Ahwo Filipai 4:1-23
4 Fikiere, inievo mẹ nọ me you jẹ gwọlọ nọ mẹ rẹ ruẹ, oghọghọ gbe etu-uvie mẹ, jọ wha dikihẹ ga evaọ Olori na evaọ oghẹrẹ nọ mẹ fodẹ no na, iyoyou mẹ.
2 Mẹ be tuduhọ Yuodia awọ jẹ be tuduhọ Sintiki awọ inọ jọ a wo iroro evo evaọ Olori na.
3 Mẹ be lẹ owhẹ re, obọdẹ ibe oruiruo mẹ, inọ hai fiobọhọ kẹ eyae nana nọ i lele omẹ ruẹ uye no* fiki usi uwoma na, gbe Klẹmẹnt gbe ibe iruiruo mẹ nọ i kiọkọ, enọ edẹ rai e rrọ obe uzuazọ na.
4 Wha hae ghọghọ ẹsikpobi evaọ Olori na. Mẹ be wariẹ ta nọ, Wha ghọghọ!
5 Wha ru re ahwo kpobi a ruẹ nọ wha wo iroro.* Olori na o thabọ họ.
6 Wha ruawa kpahe oware ovo ho, rekọ evaọ oware kpobi wha rọ olẹ avọ olẹ-ayare kugbe uyere-okẹ ta ayare rai via kẹ Ọghẹnẹ;
7 udhedhẹ Ọghẹnẹ nọ u vi otoriẹ kpobi o vẹ te kpọ udu rai gbe ẹgba iroro rai ẹkwoma Kristi Jesu.
8 Orọ urere, inievo, eware kpobi nọ e rrọ uzẹme, eware kpobi nọ e roja gaga, eware kpobi nọ i kiẹrẹe, eware kpobi nọ e fo, eware kpobi nọ e rẹ wha uyoyou họ aro, eware kpobi nọ a be ta emamọ ẹme kpahe, eware kpobi nọ i woma, eware kpobi nọ i fo ejiro, wha hai roro kpahe eware nana.
9 Wha hai ru eware nọ wha wuhrẹ jẹ rọwo, nọ wha yo mi omẹ jẹ ruẹ evaọ oma mẹ, Ọghẹnẹ udhedhẹ na ọ te jọ kugbe owhai.
10 Wọhọ odibo Olori na, mẹ be ghọghọ gaga fikinọ wha be wariẹ dhesẹ nọ wha wo ọdawẹ kẹ omẹ. Dede nọ wha jẹ ruawa kpahe omẹ, wha ruẹ uvẹ dhesẹ iẹe via ha.
11 Orọnikọ mẹ be ta onana fikinọ oware jọ o kare omẹ hẹ, keme me wuhrẹ epanọ me re ro wo edẹro no evaọ uyero kpobi nọ mẹ rrọ.
12 Mẹ riẹ epanọ me re ro yeri nọ me te wo umutho eware gbe nọ me te wo buobu. Me wuhrẹ oware nọ umutho ahwo a riẹ, oye họ, epanọ a re ro wo edẹro evaọ oware kpobi gbe uyero kpobi, te ohwo ọ re eva vọ hayo ohọo u bi kpei, te o wo buobu hayo o kare riẹ.
13 Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.
14 Ghele na, wha riẹ ru nọ wha ro fiobọhọ kẹ omẹ evaọ uye mẹ.
15 Evaọ uzẹme, whai inievo Filipai, wha riẹ re inọ, nọ wha kaki yo usi uwoma na no, gbe okenọ me no Masidonia no, uvumọ ukoko u kuobọgbe omẹ hẹ evaọ ẹme ẹkẹ gbe emio, u te no owhai no;
16 keme nọ mẹ jọ obọ Tẹsalonika, wha vi eware se omẹ ro fiobọhọ kẹ omẹ orọnikọ ẹsiẹvo ho rekọ isiava soso.
17 Orọnikọ mẹ be gwọlọ nọ wha kẹ omẹ okẹ hẹ, rekọ mẹ gwọlọ nọ wha wo eghale nọ e rẹ wha ẹvi fihọ ẹkpa-ugho rai.
18 Rekọ, me wo oware kpobi nọ mẹ gwọlọ je wo dafia. Me wo eware buobu enẹna nọ Epafrodaitọs ọ kẹ omẹ eware nọ wha vi se omẹ no na, idheidhe nọ i re gbo ore awere, onọ o rẹ were Ọghẹnẹ, nọ ọ rẹ jẹrehọ.
19 Fiki onana, Ọghẹnẹ mẹ nọ o wo efe kpobi na ọ te rehọ ẹkwoma Kristi Jesu kẹ owhai eware kpobi nọ e roja kẹ owhai.
20 Jọ oruaro u te Ọghẹnẹ gbe Ọsẹ mai bẹdẹ bẹdẹ. Ami.
21 Wha yere erezi na kpobi nọ e rrọ usu kugbe Kristi Jesu kẹ omẹ. Inievo nọ e rrọ kugbe omẹ a bi yere owhai.
22 Erezi na kpobi, maero erọ uviuwou Siza, a bi yere owhai.
23 Jọ Olori mai Jesu Kristi o dhesẹ uwowou ulogbo riẹ kẹ owhai nọ wha bi dhesẹ emamọ ẹzi na.
Eme-Obotọ
^ Hayo “nọ a daoma gaga no.”
^ Hayo “ọnọ ọ rẹ kpairoro vrẹ oriẹ, ọ vẹ rọwo orọ amọfa, ọnọ o re si eware kekeke he.”
