jesu ọ rọ fiki riẹ salọ omẹ na o sai te omẹ obọ.
13 Inievo, me bi rri omamẹ nọ u te omẹ obọ no ho; rekọ oware jọ nọ u muẹro ona: Mẹ be kpairoro vrẹ eware nọ e rrọ obemu jẹ be daoma kpobi le eware nọ e rrọ obaro,
14 mẹ be daoma kpobi le utee orọ osa use obọ odhiwu nọ Ọghẹnẹ ọ rọ ẹkwoma Kristi Jesu se.
15 Fikiere, jọ mai nọ e kpako a wo oghẹrẹ iroro nana, yọ otẹrọnọ wha wo oghẹrẹ iroro efa evaọ abọ jọ kpobi, Ọghẹnẹ ọ te fere iroro egbagba na via kẹ owhai.
16 Rekọ, oghẹrẹ kpobi nọ ma wo ẹnyaharo te no, joma gbẹ hae nyaharo kpatiẹ evaọ edhere ọvona.
17 Inievo, whai kpobi wha rọ aro kele omẹ, je muẹrohọ enọ i bi yeri evaọ oghẹrẹ nọ o rọwokugbe oriruo nọ ma fihọ otọ kẹ owhai.
18 Keme ibuobu e riẹ nọ mẹ jẹ hae fodẹ odẹ rai gaga rekọ enẹna mẹ be fodẹ ae avọ oviẹ, fikinọ a bi yeri uzuazọ nọ u ru rai họ ewegrẹ ure-oja* Kristi na.
19 Ọraha ọ te jọ ukuhọ rai, eva rai họ ọghẹnẹ rai, a be rọ eware nọ i fo nọ e rẹ vuọ ae oma rọ yoma, je bi fi iroro rai họ eware otọakpọ na.
20 Rekọ ẹwho mai ọ rrọ obọ odhiwu, yọ ma be rọ ọwhọ hẹrẹ osiwi nọ o bi no obei ze, Olori na, Jesu Kristi,
21 ọnọ o ti nwene ugboma ohẹhẹ mai na re o jọ wọhọ ugboma riẹ nọ u wo oruaro na ẹkwoma ogaga ulogbo riẹ nọ ọ be sai ro fi eware kpobi họ otọ omobọ riẹ.
