Eviavia 6:1-17
-
Omogodẹ na o si eka ihrẹ nọ a rọ gba uko-obe na di na no (1-17)
-
Ọnọ ọ keria anyenya ọfuafo na o bi fi kparobọ (1, 2)
-
A ta kẹ ọnọ ọ be dhẹ anyenya ọwawae na inọ ọ tọlọ udhedhẹ no (3, 4)
-
A ta kẹ ọnọ ọ be dhẹ anyenya obiebi na inọ ọ wha ohọo ze (5, 6)
-
Uwhu họ odẹ ọnọ ọ be dhẹ anyenya ọviẹviẹ na (7, 8)
-
Ahwo nọ a kpe a rrọ otọ agbada-idhe na (9-11)
-
Otọ nọ u nuhu gaga (12-17)
-
6 Mẹ tẹ ruẹ Omogodẹ na nọ o si ovojọ evaọ usu eka ihrẹ na no, me te yo nọ omọvo ikọ-odhiwu ene na ọ rehọ urru nọ u do wọhọ agbrara ta nọ: “Nyaze!”
2 Mẹ tẹ ruẹ anyenya ọfuafo, yọ ọnọ ọ keria ehru riẹ o kru uzei; a kẹ riẹ etu-uvie, ọ tẹ dhẹ vrẹ bi fi kparobọ, re o fi kparobọ riẹriẹriẹ.
3 Nọ o si oka avọ ivẹ na no, me te yo nọ ukọ-odhiwu avọ ivẹ na ọ ta nọ: “Nyaze!”
4 Anyenya ọfa ọ tẹ lahwe, anyenya ọwawae, yọ a kẹ ọnọ ọ keria ehru riẹ udu re ọ tọlọ udhedhẹ no otọakpọ na re ahwo a kpe ohwohwo, a kẹ riẹ ọgbọdọ ologbo.
5 Nọ o si oka avọ esa na no, me te yo nọ ukọ-odhiwu avọ esa na ọ ta nọ: “Nyaze!” Kẹsena mẹ tẹ ruẹ anyenya obiebi, yọ ọnọ ọ keria ehru riẹ o kru oware nọ a rẹ rọ wawọ eware họ obọ.
6 Me te yo edo urru jọ evaọ udevie ikọ-odhiwu ene na nọ o ta nọ: “Unuigho ugbogbo* eka họ dinariọs,* yọ unuigho igbogbo esa ebali họ dinariọs; rekọ who du ru re ewhri olivi gbe udi na u re he.”
7 Nọ o si oka avọ ene na no, me te yo urru ukọ-odhiwu avọ ene na nọ ọ ta nọ: “Nyaze!”
8 Me rri, mẹ tẹ ruẹ anyenya ọviẹviẹ, yọ odẹ ọnọ ọ keria ehru riẹ họ Uwhu. Yọ Uki* u bi lele iei kpekpekpe. A kẹ rai udu nọ a re ro kpe evaọ abọvo abane otọakpọ na, re a rehọ ọgbọdọ othethei gbe ohọo gbe ẹyao ọgaga gbe erao ijihẹ ro kpe ahwo.
9 Nọ o si oka avọ isoi na no, mẹ tẹ jọ otọ agbada-idhe na ruẹ azẹ ahwo nọ a kpe fikinọ a lele ẹme Ọghẹnẹ gbe fiki isẹri-ise rai.
10 A tẹ rọ urru oruarua bo nọ: “Olori Ehrugbakpọ nọ ọ rrọ ọrẹri jẹ rrọ ọrọ uzẹme, ẹvẹ u ti kri te re who te bruoziẹ ahwo nọ a be rria otọakpọ na jẹ kioja azẹ mai?”
11 A tẹ rehọ ewu ọfuafo kẹ ae omomọvo, a tẹ ta kẹ ae nọ a gbe serihọ omojọ, bẹsenọ unu ibe erigbo rai gbe inievo rai nọ a bi ti kpe wọhọ ae omarai o rẹ gba no.
12 Mẹ ruẹ e riẹ nọ o si oka avọ ezeza na no, otọ u te nuhu gaga; ọre na o te muebi wọhọ ohọ-ẹkporo nọ a rọ eto* ru, ọvẹre na ọ tẹ wọhọ azẹ,
13 isi obọ odhiwu i te kie fihọ otọakpọ na wọhọ epanọ ibi ure ifigi nọ e re ware he e rẹ kpare kie nọ ofou ọgaga o te fou rie.
14 Odhiwu na ọ tẹ vrẹ no wọhọ uko-obe nọ a bi kpiri, ugbehru kpobi gbe ukoliko kpobi u te no oria riẹ.
15 Kẹsena ivie otọakpọ na, enọ i wo ekwa ilogbo, enọ i wuzou egbaẹmo, edafe, egba, erigbo kpobi gbe emuyẹ kpobi a te dhere ighogho-itho gbe udevie igbehru itho.
16 A tẹ be ta kẹ igbehru gbe itho na nọ: “Wha kie ruru omai re wha ko omai dhere no ovao Ọnọ ọ keria agbara-uvie na je no ofu Omogodẹ na,
17 keme ẹdẹ ofu rai ọ ze no, kọ ono ọ rẹ sai dikihẹ?”
Eme-Obotọ
^ Ugbogbo nọ o rẹ sae vọ ọgọ ebiẹ.
^ Rri oria Otofa Eme.
^ Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
^ O sae jọ eto ẹwe.
