Ahwo Rom 1:1-32
1 Pọl, ọrigbo Kristi Jesu nọ a se re ọ jọ ukọ, nọ a ro mu re o whowho usi uwoma Ọghẹnẹ,
2 onọ ọ ya eyaa riẹ anwẹdẹ evaọ Ikereakere efuafo na ẹkwoma eruẹaro riẹ,
3 kpahe Ọmọ riẹ, ọnọ a yẹ wọhọ ohwo-akpọ evaọ uyẹ Devidi,
4 rekọ ọnọ a rọ ogaga ẹzi ọfuafo dhesẹ via nọ Ọmọ Ọghẹnẹ ẹkwoma uwhu nọ a kpare riẹ no ze, Jesu Kristi Olori mai.
5 A rọ ẹkwoma riẹ dhesẹ uwowou ulogbo kẹ omai jẹ kẹ omai iruo ukọ re ahwo evaọ erẹwho na kpobi a ruẹsi yoẹme kẹe fiki ẹrọwọ nọ a fihọ iẹe, re o wha orro se odẹ riẹ,
6 yọ udevie erẹwho na a jọ se owhai re na, re wha jọ erọ Jesu Kristi—
7 ro se enọ e rrọ iyoyou Ọghẹnẹ kpobi evaọ Rom, enọ a se re a jọ erezi:
Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.
8 Orọ ọsosuọ, me bi yere Ọghẹnẹ mẹ ẹkwoma Jesu Kristi fiki rai kpobi, keme a be jọ akpọ na soso ta kpahe ẹrọwọ rai.
9 Ọghẹnẹ nọ mẹ be rọ oma mẹ kpobi gọ evaọ ewhowho usi uwoma kpahe Ọmọ riẹ na, ọ rẹ sai se isẹri kẹ omẹ inọ mẹ be hae fodẹ owhai ẹsikpobi evaọ elẹ mẹ,
10 be lẹ nọ otẹrọnọ o sae lọhọ evaọ onana, mẹ vẹ sae nya bru owhai ze o tẹ rrọ oreva Ọghẹnẹ.
11 Keme u bi si omẹ urru re mẹ ruẹ owhai, re mẹ kẹ owhai ekẹ jọ nọ i no obọ Ọghẹnẹ ze re wha sae jọ gaga evaọ ẹrọwọ na;
12 hayo, re ma sae tuduhọ ohwohwo awọ ẹkwoma ẹrọwọ ohwohwo, te ọrai te ọmẹ.
13 Rekọ inievo, mẹ gwọlọ nọ wha riẹ onana, inọ ẹsibuobu mẹ jiroro nọ mẹ rẹ nya bru owhai ze, rekọ oware jọ o be hae whaha omẹ rite enẹna, re mẹ sae jọ iruo usi uwoma ota mẹ na wo ibi jọ re evaọ udevie rai, wọhọ epanọ mẹ jọ erẹwho efa wo na.
14 Mẹ reosa ahwo Griki gbe ahwo evẹrẹ efa,* iwoareghẹ gbe enọ i wo areghẹ hẹ;
15 fikiere ọwhọ ọ da omẹ oma fia re me whowho usi uwoma na kẹ owhai nọ e rrọ Rom re.
16 Keme oma o be vuọ omẹ hẹ re me whowho usi uwoma na; evaọ uzẹme oye họ obọdẹ edhere nọ Ọghẹnẹ ọ be rọ wha esiwo se enọ i wo ẹrọwọ, orọ ọsosuọ rọkẹ ahwo Ju, kẹsena rọkẹ ahwo Griki re.
17 Keme rọkẹ enọ i wo ẹrọwọ a be ruẹ nọ Ọghẹnẹ ọ be rọ ẹkwoma usi uwoma na dhesẹ ẹrẹreokie riẹ via, onana o vẹ bọ ẹrọwọ rai ga, wọhọ epanọ a kere nọ: “Rekọ ọnọ o kiẹrẹe o ti wo uzuazọ fiki ẹrọwọ.”
