Eviavia 21:1-27
21 Mẹ tẹ ruẹ odhiwu ọkpokpọ avọ otọakpọ ọkpokpọ; keme odhiwu ọsosuọ na avọ otọakpọ ọsosuọ na e vrẹ no, yọ abade na ọ gbẹ riẹ hẹ.
2 Mẹ tẹ jẹ ruẹ okpẹwho ọrẹri na, Jerusalẹm Ọkpokpọ na, nọ o bi no obọ odhiwu ze, no obọ Ọghẹnẹ ze, yọ ọ wọhọ ọmọtibobo nọ a gẹgọ be hẹrẹ ọzae riẹ.
3 Kẹsena me te yo urru oruarua jọ nọ u do no agbara-uvie na ze nọ o ta nọ: “Rri! Uwou* Ọghẹnẹ o te jọ udevie ahwo-akpọ, ọ te rria kugbe ae, yọ a te jọ ahwo riẹ. Ọghẹnẹ omariẹ ọ te jọ kugbe ae.
4 Yọ o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no.”
5 Ọnọ ọ keria agbara-uvie na ọ tẹ ta nọ: “Rri! Me bi ru eware kpobi họ ekpokpọ.” Ọ tẹ jẹ ta nọ: “Kere, keme eme nana yọ eme nọ a re fievahọ, e tẹ jẹ rrọ uzẹme.”
6 Ọ tẹ ta kẹ omẹ nọ: “Eme na i rugba no! Mẹ họ Alfa gbe Omẹga,* emuhọ gbe ekuhọ na. Ohwo kpobi nọ uruame u bi kpe, mẹ te jọ eyeri-ame ọrọ ame uzuazọ na kẹe re ọ da ọvọvẹ.*
7 Ohwo kpobi nọ o bi fi kparobọ ọ te reuku eware nana, mẹ te jọ Ọghẹnẹ riẹ, ọ vẹ te jọ ọmọ mẹ.
8 Rekọ edhozọ gbe ahwo nọ a wo ẹrọwọ họ gbe ahwo nọ a bi ru eware etọtọ gbe enọ i re kpe ahwo gbe enọ i bi gbe-ọfariẹ* gbe enọ i bi ru iruẹru-imizi gbe egedhọ gbe eterue na kpobi, a te jọ evaọ ẹtẹre nọ erae avọ isọ-ọre e be jọ to na. Onana u dikihẹ kẹ uwhu avọ ivẹ na.”
9 Omọvo ikọ-odhiwu ihrẹ nọ i kru imidhe ihrẹ enọ iye ihrẹ urere na e jọ eva na ọ tẹ nyaze ọ tẹ ta kẹ omẹ nọ: “Nyaze, re me dhesẹ ọmọtibobo na, aye Omogodẹ na kẹ owhẹ.”
10 Fikiere ọ tẹ rọ ogaga ẹzi na wọ omẹ vrẹ kpohọ ugbehru ulogbo jọ nọ o rrọ kpekpehru, o te dhesẹ Jerusalẹm okpẹwho ọrẹri na kẹ omẹ nọ o bi no obọ odhiwu ze, no obọ Ọghẹnẹ ze,
11 yọ o wo oruaro Ọghẹnẹ. O je lo wọhọ utho nọ o rrọ ghaghae gaga, wọhọ utho jaspa nọ u bi lo nọ a rẹ ruẹ lafi.
12 U wo ugbẹhẹ ulogbo nọ o rrọ kpekpehru yọ u wo inuẹthẹ ikpegbivẹ, avọ ikọ-odhiwu ikpegbivẹ nọ e rrọ inuẹthẹ na, yọ a kere edẹ erua ikpegbivẹ erọ emọ Izrẹl fihọ inuẹthẹ na.
13 Inuẹthẹ esa e jọ ofẹ ovatha-ọre, evaọ ofẹ ẹkpẹlobọ ovatha-ọre inuẹthẹ esa, evaọ ofẹ obọze ovatha-ọre inuẹthẹ esa, evaọ ofẹ ukiediwo-ọre inuẹthẹ esa.
