Eviavia 19:1-21
19 Nọ onana o vrẹ no, me te yo urru oruarua jọ nọ o wọhọ orọ ogbotu obuobu evaọ obọ odhiwu. A ta nọ: “Wha jiri Jah!* Obọ Ọghẹnẹ mai esiwo na o no ze, ọnọ o wo oruaro gbe ogaga na,
2 keme oziẹobro riẹ ọ rrọ gbagba je kiẹrẹe. Ọ raha ogberẹ ologbo na no ọnọ ọ rehọ ọfariẹ-ogbe* riẹ ro gbe otọakpọ na ku, yọ ọ kioja azẹ idibo riẹ nọ ogberẹ na o kpe no.”
3 A tẹ nwane ta orọ avọ isiava nọ: “Wha jiri Jah!* Iwiri ọraha ogberẹ na i ti kuye bẹdẹ bẹdẹ.”
4 Ekpako udhegbene na gbe ikọ-odhiwu ene na a te kigwẹ gọ Ọghẹnẹ, ọnọ ọ keria agbara-uvie na, a tẹ ta nọ: “Ami! Wha jiri Jah!”*
5 Ofariẹ, urru jọ u te do no agbara-uvie na ze nọ o ta nọ: “Wha hai jiri Ọghẹnẹ mai, whai erigbo riẹ kpobi nọ e be dhozọ riẹ, te esese te ilogbo.”
6 Me te yo edo jọ nọ o wọhọ irru ogbotu obuobu, jẹ wọhọ edo ame obuobu jẹ wọhọ edo egbrara egaga. A ta nọ: “Wha jiri Jah,* keme Jihova* Ọghẹnẹ mai, Erumeru na o muhọ esu no wọhọ ovie!
7 Joma ghọghọ jẹ wereva gaga, jẹ rehọ oruaro kẹe, keme orọo Omogodẹ na u te no yọ aye riẹ ọ ruẹrẹ oma kpahe no.
8 A kẹ riẹ uvẹ re ọ rehọ emamọ ehọ-elọlọhọ nọ e rrọ nwranwranwra jẹ fo rọ gẹgọ—keme emamọ ehọ-elọlọhọ na i dikihẹ kẹ iruo ikiẹrẹe erezi na.”
9 Ọ tẹ ta kẹ omẹ nọ, “Kere: Eva e were enọ a zizie kpohọ emu owọwọ ọrọ ehaa-orọo Omogodẹ na.” Ọ tẹ jẹ ta kẹ omẹ nọ: “Eme nana yọ eme Ọghẹnẹ nọ a re fievahọ.”
10 Me te kigwẹ fihọ aro riẹ re mẹ gọe. Rekọ ọ tẹ ta kẹ omẹ nọ: “Yọroma! Who ru ere he! Ibe ọrigbo ra gheghe mẹ rrọ gbe ọrọ inievo ra nọ i wo iruo isẹri-ise kpahe Jesu. Gọ Ọghẹnẹ! Keme isẹri-ise kpahe Jesu họ oware nọ o rẹ wha eruẹaruẹ ze.”
11 Mẹ ruẹ odhiwu nọ o rovie, gbe anyenya ọfuafo jọ. Odẹ ọnọ ọ keria ehru riẹ họ Ọnọ A re Fievahọ gbe Ọrọ Uzẹme, o re bruoziẹ je fi ẹmo nọ o kiẹrẹe.
12 Ibiaro riẹ yọ ebrerae, yọ itu-uvie buobu e rrọ uzou riẹ. O wo odẹ nọ a kere fihọ oma riẹ nọ ohwo ọvo ọ riẹ hẹ ajokpaọ ọyomariẹ ọvo,
13 o ku ewu ehru họ nọ azẹ o gbe,* yọ odẹ nọ a bi sei họ, Ẹme Ọghẹnẹ.
14 Ofariẹ, egbaẹmo obọ odhiwu nọ e rrọ ehru enyenya efuafo a je lele iei, yọ a rehọ emamọ ehọ-elọlọhọ nọ e rrọ fuafo jẹ fo rọ gẹgọ.
15 Ọgbọdọ nọ ọ rrọ thethei jẹ rrọ dada u wolo no unu riẹ ze nọ o re ro kpe erẹwho na, yọ ọ te rehọ ọkpọ ayọno su ai. Ofariẹ, o ti thihi ibi nọ e rrọ umi-udi ofu Ọghẹnẹ Erumeru na.
16 A kere odẹ jọ fihọ ewu ehru riẹ evaọ obọ ekpokpowọ riẹ, oye họ Ovie ivie gbe Olori ilori.
17 Mẹ tẹ jẹ ruẹ ukọ-odhiwu jọ nọ o dikihẹ ọre na, ọ tẹ rehọ urru oruarua bo jẹ ta kẹ evra kpobi nọ e rẹ rra evaọ idadeghe na nọ: “Wha nyaze ti kokohọ kẹ emu owọwọ ologbo Ọghẹnẹ,
18 re wha re uwo-oma ivie gbe uwo-oma enọ i wuzou egbaẹmo gbe uwo-oma egba gbe uwo-oma enyenya avọ enọ e keria ehru rai, gbe uwo-oma ahwo kpobi, orọ emuyẹ te erigbo gbe orọ ahwo esese te ilogbo.”
19 Mẹ tẹ ruẹ arao ojihẹ na gbe ivie otọakpọ na avọ egbaẹmo rai nọ a kokohọ re a lele ọnọ ọ keria anyenya na avọ egbaẹmo riẹ fi ẹmo.
20 A te kru arao ojihẹ na avọ ọruẹaro ọrue nọ ọ jẹ jọ aro riẹ ru eware igbunu na, enọ o ro su ahwo nọ a kpoka arao ojihẹ na họ thọ gbe ahwo nọ a be gọ ẹmema riẹ. Epanọ a gbẹ rọ rrọ uzuazọ na, a te gbolo aimava fihọ ẹtẹre erae nọ isọ-ọre e be jọ to.
21 Rekọ a tẹ rehọ ọgbọdọ othethei nọ u wolo no unu ọnọ ọ keria anyenya na ze na ro kpe ahwo nọ a kiọkọ. Evra na kpobi a tẹ re iwo-oma rai, a tẹ re eva vọ.
Eme-Obotọ
^ Hayo “Aleluya; Halelujah.” Jah yọ ubro odẹ na Jihova.
^ Evaọ Griki, por·neiʹa. Rri oria Otofa Eme.
^ Hayo “Aleluya; Halelujah.” Jah yọ ubro odẹ na Jihova.
^ Hayo “Aleluya; Halelujah.” Jah yọ ubro odẹ na Jihova.
^ Hayo “Aleluya; Halelujah.” Jah yọ ubro odẹ na Jihova.
^ Rri oria Otofa Eme.
^ Hayo o sae jọ nọ, “nọ a frẹ azẹ ku.”
