Eviavia 8:1-13
8 Nọ o si oka avọ ihrẹ na no, oria kpobi o tẹ fọ rirẹ evaọ odhiwu oware wọhọ ubro auwa.
2 Mẹ tẹ ruẹ ikọ-odhiwu ihrẹ nọ i dikihẹ aro Ọghẹnẹ, a tẹ rehọ egba ihrẹ kẹ ae.
3 Ukọ-odhiwu ọfa jọ nọ o kru omodhe insẹnse* ọrọ igoru ọ tẹ nyaze o te dikihẹ kẹle agbada-idhe na, a tẹ kẹe insẹnse buobu re ọ mahe evaọ ehru agbada-idhe igoru nọ ọ rrọ aro agbara-uvie na evaọ okenọ erezi na a be lẹ na.
4 Iwiri insẹnse na nọ i je kuye no obọ ukọ-odhiwu na ze na i te kuye lele elẹ erezi na kpobọ aro Ọghẹnẹ.
5 Rekọ ukọ-odhiwu na ọ tẹ nwane jọ agbada-idhe na whẹ erae jọ fihọ omodhe insẹnse na o te ku erae na fihọ otọakpọ na. Egbrara e tẹ va, me te yo edo irru jẹ ruẹ elo egbrara gbe otọ nọ u nuhu.
6 Ikọ-odhiwu ihrẹ nọ i kru egba ihrẹ na a tẹ ruẹrẹ oma kpahe re a kporo egba na.
7 Ọrọ ọsosuọ o te kporo ọgba riẹ. Oso-itho avọ erae nọ azẹ ọ gua kugbe ọ tẹ romavia, a te ku ei fihọ otọakpọ na; abọvo abasa otọakpọ na o tẹ to no, abọvo abasa ire na e tẹ to no, ẹbe ọrọrọ kpobi ọ tẹ to no.
8 Ukọ-odhiwu avọ ivẹ o te kporo ọgba riẹ. Kẹsena a te gbolo oware jọ nọ o wọhọ ugbehru ulogbo nọ o be to fihọ abade na. Abọvo abasa abade na o te zihe ruọ azẹ;
9 abọvo abasa emama nọ i wo uzuazọ nọ e rrọ abade na i te whu, abọvo abasa ekọ na i te zue.
10 Ukọ-odhiwu avọ esa o te kporo ọgba riẹ. Esi ologbo jọ nọ o bi lo wọhọ ukpẹ o te kie no obọ odhiwu ze, o te kie fihọ abọvo abasa ithẹ na gbe iyeri-ame.
11 Odẹ esi na họ Ure Ọyayare. Abọvo abasa ame na o te muhọ ẹyare, ibuobu ahwo na a te whu fiki ame na, keme o zihe ruọ ame ọyayare no.
12 Ukọ-odhiwu avọ ene o te kporo ọgba riẹ. Abọvo abasa ọre na gbe abọvo abasa ọvẹre na gbe abọvo abasa isi na i te bi no, re abọvo abasa rai o muebi, re a gbẹ ruẹ elo evaọ abọvo abasa okpẹdoke na ha, ere aso na re.
13 Mẹ tẹ ruẹ ugo jọ nọ o be rra evaọ idadeghe na je yo nọ o be rọ urru oruarua ta nọ: “Uye, uye, uye u ti te ahwo nọ a be rria otọakpọ na fiki egba nọ ikọ-odhiwu esa nọ i kiọkọ na i bi ti kporo na!”
Eme-Obotọ
^ Hayo “omodhe nọ a re fi insẹnse họ mahe.”
