Eviavia 3:1-22
3 “Kere se ọnyukọ ukoko nọ o rrọ Sadis nọ: Enẹ ọnọ o wo izi ihrẹ Ọghẹnẹ, nọ isi ihrẹ na e rrọ obọ riẹ na ọ ta: ‘Mẹ riẹ eware nọ who bi ru, a bi rri owhẹ nọ whọ rrọ uzuazọ, rekọ who whu no.
2 Muẹrohọ otọ, re whọ bọ eware nọ i kiọkọ nọ e kẹle uwhu no na ga, keme mẹ ruẹ nọ who ri ru iruo nọ Ọghẹnẹ mẹ ọ gwọlọ mi owhẹ gba ha.
3 Fikiere, hai roro kpahe* eware nọ a kẹ owhẹ gbe eware nọ who yo, re whọ jẹ hai koko ai je kurẹriẹ. Whọ gbẹ rọwo no owezẹ ze he, mẹ te nyaze wọhọ oji, whọ te riẹ auwa nọ mẹ te rọ nya bru owhẹ ze he.
4 “‘Rekọ, who wo umutho ahwo* jọ evaọ Sadis nọ a gbe iwu rai ku hu, yọ a ti ku iwu efuafo họ lele omẹ nya, keme a te kẹ ọghọ nana.
5 Ọnọ o fi kparobọ o ti ku iwu efuafo họ, yọ me ti voro odẹ riẹ no obe uzuazọ na vievie he, rekọ mẹ te fodẹ odẹ riẹ evaọ aro Ọsẹ mẹ gbe ikọ-odhiwu riẹ.
6 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’
7 “Kere se ọnyukọ ukoko nọ o rrọ Filadelfia nọ: Enẹ ọnọ ọ rrọ ọrẹri na ọ ta, ọnọ ọ rrọ ọrọ uzẹme, nọ o wo usiavẹ Devidi, nọ o te rovie no ohwo ọvo ọ sae kare he, yọ ọ tẹ kare no ohwo ọvo ọ sai rovie he:
8 ‘Mẹ riẹ eware nọ who bi ru, rri! me rovie ẹthẹ fihọ aro ra, onọ ohwo ọvo ọ sae kare he. Mẹ riẹ nọ who wo umutho ogaga jọ, yọ who ru lele ẹme mẹ, uruemu ra u dhesẹ nọ whọ siọ omẹ* hẹ.
9 Rri! Enọ e rrọ utu* Setan nọ e be ta nọ ahwo Ju a rrọ rekọ nọ a rrọ ahwo Ju hu nọ a be ta ọrue na, me ti ru ae nyaze te rọ uzou kpotọ kẹ owhẹ je ru ae riẹ nọ me you owhẹ.
10 Fikinọ who ru lele ẹme nọ who yo kpahe ithihakọ mẹ,* mẹ te sẹro ra evaọ auwa odawọ na, onọ u ti te otọakpọ na soso, re a dawo enọ e be rria otọakpọ na.
11 Mẹ be nyaze vẹrẹ vẹrẹ. Gbe kru oware nọ who wo na ga, re ohwo ọvo o gbe mi owhẹ etu-uvie ra ha.
12 “‘Me ti ru ọnọ o fi kparobọ jọ odẹẹ evaọ etẹmpol Ọghẹnẹ mẹ, yọ oware ovo u ti si ei no etẹe vievie he, me ti kere odẹ Ọghẹnẹ mẹ gbe odẹ okpẹwho Ọghẹnẹ mẹ fihọ iẹe uzou, Jerusalẹm Ọkpokpọ na nọ o bi no obọ odhiwu ze, no obọ Ọghẹnẹ mẹ ze, gbe odẹ okpokpọ mẹ na.
13 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’
14 “Kere se ọnyukọ ukoko nọ o rrọ Laodisia nọ: Enẹ Ami na ọ ta, osẹri uzẹme nọ a re fievahọ na, ọnọ ọ rrọ emuhọ emama Ọghẹnẹ:
15 ‘Mẹ riẹ eware nọ who bi ru, who dhẹ hẹ yọ whọ rrorro ho. O hae were omẹ orọnọ who dhẹ hayo whọ rrorro.
16 Fikiere, me ti nwo owhẹ kufiẹ no unu mẹ fikinọ whọ rrọ ruọruọruọ, who dhẹ hẹ yọ whọ rrorro ho.
17 Whọ be ta nọ, “Me fe je wo ekwakwa buobu yọ oware ovo o kare omẹ hẹ,” rekọ whọ riẹ hẹ inọ whọ rrọ iyiyẹ, kare evawere, yogbe, tuaro jẹ rrọ ẹbẹba,
18 fikiere, mẹ be hrẹ owhẹ nọ whọ dẹ igoru nọ a rọ erae ghra fo no mi omẹ re whọ sai fe, gbe iwu efuafo nọ who re kuhọ re a siọ ẹba ra ba ẹruẹ re oma o siọ owhẹ ba ẹvuọ, gbe umu ibiaro nọ who re gbehọ ibiaro ra re whọ sae ruẹ ude.
19 “‘Mẹ rẹ whọku jẹ rọ uye kẹ ahwo kpobi nọ me you. Fikiere wo ajọwha je kurẹriẹ.
20 Rri! Me dikihẹ unuẹthẹ bi kporo. Ohwo kpobi nọ o yo urru mẹ o je rovie ẹthẹ, mẹ te ruọ uwou riẹ me ve ti lele iei re emu owọwọ, ọyomariẹ o ve ti lele omẹ re re.
21 Mẹ te kẹ ọnọ o fi kparobọ uvẹ re ọ keria kugbe omẹ evaọ agbara-uvie mẹ, wọhọ epanọ me fi kparobọ nọ mẹ jẹ keria kugbe Ọsẹ mẹ evaọ agbara-uvie riẹ na.
22 Jọ ọnọ o wo ezọ o yo ẹme nọ ẹzi na ọ be ta kẹ ikoko na.’”
Eme-Obotọ
^ Hayo “kareghẹhọ.”
^ Evaọ Griki, “umutho edẹ.”
^ Evaọ Griki, “odẹ mẹ.”
^ Evaọ Griki, “uwou-egagọ.”
^ Hayo o sae jọ nọ, “lele oriruo ithihakọ mẹ.”
