Ahwo Rom 13:1-14
13 Jọ ohwo kpobi ọ romakpotọ kẹ enọ i wo udu-esuo okpehru, keme udu-esuo ọvuọvo ọ riẹ hẹ ajokpaọ onọ Ọghẹnẹ ọ kuvẹ riẹ; Ọghẹnẹ họ ọnọ ọ kẹ enọ i bi su na umutho udu-esuo nọ a wo na.
2 Fikiere ohwo kpobi nọ ọ be wọso enọ i bi su na yọ ọ be wọso ọruẹrẹfihotọ Ọghẹnẹ; enọ e wọso ọruẹrẹfihotọ na a te wha obrukpe se omarai.
3 Keme a rẹ dhozọ isu yena. Enọ i bi ru oware uwoma e rẹ dhozọ rai hi rekọ enọ i bi ru oware uyoma. Wha gbẹ gwọlọ nọ ozọ enọ i bi su na u mu owhai hi, wha hai ru ewoma, a ti jiri owhai;
4 keme ọgbodibo Ọghẹnẹ a rrọ rọkẹ ewoma rai. Rekọ wha te bi ru oware uyoma, ozọ u mu owhai, keme gheghe ọ be rọ wha ọgbọdọ họ. Ọgbodibo Ọghẹnẹ ọ rrọ re ọ rehọ uye kẹ ọnọ o bi ru eyoma.
5 Fikiere o roja re wha romakpotọ, orọnikọ fiki uye nọ a rẹ kẹ ọvo ho rekọ fiki obruoziẹ-iroro obọrai re.
6 Oyejabọ nọ wha be rọ hwa osa-uzou re na; idibo Ọghẹnẹ nọ i bi ru iruo kẹ ahwo a rrọ.
7 Wha kẹ ahwo kpobi onọ u te rai: ọnọ ọ gwọlọ osa-uzou, wha hwa osa-uzou kẹe; ọnọ ọ gwọlọ azọhọ, wha hwa azọhọ kẹe; ọnọ ọ gwọlọ adhẹẹ, wha kẹe adhẹẹ; ọnọ ọ gwọlọ ọghọ, wha kẹe ọghọ.
8 Wha reosa ohwo ọvo oware ovo ho, ajokpaọ uyoyou nọ wha re wo kẹ ohwohwo; keme ohwo kpobi nọ o you ọrivẹ riẹ o bi ru uzi na gba.
9 Keme uzi na nọ o ta nọ, “Who bruẹnwae vievie he, Who kpe ohwo vievie he, Who tho uji vievie he, Who siuru eware amọfa vievie he,” gbe ujaje ofa kpobi nọ o riẹ, aikpobi e gba ekru evaọ ẹme nana: “Who re you ọrivẹ ra wọhọ omobọ ra hrọ.”
10 Uyoyou u re ru ọrivẹ riẹ eyoma ha; fikiere, uyoyou họ orugba uzi na.
11 Wha ru onana re keme wha riẹ ezi na inọ okenọ wha rẹ rọ rọwo no owezẹ ze u te no, keme enẹna esiwo mai ọ kẹle no vi okenọ ma ro kurẹriẹ.
12 Aso na o thabọ gaga no; oke o kẹle ẹke no. Fikiere joma siobọno iruo ebi re ma whẹ ekwakwa-ẹmo erọ elo họ.
13 Joma yeri uzuazọ nọ o rrọ kpatiẹ wọhọ enọ e be nya evaọ aruvo, orọnikọ evaọ ehaa nọ a rẹ jọ ru eware odode avọ idieda ha, orọnikọ evaọ ọfariẹ-ogbe avọ uruemu nọ u fo ho nọ a re ru ababọ omovuọ* họ, orọnikọ evaọ ẹwhọ avọ ihri-eriọ họ.
14 Rekọ joma whẹ uruemu Olori na Jesu Kristi họ oma, orọnikọ ma rẹ momaa epanọ ma re ro ru eware isiuru uwo ho.
Eme-Obotọ
^ Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
