Eviavia 5:1-14
5 Mẹ tẹ jọ obọze Ọnọ ọ keria agbara-uvie na ruẹ uko-obe nọ a kere eme fihọ tabọ tabọ* riẹ, nọ a gba di kekeke avọ eka ihrẹ.
2 Mẹ tẹ ruẹ ukọ-odhiwu ọgaga jọ nọ ọ be rọ urru oruarua bo nọ: “Ono o te nọ o re si eka na no re o rovie uko-obe na?”
3 Rekọ ohwo ọvo evaọ odhiwu hayo otọakpọ hayo obọ otọ ẹkpẹ na ọ sai rovie uko-obe na hayo sei hi.
4 Mẹ tẹ jẹ viẹ gaga keme a ruẹ ohwo ọvo nọ o te nọ o re rovie uko-obe na hayo sei hi.
5 Rekọ omọvo ekpako na ọ tẹ ta kẹ omẹ nọ: “Whọ gbẹ viẹ hẹ. Rri! Okpohrokpo orua Juda, ọnọ ọ rrọ owọ-ure Devidi o fi kparobọ no, fikiere ọ rẹ sai si eka ihrẹ na no re o rovie uko-obe na.”
6 Mẹ tẹ jọ aro agbara-uvie na gbe ikọ-odhiwu ene na gbe udevie ekpako na ruẹ omogodẹ jọ nọ o wọhọ nọ a kpe no, nọ o wo izei ihrẹ gbe ibiaro ihrẹ, yọ ibiaro na i dikihẹ kẹ izi ihrẹ Ọghẹnẹ nọ a vi ruọ otọakpọ na soso.
7 Ọ tẹ nwane nya lahwe ọ tẹ rehọ uko-obe na no obọze Ọnọ ọ keria agbara-uvie na.
8 Nọ ọ rehọ uko-obe na, ikọ-odhiwu ene na gbe ekpako udhegbene na a te kigwẹ fihọ aro Omogodẹ na, omomọvo o kru akpata, yọ a wo imidhe igoru nọ insẹnse e vọ eva. (Insẹnse na i dikihẹ kẹ elẹ erezi na.)
9 Yọ a be so ole ọkpokpọ, inọ: “Who te ọnọ ọ rẹ rehọ uko-obe na je si eka na no, keme a kpe owhẹ whọ tẹ rehọ azẹ ra dẹ ahwo kẹ Ọghẹnẹ no orua kpobi, ẹrọunu* kpobi, oghoghẹrẹ ahwo gbe orẹwho kpobi ze,
10 who te ru ae re a jọ ivie gbe izerẹ kẹ Ọghẹnẹ mai, yọ a te jọ ivie nọ i ti su otọakpọ na.”
11 Mẹ tẹ ruẹ je yo edo urru ikọ-odhiwu buobu nọ e wariẹ agbara-uvie na gbe ikọ-odhiwu ene na gbe ekpako na họ, yọ a bu te idu ikpe isia idu ikpe buobu gbe idu isia idu buobu,
12 yọ a jẹ rọ urru oruarua ta nọ: “Omogodẹ nọ a kpe na o te ọnọ o re wo ogaga, efe, areghẹ, ẹgba, ọghọ, oruaro gbe ajiri na.”
13 Me te yo edo emama kpobi nọ e rrọ odhiwu gbe otọakpọ gbe obọ otọ ẹkpẹ na gbe abade, gbe eware kpobi nọ e rrọ eva rai nọ e be ta nọ: “Ọnọ ọ keria agbara-uvie na gbe Omogodẹ na a re wo ajiri, ọghọ, oruaro, gbe ogaga na bẹdẹ bẹdẹ.”
14 Ikọ-odhiwu ene na a jẹ ta nọ: “Ami,” ekpako na a te kigwẹ gọ Ọghẹnẹ.
