Ahwo Rom 4:1-25
4 Nọ o rrọ ere na, didi erere ma rẹ ta nọ o te Abraham ọsẹ-ode mai?
2 Wọhọ oriruo, o hae jọnọ fiki iruo a ro kuenu kẹ Abraham inọ o kiẹrẹe, ọ hai wo ẹjiroro nọ o re ro seha, rekọ ọ rẹ sai ru ere evaọ aro Ọghẹnẹ hẹ.
3 Kọ ogbẹrọnọ enẹ ikereakere na e ta? “Abraham o fi ẹrọwọ họ Jihova,* a tẹ rọ fiki oyena rri rie nọ o kiẹrẹe.”
4 Whaọ ohwo nọ o bi ru iruo, a re rri osa nọ a hwa kẹe wọhọ uwowou ulogbo ho, rekọ wọhọ osa nọ a kru rie.
5 Evaọ abọdekọ riẹ, ohwo nọ o bi ru iruo ho rekọ nọ o fi ẹrọwọ họ Ọnọ o re kuenu kẹ ọrahauzi nọ o kiẹrẹe na, a rẹ rọ fiki ẹrọwọ riẹ na rri rie nọ o kiẹrẹe.
6 Wọhọ epanọ Devidi ọ ta re kpahe evawere nọ i re te ohwo nọ Ọghẹnẹ o rri nọ o kiẹrẹe, dede nọ o ru eware Uzi na ha:
7 “Eva e were enọ ọ rehọ emuemu rai rọvrẹ gbe enọ ọ kpairoro vrẹ izieraha rai;
8 eva e were ohwo nọ Jihova* ọ te gbẹ kareghẹhọ izieraha riẹ vievie he.”
9 Kọ ahwo nọ a yawo ọvo a re wo evawere nana manikọ te enọ e yawo ho? Keme ma be ta nọ: “Ọghẹnẹ o rri Abraham nọ o kiẹrẹe fiki ẹrọwọ riẹ.”
10 Oke vẹ o ro rri rie nọ o kiẹrẹe? Okenọ ọ yawo no manikọ okenọ ọ re yawo ho? Okenọ ọ re yawo ho.
11 Ọghẹnẹ ọ tẹ ta kẹ Abraham nọ ọ yawo re o jọ oka inọ o kiẹrẹe fiki ẹrọwọ nọ o wo evaọ okenọ ọ re yawo ho, re ọ sae jọ ọsẹ ahwo kpobi nọ a wo ẹrọwọ dede nọ a yawo ho, a vẹ sai rri rai nọ a kiẹrẹe;
12 yọ re ọ sae jọ ọsẹ emọ nọ e yawo, orọnikọ rọkẹ enọ e ginẹ yawo ọvo ho, rekọ te enọ e be nya kpatiẹ nọ i wo oghẹrẹ ẹrọwọ nọ Abraham ọsẹ mai o wo evaọ okenọ ọ re yawo ho.
13 Keme orọnikọ fiki Uzi na nọ a je koko oye a rọ kẹ Abraham hayo ọmọ* riẹ eyaa na ha inọ ọ te reuku akpọ,* rekọ fikinọ a rri rie nọ o kiẹrẹe fiki ẹrọwọ.
14 Keme otẹrọnọ enọ i bi koko Uzi na họ ereuku na, kiyọ ẹrọwọ o fioka ha, eyaa na e tẹ jẹ rrọ ofofe.
15 Evaọ uzẹme, Uzi na o rẹ lẹliẹ ohwo ruẹ ofu Ọghẹnẹ, rekọ uzi o gbẹ rrọ họ, oruthọ ọ rẹ jariẹ gbe he.
16 Oyejabọ nọ o rọ rọnọ ẹkwoma ẹrọwọ a re ro wo eyaa na, re o ruẹse jọ fiki uwowou ulogbo, re eyaa na e sae jọ rọkẹ enọ e rrọ emọ* riẹ kpobi, orọnikọ rọkẹ enọ i bi koko Uzi na ọvo ho, rekọ te enọ e be rọ aro kele ẹrọwọ Abraham, ọnọ ọ rrọ ọsẹ mai kpobi.
17 (Nwane wọhọ epanọ a kere nọ: “Mẹ rehọ owhẹ mu ọsẹ erẹwho buobu.”) Onana o via evaọ aro Ọghẹnẹ, ọnọ o fi ẹrọwọ họ na, ọnọ ọ rẹ kpare enọ i whu no ze o ve je dhesẹ eware nọ e re via ha wọhọ ẹsenọ e via no.*
18 Dede nọ o wọhọ nọ o sae via ha, ọ rọ fiki ẹruore wo ẹrọwọ inọ ọ te sae jọ ọsẹ erẹwho buobu wọhọ epanọ a ya eyaa kẹe inọ: “Ere emọ* ra e te jọ.”
19 Yọ dede nọ ẹrọwọ riẹ o whrehe he, o roro kpahe oma riẹ, onọ o joma whu kpobi no (keme oke yena ọ jọ oware wọhọ ikpe udhusoi), gbe edhede Sera nọ o whu no.*
20 Rekọ fiki eyaa Ọghẹnẹ, ẹrọwọ riẹ o whrehe he; rekọ ọ jọ gaga evaọ ẹrọwọ jẹ kẹ Ọghẹnẹ oruaro,
21 yọ u mu rie ẹro ziezi nọ oware nọ Ọghẹnẹ ọ ya eyaa riẹ na Ọ te sai ru ei gba.
22 Fikiere “a tẹ rọ fiki oyena rri rie nọ o kiẹrẹe.”
23 Rekọ orọnọ fiki riẹ ọvo a ro kere eme nana ha inọ “a tẹ rọ fiki oyena rri rie nọ o kiẹrẹe,”
24 rekọ fiki mai re enọ a ti rri nọ a kiẹrẹe, keme ma fi ẹrọwọ họ Ọnọ ọ kpare Jesu Olori mai no uwhu ze na.
25 Ọ kuvẹ re a kpei fiki izieraha mai yọ a kpare riẹ ze re a ruẹsi rri omai kiẹrẹe.
Eme-Obotọ
^ Rri oria Otofa Eme.
^ Rri oria Otofa Eme.
^ Evaọ Griki, “ubi.”
^ Hayo “akpọ ọkpokpọ na.”
^ Evaọ Griki, “ubi.”
^ Hayo o sae jọ nọ, “o re ru oware nọ o rrọ họ nọ o jẹ romavia.”
^ Evaọ Griki, “ubi.”
^ Hayo “Sera nọ ọ be sai dihọ họ.”
