Ahwo Galesha 5:1-26
5 Re ma wo ufuoma yena Kristi o ro si omai no igbo. Fikiere, wha dikihẹ ga, wha kuvẹ re a wariẹ fi owhai họ igbo ho.
2 Rri! Mẹ Pọl, mẹ be ta kẹ owhai nọ wha tẹ yawo, oware nọ Kristi o ru u ti wo erere kẹ owhai hi.
3 Mẹ be wariẹ ta kẹ ohwo kpobi nọ ọ yawo inọ o gba riẹ họ nọ o re koko eware kpobi nọ e rrọ Uzi na.
4 Wha hẹrioma no Kristi no, whai enọ e be daoma koko Uzi na inọ a te rọ fiki ere kuenu kẹ owhai nọ wha kiẹrẹe; wha kie no uwowou ulogbo riẹ no.
5 Rọkẹ omai, ma be rọ ọwhọ hẹrẹ epanọ ma ti ro kiẹrẹe evaọ aro Ọghẹnẹ fiki ẹrọwọ gbe ẹzi ọfuafo na.
6 Keme evaọ usu kugbe Kristi Jesu, te ohwo ọ yawo hayo ọ yawo ho u muẹme he, rekọ oware nọ o roja họ ẹrọwọ nọ a rẹ rọ uyoyou dhesẹ via.
7 Wha jẹ dhẹ ziezi vẹre. Kọ ono ọ whaha owhai nọ wha gbẹ be rọ nya lele uzẹme na ha?
8 Orọnikọ obọ Ọnọ o bi se owhai na oghẹrẹ uwuhrẹ nana u no ze he.
9 Ẹvi* ọsese o re ru ukulu soso fu.
10 U mu omẹ ẹro nọ whai nọ e rrọ usu kugbe Olori na wha ti wo oghẹrẹ iroro mẹ na; rekọ ohwo nọ ọ be wha ẹbẹbẹ se owhai na, oghẹrẹ ohwo kpobi nọ ọ rrọ kẹhẹ, o ti wo obrukpe nọ o fo rie.
11 Rọkẹ omẹ, inievo, otẹrọnọ mẹ gbẹ be suobọhọ oyawo, kọ fikieme a gbe bi ro kpokpo omẹ? O tẹ rrọ ere, kiyọ utho ezoruẹ nọ ure-oja* na o wha ze na u no otọ no.
12 O hae were omẹ otẹrọnọ ezae nọ e be gwọlọ wha ozighi fihọ owhai oma na a rẹ wharọ oma obọrai.*
13 A se owhai ze re wha wo ufuoma, inievo; rekọ wha rehọ ufuoma nana wọhọ uvẹ nọ wha re ro le isiuru uwo ho, rekọ wha rọ uyoyou gbodibo kẹ ohwohwo.
14 Keme ujaje ọvo u ru Uzi na kpobi gba,* oye họ: “Who re you ọrivẹ ra wọhọ omobọ ra hrọ.”
15 Rekọ wha tẹ be họre jẹ nwa ohwohwo oma, wha yọroma, o gbẹ rrọ ere he, wha ti kpe ohwohwo no.
16 Rekọ mẹ be ta nọ, Wha hae nya lele ekpakpọ ẹzi na, wha ti ru eware isiuru uwo vievie he.
17 Keme eware nọ i re si uwo na urru e rẹ were ẹzi na ha, yọ erọ ẹzi na e rẹ were uwo na ha; ivẹ na e wọso ohwohwo, o tẹ be whae ze nọ eware nọ wha gwọlọ ru, wha gbe bi ro ru ai hi.
18 Ofariẹ, ẹzi na o te bi su owhai, yọ wha rrọ otọ uzi na ha.
19 Whaọ a rẹ ruẹ iruo uwo vevẹ, eye họ ọfariẹ-ogbe,* egbegbe, uruemu nọ u fo ho nọ a re ru ababọ omovuọ,*
20 ẹdhọgọ, iruẹru-imizi, egrẹ-ọjẹ, ohọre, ihri-eriọ, ofu-ọkpoo, ẹwhọ, ohẹriẹ, ẹtohọ eko sa-sa,
21 isiuru kẹ eware amọfa, idieda-thomawa, ehaa nọ a rẹ jọ ru eware odode, gbe eware itieye na. Mẹ be vẹvẹ owhai unu kpahe eware enana, wọhọ epanọ mẹ vẹvẹ owhai unu no vẹre, inọ enọ i bi ru eware itieye na a te reuku Uvie Ọghẹnẹ hẹ.
22 Rekọ ubi ẹzi na họ uyoyou, oghọghọ, udhedhẹ, odiri,* uwowou, ewoma, ẹrọwọ,
23 ẹwolẹ, oma-onyẹ. Uzi ovo o wọso eware itieye na ha.
24 Ofariẹ, enọ e rrọ erọ Kristi Jesu a tehe uwo na avọ isiuru gbe ẹgwọlọ riẹ fihọ ure na no.
25 Otẹrọnọ ẹzi na ọ be kpọ uzuazọ mai, joma yeri uzuazọ mai kpatiẹ ẹsikpobi lele ekpakpọ ẹzi na.
26 Wha joma wo omorro ho, onọ o rẹ wha omuhrowo fihọ udevie mai je ru omai re ohwohwo ihri.
Eme-Obotọ
^ Koyehọ, iyisti nọ a re ro ru ebrẹdi nọ u re ru ei fu.
^ Rri oria Otofa Eme.
^ Ahwo nọ a wharọ omarai a gbe te ahwo nọ a re koko Uzi nọ a be suobọhọ na ha.
^ Hayo o sae jọ nọ, “o gba Uzi na kpobi kugbe.”
^ Evaọ Griki, “por·neiʹa.” Rri oria Otofa Eme.
^ Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
^ Hayo “uye-oruẹ-krẹkri.”
