Ahwo Galesha 6:1-18
6 Inievo, o tẹ make rọnọ ohwo jọ ọ jẹ owọ othọthọ taure ọ tẹ te riẹ, whai nọ e nyate itee Ikereakere na wha daoma kpọ ohwo otiọye na họ avọ ẹzi ẹwolẹ. Rekọ wha muẹrohọ omobọ rai fiki ozọ nọ odawọ o sai te owhai re.
2 Wha hai fiobọhọ wọ ewha egbẹgbẹdẹ ohwohwo, enẹ wha re ro ru uzi Kristi na gba.
3 Keme ohwo jọ o te bi roro nọ ọyomariẹ yọ ohwo jọ kpakiyọ ọ rrọ oware ovo ho, ọ be viẹ omobọ riẹ họ.
4 Rekọ jọ omomọvo ọ kiẹ iruo obọriẹ riwi, kẹsena o ve ti wo oghọghọ no iruo obọriẹ ọvo ze, orọnikọ ọ rẹ rehọ omariẹ wawo omọfa ha.
5 Keme omomọvo ọ rẹ wọ ọvuọ owha* riẹ.
6 Ofariẹ, jọ ohwo kpobi nọ a bi wuhrẹ ẹme na ọ jọ eware iwoma kpobi nọ o wo ghale kẹ ọnọ o bi wuhrẹ iẹe na.
7 Jọ a su owhai thọ họ: Ọghẹnẹ ọ rrọ ọnọ a rẹ viẹhọ họ. Keme oware kpobi nọ ohwo ọ be kọ, oye o ti vu;
8 keme ohwo nọ ọ be rọ iroro uwo riẹ kọ, o ti vu egbogbo no uwo riẹ na ze, rekọ ohwo nọ ọ be kọ wọhọ epanọ ẹzi na ọ be kpọe, o ti vu uzuazọ ebẹdẹ bẹdẹ no ẹzi na ze.
9 Fikiere, ma jọ oware uwoma uruo o bẹ omai no ho, keme nọ oke u te te, ma ti vu ibi riẹ otẹrọnọ oma o gbẹ rrọ omai no ho.*
10 Fikiere, nọ ma wo uvẹ na, joma ru oware uwoma kẹ ahwo kpobi, rekọ maero rọkẹ enọ ma gbẹ rrọ ẹrọwọ na.
11 Wha rri epanọ ibieme na i kpoko te, obọ mẹ me ro kere ileta nana se owhai.
12 Ahwo nọ a be gwọlọ jọ emamọ ahwo evaọ aro ahwo-akpọ họ enọ e be gwọlọ gba owhai họ yawo, a bi ru onana re a siọ ae ba ekpokpo fiki ure-oja* Kristi.
13 Keme ahwo nọ a be yawo na dede a bi koko Uzi na ha, rekọ a gwọlọ nọ wha yawo re a ruẹse jọ oma rai ruẹ oware nọ a re ro seha.
14 Rekọ mẹ rẹ rehọ oware ovo seha vievie he ajokpaọ ure-oja* Olori mai Jesu Kristi, keme fiki riẹ, akpọ na o whu* no evaọ eriwo mẹ, yọ me whu no evaọ eriwo akpọ na.
15 Keme te ohwo ọ yawo hayo ọ yawo ho u muẹme he, rekọ omama okpokpọ nọ ohwo ọ rẹ jọ oye u muẹme.
16 Jọ ahwo kpobi nọ a be nya kpatiẹ lele eriwo nana, koyehọ Izrẹl Ọghẹnẹ, a wo udhedhẹ gbe ohrọ-oriọ Ọghẹnẹ.
17 No enẹna vrẹ, jọ ohwo ọvo o kpokpo omẹ hẹ, keme eka nọ i dhesẹ nọ mẹ yọ ọrigbo Jesu e rrọ omẹ oma.
18 Inievo, jọ Olori mai Jesu Kristi o dhesẹ uwowou ulogbo riẹ kẹ owhai nọ wha bi dhesẹ emamọ ẹzi na. Ami.
Eme-Obotọ
^ Hayo “owha oware nọ ohwo o ru.”
^ Hayo “siobọno oware uwoma uruo ho.”
^ Rri oria Otofa Eme.
^ Rri oria Otofa Eme.
^ Hayo “a kare akpọ na fihọ ure kpe.”
