Jemis 5:1-20
5 Wha gaviezọ whai edafe, wha viẹ je bo gaga fiki eware iyoma nọ e te via kẹ owhai.
2 Ekwakwa efe rai i gbo no, yọ emera e re iwu rai no.
3 Igoru avọ isiliva rai i mu ekagba no, ekagba na i ti dhesẹ via nọ wha ru thọ, yọ e te re uwo oma rai no. Eware nọ wha kokohọ na e te wọhọ erae evaọ edẹ urere na.
4 Rri! Osa iruiruo nọ i vu idhu rai nọ wha rọwo hwa ha u bi bo via, yọ oviẹ obufihọ enọ i vu na u do te Jihova* nọ o wuzou egbaẹmo na oma no.
5 Uzuazọ akpọriọ gbe omaweromẹ wha bi yeri evaọ otọakpọ na. Wha ru udu rai rrọ poriẹ poriẹ makọ rite ẹdẹ ikpakpe na.
6 Wha brukpe je kpe okiẹrẹe na no. Oyejabọ nọ ọ be rọ wọso owhai.
7 Fikiere inievo, jọ wha wo odiri bọo oke ọzino* Olori na. Rri! Ọwhẹrẹ ọ rẹ hẹrẹ ibi iwoma otọ na, ọ rẹ rọ odiri hẹrẹ bẹsenọ oso ọsosuọ ezi na gbe oso urere ezi na e rẹ rrọ.
8 Whai omarai wha wo odiri re; wha kru udu rai ga keme oke ọzino* Olori na o kẹle no.
9 Inievo, jọ wha go kpahe ohwohwo ho, re a siọ owhai ba ebrukpe. Rri! Obruoziẹ na ọ rrọ unuẹthẹ na no.
10 Inievo, wha lele oriruo eruẹaro na nọ e ruẹ uye je wo odiri, enọ e rọ odẹ Jihova* ta ẹme.
11 Rri! Ma rẹ sae ta nọ enọ i thihakọ a re wo evawere. Wha yo kpahe ithihakọ Job jẹ ruẹ epanọ Jihova* o ru kẹe uwhremu na, onọ u dhesẹ nọ Jihova* ọ rrọ yoyou gaga je wo ohrọ-oriọ.
12 Maero inievo mẹ, wha siọ iyei-iduwo ba, wha rehọ odhiwu hayo otọakpọ hayo oware ofa jọ kpobi ro duwu iyei hi. Rekọ jọ “Ee” rai o jọ Ee, “Ijo” rai o jọ Ijo, re a gbẹ rọ owhai gu ẹdhọ họ.
13 Kọ ohwo jọ ọ rrọ udevie rai nọ o wo ẹbẹbẹ? Jọ ọ ruabọhọ olẹ. Kọ ohwo jọ ọ riẹ nọ eva e be were? Jọ ọ so ile ajiri.
14 Kọ ohwo jọ ọ riẹ nọ ọ be mọ evaọ udevie rai? Jọ o se ekpako ukoko na, re a lẹ kẹe, jẹ rọ ewhri wholo iei evaọ odẹ Jihova.*
15 Olẹ nọ a rọ ẹrọwọ lẹ u ve ti ru ọnọ ọ be mọ* na ga, Jihova* ọ vẹ te kpare iẹe kpama. Ofariẹ, otẹrọnọ ọ raha izi, a te rọvrẹ riẹ.
16 Fikiere wha feva izieraha rai via kẹ ohwohwo jẹ lẹ kẹ ohwohwo, re a sai siwi owhai. Olẹ-ayare ohwo okiẹrẹe u re ru iruo gaga.*
17 Elaeja ọ jọ ohwo wọhọ omai na, ghele na nọ ọ lẹ gaga inọ jọ oso ọ rrọ họ, oso ọ ginẹ rrọ ku otọ na ikpe esa gbe emerae ezeza ha.
18 Kẹsena nọ ọ wariẹ lẹ, oso ọ tẹ rrọ no odhiwu ze, ekakọ otọ na e tẹ mọ ibi.
19 Inievo mẹ, otẹrọnọ a su ohwo jọ nọ ọ rrọ udevie rai thọ no uzẹme na, omọfa jọ o te fiobọhọ kẹe zihe ze,
20 jọ wha riẹ nọ ohwo kpobi nọ o fiobọhọ kẹ ọrahauzi kurẹriẹ no edhere ọthọthọ riẹ o ti siwi ei* no uwhu je ruru izieraha buobu.
Eme-Obotọ
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Rri oria Otofa Eme.
^ Evaọ Griki, “ọnọ oma o rrọ no.”
^ Rri oria Otofa Eme.
^ Evaọ Griki, “wo ẹgba gaga nọ u te bi ru iruo.”
^ Hayo “uzuazọ riẹ.”
