Eviavia 11:1-19
11 A tẹ kẹ omẹ ukpoko nọ o wọhọ ọkpọ nọ a rẹ rọ ma eware, ọ tẹ ta kẹ omẹ nọ: “Kpama re whọ ma uwou aruẹri etẹmpol Ọghẹnẹ gbe agbada-idhe na te ahwo nọ a be jariẹ gọ Ọghẹnẹ.
2 Rekọ who du ma etegu nọ ọ wariẹ uwou aruẹri etẹmpol na họ na ha, siẹe ba riẹriẹriẹ, keme a rehọ e riẹ kẹ erẹwho na no, yọ a te rọ evawọ thihi okpẹwho ọrẹri na evaọ emerae udhuvẹ gbe ivẹ.
3 Me ti ru isẹri ivẹ mẹ ruẹaro evaọ edẹ odu ọvo egba ivẹ gbe udhosa (1,260) avọ ehọ-ẹkporo nọ a ku họ.”
4 Ahwo nana họ enọ a rehọ ire olivi ivẹ na gbe edada-ikpẹ ivẹ na dhesẹ, yọ a dikihẹ aro Olori otọakpọ na.
5 Ohwo jọ ọ tẹ gwọlọ nwa ae oma, erae i re no unu rai ze e vẹ mahe ewegrẹ rai no. Ohwo jọ ọ tẹ gwọlọ nwa ae oma, ere a re ro kpei no.
6 A wo udu nọ a re ro wuhu ehru* na di re oso ọ gbẹ rrọ họ evaọ edẹ nọ a be rọ ruẹaro na, a te je wo udu nọ a re ro zihe ame ruọ azẹ jẹ rehọ oghẹrẹ uye kpobi te otọakpọ na oke kpobi nọ a gwọlọ.
7 Nọ a te ru iruo isẹri-ise rai re no, arao ojihẹ nọ o no ọgọdọ odidi na ze na o ti fi ae ẹmo, fi ae kparobọ je kpe ae no.
8 Iri rai e te jọ oko-ore okpẹwho ologbo na nọ a re se Sọdọm gbe Ijipti evaọ odẹme, oria nọ a jọ kare Olori rai fihọ ure kpe re.
9 Ahwo, erua, erọunu* gbe erẹwho na a ti rri iri rai evaọ edẹ esa gbe ubro, yọ a te rọwo nọ a ki iri rai hi.
10 Ahwo nọ a be rria otọakpọ na a te ghọghọ je ru ehaa fiki uwhu rai, a ti vi ekẹ se ohwohwo, keme eruẹaro ivẹ nana a jẹ rọ uye kẹ ahwo nọ a be rria otọakpọ na.
11 Nọ edẹ esa gbe ubro na e vrẹ no, ẹgba uzuazọ* o te no obọ Ọghẹnẹ ze ruọ ae oma, a tẹ kpama dikihẹ, ozọ ulogbo u te mu ahwo nọ a ruẹ e rai.
12 A te yo urru oruarua jọ nọ u do no obọ odhiwu ze nọ o ta kẹ ae nọ: “Wha nyaze obọ ehru obonẹ.” A te kpobọ odhiwu evaọ ẹgho, yọ ewegrẹ rai a ruẹ e rai.*
13 Evaọ auwa yena, otọ u te nuhu gaga, abọvo abakpe okpẹwho na o te zurie kie; otọ nọ u nuhu na u kpe ahwo idu ihrẹ (7,000), ozọ u te mu ahwo nọ a kiọkọ, a tẹ rọ oruaro kẹ Ọghẹnẹ obọ odhiwu.
14 Uye avọ ivẹ o vrẹ no. Rri! Uye avọ esa o be tha kpata kpata.
15 Ukọ-odhiwu avọ ihrẹ o te kporo ọgba riẹ. Me te yo edo irru eruarua jọ evaọ obọ odhiwu nọ e be ta nọ: “Uvie akpọ na u zihe ruọ Uvie Olori mai gbe orọ Kristi riẹ no, yọ O ti su wọhọ ovie bẹdẹ bẹdẹ.”
16 Ekpako udhegbene nọ e keria egbara-uvie rai evaọ aro Ọghẹnẹ na a te kie vovao tuotọ a tẹ gọ Ọghẹnẹ,
17 yọ a be ta nọ: “Ma yere owhẹ, Jihova* Ọghẹnẹ, Erumeru na, ọnọ ọ jọ, nọ ọ rrọ, keme who dhesẹ ogaga ulogbo ra via who te muhọ esu wọhọ ovie.
18 Rekọ ofu o te mu erẹwho na, ofu ra ọ tẹ ze, oke nọ a fihọ nọ a re ro bruoziẹ enọ i whu no u te te, gbe oke nọ a rẹ rọ hwosa kẹ erigbo ra eruẹaro na gbe erezi na gbe ahwo nọ a be dhozọ odẹ ra, te esese te ilogbo, gbe oke nọ a rẹ rọ raha enọ e be raha otọakpọ na.”
19 A te rovie uwou aruẹri etẹmpol Ọghẹnẹ nọ o rrọ obọ odhiwu, a tẹ ruẹ okọ ọvọ riẹ evaọ aruẹri etẹmpol riẹ. Egbrara e tẹ va, me te yo edo irru jẹ ruẹ elo egbrara gbe otọ nọ u nuhu gbe oso-itho ọgaga.
Eme-Obotọ
^ Hayo “odhiwu.”
^ Hayo “evẹrẹ.”
^ Hayo “ẹzi uzuazọ.”
^ Hayo “a je rri.”
^ Rri oria Otofa Eme.
