Ahwo Rom 3:1-31
3 Oghẹrẹ vẹ ahwo Ju a ro wo erere vi amọfa, hayo kọ eme họ erere oyawo?
2 Erere ologbo ọ riẹ evaọ abọ kpobi. Orọ ọsosuọ, a rehọ eme Ọghẹnẹ kẹ ae.
3 Kọ otẹrọnọ otujọ a wo ẹrọwọ họ? Kọ ababọ ẹrọwọ rai u dhesẹ nọ a rẹ sai fievahọ Ọghẹnẹ hẹ?
4 O rrọ ere vievie he! Ọghẹnẹ ọ rẹ ta uzẹme o tẹ make rọnọ ohwo kpobi yọ ọtọrue, wọhọ epanọ a kere nọ: “Re a sae ruẹ inọ eme ra i kiẹrẹe, whọ vẹ jẹ sae rease nọ a te bi gu owhẹ ẹdhọ.”
5 Rekọ otẹrọnọ emuemu mai o rẹ lẹliẹ ẹrẹreokie Ọghẹnẹ dhesẹ oma via, kọ eme ma rẹ ta? Kọ Ọghẹnẹ o ru thọ nọ o te dhesẹ ofu riẹ via? (Epaọ iroro ohwo-akpọ mẹ be rọ ta ẹme na.)
6 Vievie! O gbe ru ere he, ẹvẹ Ọghẹnẹ o ti ro gu akpọ na ẹdhọ?
7 Rekọ otẹrọnọ mẹ ta ọrue yọ ọrue nọ mẹ ta u bi ru uzẹme Ọghẹnẹ dhesẹ oma via a tẹ be kẹe oruaro, kọ fikieme a bi ro gu omẹ ẹdhọ inọ mẹ yọ ọrahauzi?
8 O tẹ rrọ ere, kọ ma gbẹ dhugbẹ ta epanọ ezae jọ i bi gu ọrue fihọ omai uzou nọ ma be ta na, inọ, “Joma ru eware iyoma re eware iwoma e sae romavia”? Oziẹ nọ a ti brukpe ezae yena o kiẹrẹe.
9 Kọ ẹvẹ ma roro? Kọ mai ahwo Ju o mai woma kẹ? Vievie! Keme ma ta no vẹre inọ te ahwo Ju te ahwo Griki a rrọ otọ uzioraha;
10 wọhọ epanọ a kere nọ: “Ohwo ọvuọvo o kiẹrẹe he, makọ ọvo dede;
11 ọvuọvo o wo otoriẹ hẹ; ọvuọvo ọ be gwọlọ Ọghẹnẹ hẹ.
12 Ahwo kpobi a no edhere na no, aikpobi a gbe fioka ha; ọvuọvo ọ riẹ nọ ọ rrọ wowou hu, makọ ọvo dede.”
13 “Unu rai yọ uki nọ u rovie fihọ; a rehọ ẹrọo rai viẹ ahwo họ no.” “Obi araomuomu ọ rrọ igbenu rai.”
14 “Yọ ekela gbe eme iyoma e vọ unu rai.”
15 “Awọ rai e rẹ dhẹ vẹrẹ vẹrẹ nyai kpe azẹ.”
16 “A rẹ wha ọraha gbe uye se ahwo,
17 yọ a rẹ rria dhedhẹ kugbe amọfa ha.”
18 “A wo ozodhẹ Ọghẹnẹ hẹ.”
19 Whaọ ma riẹ nọ eware kpobi nọ Uzi na o ta, o ta rai kẹ ahwo nọ a rrọ otọ Uzi na, re ohwo ọvuọvo ọ gbẹ ruẹ unoma gu hu, re u je dhesẹ via nọ akpọ na soso ọ reabe evaọ aro Ọghẹnẹ.
20 Fikiere, a ti kuenu kẹ ohwo ọvo inọ o kiẹrẹe evaọ aro riẹ fiki ekoko uzi hi, keme fiki uzi ma rọ riẹ oware nọ uzioraha o rrọ vevẹ.
21 Whaọ enẹna o rrọ vevẹ inọ ohwo ọ rẹ sai kiẹrẹe evaọ aro Ọghẹnẹ nọ ọ gbẹ maki koko Uzi na ha. Uzi na gbe ebe Eruẹaro na i dhesẹ onana via,
22 ẹhẹ, enọ i wo ẹrọwọ a rẹ sai kiẹrẹe evaọ aro Ọghẹnẹ ẹkwoma ẹrọwọ nọ a fihọ Jesu Kristi. Keme ohẹriẹ o riẹ hẹ.
23 Keme ahwo kpobi a raha uzi no, a be sai dhesẹ oruaro Ọghẹnẹ via ha.
24 Okẹ ọvọvẹ o rrọ nọ o bi ro kuenu kẹ ai inọ a kiẹrẹe fiki uwowou ulogbo riẹ ẹkwoma osa ẹtanigbo nọ Kristi Jesu ọ hwa ro si ai no igbo.
25 Ọghẹnẹ ọ rehọ e riẹ kẹ wọhọ idhe nọ o rẹ ruẹrẹ ahwo họ kugbe Ọghẹnẹ ẹkwoma ẹrọwọ nọ a re fihọ azẹ riẹ. O ru onana re o dhesẹ ẹrẹreokie riẹ via, keme Ọghẹnẹ ọ jẹ rọ fiki odiri riẹ rehọ izieraha ahwo rọvrẹ rai evaọ okenọ u kpemu.
26 Ofariẹ, o ru onana re o dhesẹ ẹrẹreokie riẹ via evaọ oke nana, re ọ sai kiẹrẹe nọ ọ tẹ be ta nọ ohwo nọ o fi ẹrọwọ họ Jesu o kiẹrẹe.
27 Kọ ma wo ẹjiroro nọ ma re ro seha? Vievie. Uzi vẹ o rẹ whaha omai ehaise? Kọ uzi nọ o tẹrovi eware nọ ahwo a bi ru? Ijo, uzi nọ o tẹrovi ẹrọwọ.
28 Keme ma ruẹ nọ a re kuenu kẹ ohwo inọ o kiẹrẹe ẹkwoma ẹrọwọ orọnikọ eware nọ o bi ru ro koko uzi na ha.
29 Hayo kọ Ọghẹnẹ ahwo Ju ọvo ọ rrọ? Kọ ọ gbẹ rrọ Ọghẹnẹ ahwo erẹwho na re? Ẹhẹ, ọrọ ahwo erẹwho na re.
30 Nọ Ọghẹnẹ ọ rrọ ọvo na, o ti dhesẹ ahwo nọ a yawo inọ a kiẹrẹe fiki ẹrọwọ gbe enọ e yawo ho inọ a kiẹrẹe fiki ẹrọwọ rai.
31 Nọ o rrọ ere na, kọ ma rẹ rehọ ẹrọwọ mai si uzi no otọ? Vievie! Ukpoye, ma rri uzi ghaghae.