14 Ugbẹhẹ okpẹwho na u te je wo itho otọhotọ ikpegbivẹ, yọ a kere edẹ ikpegbivẹ erọ ikọ ikpegbivẹ Omogodẹ na fihọ ae.
15 Whaọ, ọnọ ọ jẹ ta ẹme kẹ omẹ na o kru ọkpọ* igoru nọ ọ gwọlọ rọ ma okpẹwho na avọ inuẹthẹ riẹ gbe ugbẹhẹ riẹ.
16 Okpẹwho na o wo ibienẹ ene, yọ uthethei riẹ avọ okẹkẹe riẹ ẹrẹrẹe. Ọ tẹ rehọ ọkpọ na ma okpẹwho na, u te estadia idu ikpegbivẹ (12,000);* te uthethei te okẹkẹe te ekpehru riẹ ẹrẹrẹe.
17 Ọ tẹ jẹ ma ugbẹhẹ riẹ, u te ikiubiti 144,* wọhọ epaọ ikelakele ohwo-akpọ gbe ikelakele ukọ-odhiwu.
18 Whaọ, itho jaspa a rọ ma ugbẹhẹ na, okpẹwho na kọ igoru nọ o wọhọ ughẹgbe nọ a rẹ ruẹ lafi.
19 A rehọ oghẹrẹ itho eghaghae kpobi rọ whẹ erru họ otọhotọ ugbẹhẹ okpẹwho na: otọhotọ ọsosuọ u wo utho jaspa, orọ avọ ivẹ safaya, orọ avọ esa kalsidoni, orọ avọ ene ẹmerald,
20 orọ avọ isoi sardoniks, orọ avọ ezeza sardiọs, orọ avọ ihrẹ krisolaet, orọ avọ eree bẹril, orọ avọ izii topaz, orọ avọ ikpe krisopras, orọ avọ ikpegbọvo hayasint, orọ avọ ikpegbivẹ amethist.
21 Ofariẹ, inuẹthẹ ikpegbivẹ na i wo izuu ikpegbivẹ; uzuu a ro ru ethẹ na ọvuọvo. Obọdẹ igoru a ro ru oko-ore okpẹwho na, yọ o wọhọ ughẹgbe nọ a rẹ ruẹ lafi.
22 Mẹ ruẹ etẹmpol evaọ eva riẹ hẹ, keme Jihova* Ọghẹnẹ Erumeru na họ etẹmpol riẹ, ere Omogodẹ na re.
23 U du gwọlọ nọ ọre hayo ọvẹre o re lo fihọ okpẹwho na ha, keme oruaro Ọghẹnẹ o whẹ elo fihọ iẹe no, yọ ukpẹ riẹ họ Omogodẹ na.
24 Elo riẹ erẹwho na a te rọ ruẹ ude nya, yọ ivie otọakpọ na a te rọ oruaro rai ziọ eva riẹ.
25 A te kare inuẹthẹ riẹ vievie he evaọ okpẹdoke na soso, keme aso ọ te jọ etẹe he.
26 Ivie na a te rọ oruaro gbe ọghọ erẹwho na ziọ eva riẹ.
27 Rekọ oware kpobi nọ u gbeku gbe ohwo kpobi nọ o bi ru oware otọtọ jẹ vọ avọ eviẹhọ ọ te ruọ eva riẹ vievie he; enọ a kere odẹ rai fihọ uko-obe uzuazọ Omogodẹ na ọvo a te ruọ eva riẹ.
Eme-Obotọ
^ Evaọ Griki, “uwou-udhu.”
^ Hayo “ọnọ ọ rrọ A gbe Z.” Alfa gbe Omẹga họ ubiẹme ọsosuọ gbe ọrọ urere evaọ ibieme Griki.
^ Hayo “ababọ ugho.”
^ Rri oria Otofa Eme, “Ọfariẹ-ogbe.”
^ Evaọ Griki, “ukpoko.”
^ Oware wọhọ ikilomita 2,220 (emaele 1,379).
^ Oware wọhọ imita 64 (irula 210). Rri “Ikiubiti” evaọ oria Otofa Eme.
^ Rri oria Otofa Eme