18 Keme ofu Ọghẹnẹ o bi no obọ odhiwu ze fiki enọ i bi yoẹme kẹe he gbe enọ i kiẹrẹe he, enọ e be rọ edhere omuomu wọso uzẹme na,
19 keme eware nọ i fo nọ a rẹ riẹ kpahe Ọghẹnẹ i dhesẹ oma via vevẹ evaọ udevie rai, Ọghẹnẹ o ru rai vevẹ kẹ ae.
20 Keme dede nọ a rẹ ruẹ Ọghẹnẹ hẹ, no anwọ okenọ ọ rọ ma akpọ na ze ahwo a be sai wo otoriẹ oghẹrẹ nọ ọ rrọ, a be jọ eware nọ ọ ma ruẹ onana, makọ ogaga ebẹdẹ riẹ gbe inọ ọye họ Ọghẹnẹ, fikiere a wo unoma ha.
21 Keme dede nọ a riẹ Ọghẹnẹ, a kẹ riẹ oruaro wọhọ Ọghẹnẹ hẹ, hayo kẹe uyere he, iroro rai i te zihe ruọ ifofe, udu ugheghẹ rai u te muebi.
22 Dede nọ a be ta nọ a wo areghẹ, a rrọ gheghẹ,
23 a be rehọ oruaro nọ a rẹ rọ kẹ Ọghẹnẹ nọ o re whu hu na kẹ emema ahwo-akpọ gbe evra gbe erao awọ ene gbe erao nọ i re siẹ gbe enọ e rẹ katiẹ nọ i re whu.
24 Fikiere, Ọghẹnẹ ọ tẹ kẹ ae uvẹ re a ru lele isiuru igbegbe nọ e rrọ udu rai, re a si ọghọ no omarai.
25 A salọ ọrue siọ uzẹme kpahe Ọghẹnẹ ba, a tẹ be rọ ọghọ kẹ jẹ gọ emama viukpọ Ọmemama na, ọnọ a re jiri bẹdẹ bẹdẹ. Ami.
26 Oyejabọ nọ Ọghẹnẹ ọ jẹ kẹ ae uvẹ re isiuru egaga kẹ owezẹ ọzae-avọ-aye nọ e vrẹta u su ae, keme eyae nọ e rrọ udevie rai a nyasiọ ezae nọ a re lele wezẹ ba a te bi lele ibe eyae rai wezẹ, onọ u wo ohẹriẹ no epanọ Ọghẹnẹ ọ ma riẹ no otọ ze;
27 epọvo na re, ezae na a nyasiọ eyae nọ a re lele wezẹ ba a te bi wo isiuru egaga kẹ omoma rai, ezae i te bi lele ezae wezẹ, bi ru oware otọtọ jẹ be jọ omarai wo osohwa emuemu rai vọvọ.
28 Yọ fikinọ a gwọlọ daezọ* Ọghẹnẹ hẹ, Ọghẹnẹ ọ tẹ kẹ ae uvẹ re a wo iroro ethọthọ, re a ru eware nọ i fo ho.
29 Yọ a vọ avọ oghoghẹrẹ emuemu kpobi, uvou-uthei,* gbe eyoma, ihri-eriọ, ohwo-okpe, ozighi, eviẹhọ, gbe egrẹ-ọjẹ, a rrọ iguiguẹgu,
30 enọ e rẹ ta amọfa raha, enọ i mukpahe Ọghẹnẹ, otu omoya, omorro, ehaise, enọ e rẹ momaa eware iyoma, enọ e rẹ ghẹmeeyo kẹ esẹgbini,
31 a kare otoriẹ, a re koko eyaa ha, a wo uyoyou kẹ ahwo uviuwou rai hi, jẹ kare ohrọ-oriọ.
32 Dede nọ ahwo nana a riẹ uzi Ọghẹnẹ ziezi, inọ enọ i bi ru eware nana a fo uwhu, a bi ru ai jẹ be jẹ enọ i bi ru ai rehọ re.
Eme-Obotọ
^ Hayo “enọ e rrọ ahwo Griki hi.”
^ Hayo “riẹ Ọghẹnẹ ziezi hi.”
^ Hayo “urusio oware omọfa.”
