Jemis 3:1-18
3 Inievo mẹ, orọnikọ whai kpobi wha rẹ jọ iwuhrẹ hẹ, keme wha riẹ nọ mai nọ ma rrọ iwuhrẹ na ma ti wo ẹdhoguo nọ ọ mae ga.*
2 Keme mai kpobi ma re zoruẹ* ẹsibuobu. Otẹrọnọ ohwo jọ ọ rẹ ta ẹme thọ họ, kiyọ ohwo ọgbagba ọ rrọ, nọ ọ rẹ sae kpọ oma riẹ soso re.
3 Nọ ma tẹ rọ ifi gba unu enyenya re a yoẹme kẹ omai, ma rẹ rọ ere kpọ oma rai soso re.
4 Rri ekọ re: Dede nọ e rrọ ruaro yọ ofou ọgaga ọ rẹ wọ ae dhẹ, umuvi okakao o rẹ kpọ ae kpohọ oria kpobi nọ ohwo nọ ọ rrọ emuokọ na ọ gwọlọ.
5 Ere ọvona ẹrọo na ọ rrọ okwakwa osese ugboma na ghele na o re se ikpeha. A rẹ sae rehọ erae esese gheghe tu erae họ igbrẹwọ soso!
6 Ẹrọo na yọ erae re. Ẹrọo na yọ okwakwa nọ o vọ avọ emuemu evaọ usu ekwakwa ugboma mai na, keme o re gbe oma na soso ku je tu erae họ uzuazọ ohwo soso, yọ Gehena* o re tu erae họ iẹe.
7 Ahwo-akpọ a rẹ sai thuru koghẹrẹ koghẹrẹ erao ẹwọ gbe evra gbe eware nọ e rẹ katiẹ hayo si gbe emama obọ abade e vẹ reria kugbe ahwo, yọ a gine thuru ae reria kugbe ahwo no.
8 Rekọ ohwo-akpọ ọvo ọ sai thuru ẹrọo na reria ha. Ọ rẹ bẹ ẹkpọ jẹ wha enwoma ze, ọ vọ avọ enua nọ i re kpe.
9 Ma rẹ rehọ iẹe jiri Jihova,* Ọsẹ na, ghele na ma rẹ rehọ iẹe la ahwo eka, enọ a ma “tho uwoho Ọghẹnẹ.”
10 Unu ovona ajiri gbe ekela i bi no ze.
Inievo mẹ, u woma ha re eware e jọ enẹ.
11 Emamọ ame* avọ ame ọyayare o re no eyeri-ame ọvona ze he, o rẹ via ere?
12 Inievo mẹ, ure ifigi o rẹ mọ ibi olivi hi, yọ ure otiowo o rẹ mọ ibi ifigi hi, o rẹ via ere? Yọ emamọ ame ọ rẹ sai no ame uwhei ze he.
13 Ono o wo areghẹ gbe otoriẹ evaọ udevie rai? Jọ ọ rehọ emamọ uruemu riẹ dhesẹ via inọ ẹwolẹ nọ areghẹ ọ rẹ wha ze o bi ro ru iruo riẹ.
14 Rekọ otẹrọnọ ihri-eriọ egaga gbe ẹwhọ* e rrọ udu rai, wha gbe seha ha keme wha be rọ ere ta ọrue wọso uzẹme na.
15 Onana yọ areghẹ nọ o no obọ ehru ze he; yọ ọrọ otọakpọ, ọrọ erao, gbe idhivẹri.
16 Keme oria kpobi nọ ihri-eriọ gbe ẹwhọ* e rrọ, ozighi gbe eware iyoma kpobi e rẹ jariẹ re.
17 Rekọ enẹ areghẹ nọ o no obọ ehru ze ọ rẹ jọ, orọ ọsosuọ kpobi, ọ rẹ jọ fuafo, ọ rẹ jẹ rria dhedhẹ kugbe amọfa, o re dhesẹ nọ o wo iroro,* rọ unevaze yoẹme, vọ avọ ohrọ-oriọ gbe ewoma oruo, o wo ọriẹwẹ hẹ, o wo eviẹhọ họ.
18 Ofariẹ, enọ i bi ru udhedhẹ a rẹ kọ ubi nọ o rẹ mọ ẹrẹreokie evaọ uyero udhedhẹ.
Eme-Obotọ
^ Hayo “nọ o mae gbẹdẹ.”
^ Hayo “ru eware thọ.”
^ Rri oria Otofa Eme.
^ Rri oria Otofa Eme.
^ Evaọ Griki, “Ame ọwewere.”
^ Hayo o sae jọ nọ, “iroro oriobọ.”
^ Hayo o sae jọ nọ, “iroro oriobọ.”
^ Hayo “ọ rẹ kpairoro vrẹ oriẹ, ọ vẹ rọwo orọ amọfa, o re si eware kekeke he.”
