Ahwo Rom 16:1-27
16 Me bi dhesẹ Fibi oniọvo-ọmọtẹ mai kẹ owhai, ọnọ ọ rrọ ọgbodibo evaọ ukoko obọ Sẹnkria,
2 re wha dede iei rehọ evaọ Olori na wọhọ epanọ u fo erezi na, jẹ kẹe oghẹrẹ obufihọ kpobi nọ ọ gwọlọ, keme ọyomariẹ ọ tha ibuobu uke no re, te omẹ.
3 Wha yere Priska* avọ Akwila kẹ omẹ, ibe iruiruo mẹ evaọ Kristi Jesu,
4 enọ i fi uzuazọ rai họ ọza no fiki mẹ,* enọ ikoko kpobi nọ e rrọ erẹwho na a bi yere orọnikọ mẹ ọvo ho.
5 Wha yere ukoko nọ o rrọ uwou rai re. Wha yere Epainetọs oyoyou mẹ na, ọnọ ọ rrọ ohwo ọsosuọ nọ ọ jọ Esia kurẹriẹ bru Kristi ze.
6 Wha yere Meri, ọnọ o ru iruo gaga kẹ owhai no.
7 Wha yere Andronikọs avọ Junias imoni mẹ gbe enọ ma gbẹ jọ uwou-odi, ezae nọ ikọ na a riẹ ziezi, a tẹ jẹ rrọ usu kugbe Kristi kri vi omẹ no.
8 Wha yere Ampliatọs, oyoyou mẹ evaọ Olori na.
9 Wha yere Obanọs, ibe oruiruo mai evaọ Kristi, gbe Stakis oyoyou mẹ na.
10 Wha yere Apelles, ọnọ o wo emamọ odẹ kugbe Kristi. Wha yere ahwo uviuwou Aristobulọs.
11 Wha yere Herodiọn, omoni mẹ. Wha yere ahwo uviuwou Nasisọs enọ e rrọ evaọ Olori na.
12 Wha yere Traifina avọ Traifosa, eyae nọ i bi ru iruo gaga evaọ Olori na. Wha yere Pẹsis, oyoyou mai na, keme o ru iruo gaga no evaọ Olori na.
13 Wha yere Rufọs, ọnọ Olori na ọ salọ, gbe oni riẹ, ọnọ ọ rrọ oni mẹ re.
14 Wha yere Asinkritọs, Fligọn, Hẹmis, Patrọbas, Hemas, gbe inievo nọ e rrọ kugbe ai.
15 Wha yere Filọlọgọs avọ Julia, Nirọs avọ oniọvo-ọmọtẹ riẹ, avọ Olimpas, gbe erezi na kpobi nọ e rrọ kugbe ai.
16 Wha rọ ẹviọlọ ọrẹri yere ohwohwo. Ikoko Kristi kpobi a yere owhai.
17 Inievo, mẹ be tuduhọ owhai awọ inọ wha muẹrohọ ahwo nọ a rẹ wha ohẹriẹ ze gbe eware nọ e rẹ wha ezoruẹ ze, nọ e wọso eware nọ wha wuhrẹ no, re wha kẹnoma kẹ ae.
18 Keme ahwo otiọye na a rrọ erigbo Olori mai Kristi hi, rekọ erọ isiuru obọrai, yọ a rẹ rọ eme awere gbe eme ujiro eviẹhọ su udu enọ i rri otọ mu hu thọ.
19 Ahwo kpobi a riẹ kpahe ẹmeoyo rai no, fikiere mẹ be ghọghọ fiki rai. Rekọ mẹ gwọlọ nọ wha jọ enọ i wo areghẹ evaọ oware uwoma, rekọ igbori evaọ oware uyoma.
20 Ọghẹnẹ nọ ọ rẹ kẹ udhedhẹ na, ọ te whọlọ Setan no evaọ otọ awọ rai kẹle na. Jọ Olori mai Jesu o dhesẹ uwowou ulogbo riẹ kẹ owhai.
21 Timoti ibe oruiruo mẹ o yere owhai, Lusiọs, Jesin, gbe Sosipata imoni mẹ, a yere owhai re.
22 Mẹ Tẹtiọs, ọnọ ọ rọ obọ riẹ kere ileta nana, o yere owhai nọ e rrọ evaọ Olori na.
23 Geyọs, ọnọ mẹ rrọ uwou riẹ, nọ ukoko na soso a re kokohọ evaọ uwou riẹ, o yere owhai. Ẹrastọs, okrigho ẹwho na, o yere owhai, yọ Kuatọs oniọvo riẹ o yere owhai re.
24 ——
25 Ọghẹnẹ ọ rẹ sai ru owhai ga. Onana o rọwokugbe usi uwoma nọ me whowho gbe ovuẹ kpahe Jesu Kristi, jẹ rọwokugbe ẹferevia oware udidi ọrẹri nọ a kodhere anwọ oke krẹkri ze na,
26 rekọ onọ a fere via no enẹna. Yọ ẹkwoma Ikereakere eruẹaro na erẹwho na kpobi a riẹ kpahe oware udidi nana no. Onana o rọwokugbe ujaje Ọghẹnẹ ebẹdẹ bẹdẹ na, re erẹwho na kpobi a fi ẹrọwọ họ iẹe a vẹ rọ fiki ere yoẹme kẹe.
27 Jọ oruaro u te Ọghẹnẹ, ọnọ ọye ọvo o wo areghẹ kpobi na, ẹkwoma Jesu Kristi bẹdẹ bẹdẹ. Ami.
