Eviavia 13:1-18
13 Araomuomu idudu na o te dikihẹ ehru uwẹkpẹ abade na.
Mẹ tẹ ruẹ arao ojihẹ jọ nọ o bi no evaọ abade na ze, o wo izei ikpe gbe izou ihrẹ, yọ itu-uvie ikpe e rrọ izei ikpe na, rekọ edẹ ekela e rrọ izou na.
2 Arao ojihẹ nọ mẹ ruẹ na ọ jọ wọhọ okeke, rekọ awọ riẹ e jọ wọhọ erọ adaka, yọ unu riẹ o jọ wọhọ unu okpohrokpo. Araomuomu idudu na ọ tẹ kẹ arao ojihẹ na ogaga, agbara-uvie, gbe udu-esuo ulogbo.
3 Mẹ tẹ ruẹ inọ, o wọhọ nọ a nwa uzou ovo riẹ jọ oma gaga, rekọ omonwa nọ o joma wha uwhu sei na u kpo no, akpọ na kpobi a te lele arao ojihẹ na yọ a be koyẹ kẹe.
4 A tẹ gọ araomuomu idudu na fikinọ ọ kẹ arao ojihẹ na udu-esuo, a tẹ ta eme nana rọ gọ arao ojihẹ na: “Ono ọ wọhọ arao ojihẹ na, kọ ono ọ rẹ sai lele iei fi ẹmo?”
5 Araomuomu idudu na ọ tẹ kẹe unu nọ ọ rẹ rọ ta ikpeme gbe eme-aghọ, jẹ kẹe udu nọ o re ro ru eware evaọ emerae udhuvẹ gbe ivẹ.
6 O te rovie unu riẹ be ta eme-aghọ kpahe Ọghẹnẹ, be ta eme-aghọ kpahe odẹ riẹ gbe oria nọ ọ be rria, makọ enọ e be rria obọ odhiwu.
7 A kẹ riẹ uvẹ re o fi erezi na ẹmo je fi ae kparobọ, a tẹ jẹ kẹe ogaga nọ o re ro su erua gbe oghoghẹrẹ ahwo gbe erọunu* gbe erẹwho kpobi.
8 Yọ ahwo kpobi nọ a be rria otọakpọ na a te gọe. No emuhọ akpọ* na ze, a kere odẹ rai ọvuọvo fihọ obe uzuazọ ọrọ Omogodẹ nọ a kpe na ha.
9 Jọ ọnọ o wo ezọ o yo.
10 Otẹrọnọ o gbahọ nọ ohwo jọ o re kpohọ igbo, o ti kpohọ igbo. Otẹrọnọ ohwo jọ ọ rehọ ọgbọdọ kpe ohwo,* a rẹ rehọ ọgbọdọ kpei hrọ. Onana o gwọlọ ithihakọ gbe ẹrọwọ mi erezi na.
11 Kẹsena mẹ tẹ ruẹ arao ojihẹ ọfa nọ o bi no otọakpọ na ze, o wo izei ivẹ nọ e wọhọ erọ omogodẹ, rekọ o te mu ẹme họ ẹta wọhọ araomuomu idudu.
12 Ọ tẹ be rehọ ogaga arao ojihẹ ọsosuọ na kpobi ro ruiruo evaọ aro arao ojihẹ ọsosuọ na. O te ru otọakpọ na gbe ahwo nọ a be rria eva riẹ gọ arao ojihẹ ọsosuọ na, ọnọ omonwa riẹ nọ o joma wha uwhu sei u kpo no na.
13 Yọ o bi ru eware eka ilogbo, bi tube se erae no obọ odhiwu ze fihọ otọakpọ na evaọ aro ahwo-akpọ.
14 O bi su ahwo nọ a be rria otọakpọ na thọ fiki eware eka nọ a kẹ riẹ uvẹ nọ o ru evaọ aro arao ojihẹ na, yọ ọ be ta kẹ ahwo nọ a be rria otọakpọ na nọ a ma ẹmema arao ojihẹ nọ a rọ ọgbọdọ duwu rekọ nọ o dhidhi aro vi na.
15 A kẹ riẹ uvẹ re ọ kẹ ẹmema arao ojihẹ na ẹwẹ,* re ẹmema arao ojihẹ na ọ ta ẹme je ru re a kpe ahwo kpobi nọ a se nọ a rẹ gọ ẹmema arao ojihẹ na ha.
16 Ọ tẹ be gba ahwo kpobi họ, te esese te ilogbo, te edafe te iyogbere, te emuyẹ te erigbo, re a rọwo nọ a kpokahọ obọze rai hayo aruezo rai,
17 re ohwo ọvo ọ gbẹ sae dẹ hayo zẹ hẹ ajokpaọ ohwo nọ o wo oka na, koyehọ odẹ arao ojihẹ na hayo inọmba odẹ riẹ.
18 Re a sai wo otoriẹ onana o gwọlọ areghẹ: Jọ ọnọ o wo orimuo o kele inọmba arao ojihẹ na, keme inọmba ohwo-akpọ o rrọ, inọmba riẹ họ 666.
Eme-Obotọ
^ Hayo “ẹvẹrẹ.”
^ Onana u dhesẹ okenọ Adamu avọ Ivi a ro mu emọ họ eyẹ.
^ Hayo o sae jọ nọ, “Otẹrọnọ o gbahọ nọ a rẹ rehọ ọgbọdọ kpe ahwo jọ.”
^ Hayo “ẹzi.”
