Ahwo Rom 11:1-36
11 Mẹ be nọ inọ, Kọ Ọghẹnẹ ọ siọ ahwo riẹ? Vievie! Keme mẹ yọ ohwo Izrẹl re, ọmọ* Abraham, nọ o no orua Bẹnjamin ze.
2 Ọghẹnẹ ọ siọ ahwo riẹ hẹ, enọ ọ kake rẹriẹ ovao ku. Kọ wha gbẹ riẹ eme nọ ikereakere na e ta kpahe Elaeja, okenọ o je bo se Ọghẹnẹ fiki eware nọ emọ Izrẹl a je ru?
3 “Jihova,* a kpe eruẹaro ra no, a kporo egbada-idhe ra no, mẹ ọvo o kiọkọ, yọ enẹna a be gwọlọ omẹ kpe.”
4 Ghele na, eme Ọghẹnẹ ọ ta kẹe? “Me gbe wo ezae idu ihrẹ (7,000) nọ i ri kigwẹ gọ Ebale he.”
5 Epọvo na, evaọ oke nana re, ejọ e riẹ nọ i kiọkọ nọ Ọghẹnẹ ọ salọ fiki uwowou ulogbo riẹ.
6 Whaọ o tẹ rrọ fiki uwowou ulogbo, kiyọ o gbẹ rrọ fiki iruo ho; o gbẹ rrọ ere he, uwowou ulogbo na o rẹ gbẹ jọ uwowou ulogbo ho.
7 Kọ eme ma rẹ ta? Oware nọ Izrẹl ọ be rọ ọwhọ gwọlọ o wo rie te obọ họ, rekọ u te enọ a salọ na obọ. Enọ i kiọkọ a wuhu iroro rai di,
8 nwane wọhọ epanọ a kere nọ: “Ọghẹnẹ ọ kẹ rai ẹzi owezẹ udidi, ibiaro nọ e rẹ ruẹ ude he, gbe ezọ nọ i re yo ẹme he, rite inẹnẹ na.”
9 Ofariẹ, Devidi ọ ta nọ: “Jọ emẹjẹ rai o jọ agbefẹ gbe ẹta gbe utho ezoruẹ gbe uye rọ kẹ ae.
10 Jọ ibiaro rai i muebi re a siọ ude ba ẹruẹ, re a je zulẹ uke ẹsikpobi.”
11 Fikiere mẹ be nọ inọ, Kọ a zoruẹ je kie totọ riẹriẹriẹ? Vievie! Rekọ ọnyathọ rai u rovie uvẹ esiwo kẹ ahwo erẹwho na, re u ru ai re ihri.
12 Whaọ otẹrọnọ ọnyathọ rai o wha eghale se akpọ na, yọ ekiekpotọ rai o wha eghale se ahwo erẹwho na, eghale nọ i ti te ahwo i ti bu kẹhẹ nọ unu rai o tẹ gba no!
13 Whaọ mẹ be ta ẹme kẹ owhai enọ e rrọ ahwo erẹwho na. Nọ orọnọ mẹ yọ ukọ rọkẹ erẹwho na, me bi bru ọghọ họ odibọgba mẹ,
14 re mẹ ruẹ sọ mẹ sae rọ edhere jọ ru ahwo orẹwho mẹ re ihri re a kurẹriẹ, re mẹ rọ ere siwi ejọ evaọ udevie rai.
15 Keme otẹrọnọ ẹsiọ nọ ọ se rai o lẹliẹ akpọ na wo uvẹ ẹruẹrẹhọ kugbe Ọghẹnẹ, edederehọ rai u ti ru ai no uwhu wariẹ ziọ uzuazọ.
16 Ofariẹ, otẹrọnọ ẹwẹ ọsosuọ nọ a rehọ no ukulu ebrẹdi ze ọ rrọ ọrẹri, oma ebrẹdi na soso ọ rrọ ọrẹri re; yọ otẹrọnọ awọ ure e rrọ ọrẹri, egha na e rrọ ọrẹri re.
17 Rekọ otẹrọnọ a gbẹre egha na jọ no, a jẹ rehọ owhai nọ e rrọ egha ure olivi ẹwọ ze, a jẹ gba owhai fihọ ure na kugbe ai, wha je bi lele ai re emu nọ o bi no awọ ure olivi na ze,
18 wha fu uke* kẹ egha nọ a gbẹre no na ha. Rekọ wha te bi fu uke* kẹ ae, wha kareghẹhọ nọ orọnikọ whai wha ru awọ ure na dikihẹ hẹ, awọ ure na i ru owhai dikihẹ.
