Eviavia 9:1-21
9 Ukọ-odhiwu avọ isoi o te kporo ọgba riẹ. Mẹ tẹ ruẹ esi nọ o kie no obọ odhiwu ziọ otọakpọ, yọ a kẹ riẹ usiavẹ unu ọgọdọ odidi na.
2 O te rovie unu ọgọdọ odidi na, iwiri i te kuye no unu ọgọdọ na ze wọhọ iwiri ebrerae, iwiri na i te ru ọre na gbe ofou na muebi.
3 Ebaka-ẹkpẹ i te no iwiri na ze ruọ otọakpọ na, yọ a kẹ rai ogaga, oghẹrẹ ogaga nọ e whọhro-imuomu otọakpọ na a wo na.
4 A ta kẹ ae nọ a du raha ẹbe nọ ọ rrọ otọakpọ na hayo ekakọ hayo ure ovo ho, ajokpaọ ahwo nọ a wo oka Ọghẹnẹ evaọ aruezo rai hi na.
5 A kẹ ebaka-ẹkpẹ na ogaga, orọnikọ re a kpe ahwo na ha, rekọ re a kẹ ae uye evaọ emerae isoi, yọ uye na o wọhọ epaọ ohwo nọ ọwhọhro-omuomu ọ sa.
6 Evaọ edẹ yena ahwo a ti se uwhu rekọ a te ruẹ e riẹ vievie he, a te gwọlọ whu, rekọ uwhu o te dhẹ siọ ae ba.
7 Ebaka-ẹkpẹ na e jọ wọhọ enyenya nọ e ruẹrẹ oma kpahe kẹ ẹmo; yọ eware nọ e wọhọ itu-uvie igoru e jọ uzou rai, yọ ovao rai o jọ wọhọ ovao ohwo-akpọ,
8 rekọ eto rai e jọ wọhọ eto aye. Ibiakọ rai e jọ wọhọ ibiakọ okpohrokpo,
9 yọ a whẹ ẹgọ-igbama họ nọ o wọhọ ẹgọ-igbama ayọno. Edo ibekpe rai o wọhọ edo ekẹkẹ nọ enyenya i bi si nọ e be họrọ kpohọ ẹmo.
10 Ofariẹ, a wo iweli nọ a rẹ rọ sa wọhọ ewhọhro-imuomu, yọ iweli rai ogaga nọ a rẹ rọ nwa ahwo na oma evaọ emerae isoi na o rrọ.
11 A wo ovie, ọye họ ukọ-odhiwu nọ o wuzou ọgọdọ odidi na. Evaọ Hibru odẹ riẹ Abadọn,* rekọ evaọ Griki odẹ riẹ Apoliọn.*
12 Uye ọsosuọ o vrẹ no. Rri! Iye ivẹ efa e be tha nọ eware nana e tẹ vrẹ no.
13 Ukọ-odhiwu avọ ezeza o te kporo ọgba riẹ. Me te yo urru jọ nọ u do no izei agbada-idhe igoru nọ ọ rrọ aro Ọghẹnẹ na ze,
14 nọ o ta kẹ ukọ-odhiwu avọ ezeza nọ o kru ọgba na nọ: “Nyae rra ikọ-odhiwu ene nọ a gba fihọ obọ ethẹ Yufretis ologbo na no.”
15 Ọ tẹ rra ikọ-odhiwu ene na no, enọ a ruẹrẹ kpahe kẹ auwa gbe ẹdẹ gbe amara gbe ukpe na re a kpe abọvo abasa ahwo na.
16 Unu egbaẹmo nọ e be dhẹ enyenya na idu ikpe isia idu udhe;* Me yo unu nọ a bu te.
17 Enẹ enyenya na gbe ahwo nọ a keria ehru rai nọ mẹ ruẹ evaọ eruẹaruẹ na a jọ: A whẹ ẹgọ-igbama họ nọ o rrọ wawae je wo ekọlọ iburu gbe ekọlọ isọ-ọre, uzou enyenya na e jọ wọhọ uzou okpohrokpo, yọ erae gbe iwiri gbe isọ-ọre i je no unu rai ze.
18 Iye esa nana, koyehọ erae na, iwiri na gbe isọ-ọre nọ i no unu rai ze na i te kpe abọvo abasa ahwo na.
19 Keme ogaga enyenya na o rrọ unu rai gbe iweli rai, iweli rai e wọhọ araomuomu yọ i wo uzou, enana a rẹ rọ nwa ahwo oma.
20 Rekọ ahwo nọ a kiọkọ nọ iye nana i kpe he a kurẹriẹ no eware nọ a je ru hu, a ruabọhọ ẹgọ idhivẹri gbe emedhọ igoru gbe erọ isiliva, ẹroo, itho gbe ire, enọ e rẹ sae ruẹ ude hayo yo ẹme hayo nya ha.
21 A kurẹriẹ no ahwo-okpe gbe iruẹru-imizi gbe ọfariẹ-ogbe* gbe uji-utho ho.
Eme-Obotọ
^ Otofa riẹ họ, “Ọraha.”
^ Otofa riẹ họ, “Ọnọ Ọ rẹ Raha Ọraha.”
^ Koyehọ, “ima egba ivẹ (200,000,000).”
^ Evaọ Griki, por·neiʹa. Rri oria Otofa Eme.