19 Whaọ, wha te ta nọ: “A gbẹre egha jọ no re a ruẹse gba omai fihọ ure na.”
20 Ginọ ere! A gbẹre rai no fikinọ a kare ẹrọwọ, rekọ fiki ẹrọwọ rai wha rọ daji ure na. Wha fu uke he, rekọ wha dhozọ.
21 Keme otẹrọnọ Ọghẹnẹ o vu egha nọ e ta no oma ure na ze wa ha, o ti vu owhai wa gbe he wha te ru epọvo na.
22 Fikiere, wha hae kareghẹhọ uwowou gbe evedha Ọghẹnẹ. Ọ be dheva kẹ enọ i kie na, rekọ wha wo aruoriwo riẹ, thakpinọ wha ruabọhọ bi ru epanọ wha rẹ rọ daji aruoriwo riẹ; o gbẹ rrọ ere he, a te gbẹre owhai no re.
23 Yọ ae omarai re, a tẹ wariẹ wo ẹrọwọ, a te gba ae zihe fihọ ure na, keme Ọghẹnẹ ọ rẹ sae gba ae zihe fihọ iẹe.
24 Keme otẹrọnọ a gbẹre owhai no ure olivi ẹwọ ze a tẹ gba owhai fihọ ure olivi nọ a kọ, onọ u wo ohẹriẹ no epanọ Ọghẹnẹ ọ ma riẹ no otọ ze, o rẹ mae lọhọ re a gba egha nọ i no oma ure olivi na ze dẹẹ zihe fihọ ure na.
25 Keme mẹ gwọlọ nọ wha jọ igbori oware udidi ọrẹri nana ha, inievo, re wha siọ omarai ba erri inọ wha wo areghẹ gaga. Oware udidi ọrẹri na họ: Emọ Izrẹl a wuhu iroro rai di bẹsenọ a re koko unu ahwo erẹwho na họ gba no,
26 enẹ a ti ro siwi Izrẹl kpobi. Nwane wọhọ epanọ a kere nọ: “Osiwi na o ti no Zayọn ze, o ve ti si iruemu iyoma no Jekọp no.
27 Yọ onana họ ọvọ nọ mẹ te re kugbe ai, okenọ mẹ te rehọ izieraha rai rọvrẹ rai.”
28 Evaọ uzẹme, a rrọ ewegrẹ Ọghẹnẹ fikinọ a siọ usi uwoma na, onọ o wha erere se owhai. Rekọ fikinọ Ọghẹnẹ ọ salọ ejọ fiki eyaa nọ ọ ya kẹ esẹ-ode rai, o rri rai ghaghae.
29 Keme Ọghẹnẹ o re nwene iroro riẹ kpahe ekẹ gbe use riẹ hẹ.
30 Keme wọhọ epanọ wha jẹ ghẹmeeyo kẹ Ọghẹnẹ vẹre na, rekọ a jẹ re owhai ohrọ fiki aghẹmeeyo ọrọ emọ Izrẹl na,
31 ere ọvona ae omarai a ghẹmeeyo enẹna, onọ o wha ohrọ-oriọ se owhai, re a ruẹsi dhesẹ ohrọ-oriọ kẹ ai re enẹna.
32 Keme Ọghẹnẹ ọ kẹ rai kpobi uvẹ re a ghẹmeeyo, re ọ ruẹsi dhesẹ ohrọ-oriọ kẹ ai kpobi.
33 Efe Ọghẹnẹ o bu kẹhẹ, yọ areghẹ gbe eriariẹ riẹ i kodo kẹhẹ! A rẹ sae kiẹ otọ oziẹobro riẹ via ha, yọ a rẹ sae gwọlọ idhere riẹ via ha.
34 Keme “ono ọ riẹ iroro Jihova,* hayo kọ ono họ ọkiroro riẹ?”
35 Hayo, “ono ọ kẹ riẹ oware jọ no, nọ o jẹ gbae họ nọ ọ rẹ hwa zihe kẹe?”
36 Keme obọriẹ eware kpobi i no ze, ọye ọ ma rai, yọ fiki riẹ a rọ rrọ uzuazọ. Jọ oruaro u tei bẹdẹ bẹdẹ. Ami.
Eme-Obotọ
^ Evaọ Griki, “ubi.”
^ Rri oria Otofa Eme.
^ Hayo “seha.”
^ Hayo “seha.”
^ Rri oria Otofa Eme.
