Luk 15:1-32
15 Whaọ, enọ i re mi osa-uzou gbe erahaizi kpobi a je su wariẹ iẹe họ re a yo eme riẹ.
2 Yọ otu Farisi gbe otu ikere-obe na a be go nọ: “Ọzae nana o re dede erahaizi rehọ je lele ae re emu.”
3 Kẹsena ọ tẹ rehọ ọtadhesẹ nana ta ẹme kẹ ae, inọ:
4 “Ọzae vẹ evaọ usu rai o re wo igodẹ udhusoi, nọ ọvo jọ o te vru, ọ gbẹ nyasiọ udhone gbe ikpegbizii na ba udhude he re ọ nyae gwọlọ ọvo nọ o vru na bẹsenọ ọ rẹ ruẹ e riẹ?
5 Nọ ọ tẹ ruẹ e riẹ no ọ vẹ wọe fihọ ikoko riẹ be ghọghọ.
6 Nọ o te te uwou, o ve se egbẹnyusu riẹ gbe ahwo nọ a gbẹ rrọ okegbe koko, be ta kẹ ae nọ: ‘Wha lele omẹ ghọghọ, keme mẹ ruẹ ogodẹ mẹ nọ o vru no.’
7 Mẹ be ta kẹ owhai nọ, ere ọvona, a rẹ jọ obọ odhiwu ghọghọ fiki ọrahauzi ọvo nọ o kurẹriẹ viọ fiki ahwo ikiẹrẹe udhone gbe ikpegbizii nọ i du gwọlọ ekurẹriẹ hẹ.
8 “Hayo kọ aye vẹ o re wo ibiugho edrakma* ikpe, nọ ọvo jọ o te vru, ọ gbẹ rehọ ukpẹ tu je hwere uwou riẹ hẹ, ọ vẹ romatotọ gwọlọ iẹe bẹsenọ ọ rẹ ruẹ e riẹ?
9 Nọ ọ tẹ ruẹ e riẹ no, o re se egbẹnyusu* riẹ gbe enọ a gbẹ rrọ okegbe koko, inọ: ‘Wha lele omẹ ghọghọ, keme mẹ ruẹ ubiugho edrakma* mẹ nọ u vru no.’
10 Mẹ be ta kẹ owhai nọ, ere ọvona re, ikọ-odhiwu Ọghẹnẹ a rẹ ghọghọ fiki ọrahauzi ọvo nọ o kurẹriẹ.”
11 Kẹsena ọ tẹ ta nọ: “Ọzae jọ o wo emezae ivẹ.
12 Ọrọ ọmaha ọ tẹ ta kẹ ọsẹ riẹ nọ, ‘Ọsẹ, rehọ ẹkabọ nọ o te omẹ evaọ eyero ra kẹ omẹ.’ Fikiere ọsẹ na ọ tẹ ghale eyero riẹ kẹ aimava na.
13 Nọ umutho edẹ jọ e vrẹ no, ọmọzae ọmaha na o te koko eware riẹ kpobi họ, o te kpohọ orẹwho ugbothabọ jọ, ọ tẹ jọ obei raha eyero riẹ kufiẹ fiki uzuazọ ofafariẹ* nọ o je yeri.
14 Nọ ọ raha eyero riẹ kpobi no, ohọo ogaga u te mu evaọ orẹwho yena soso, akpọ ọ tẹ jẹ bẹe.
15 Ọ tubẹ nyae rọ oma da ohwo orẹwho yena jọ dede, ọnọ o fi rie họ udhu riẹ re ọ rẹrote isi.
16 Ọ jẹ gwọlọ nọ ọ rẹ re emu nọ isi na e jẹ re, rekọ ohwo ọvo ọ jẹ kẹe he.
17 “Nọ ibiaro riẹ i totọ no, ọ tẹ ta nọ, ‘Ọsẹ mẹ o wo ahwo buobu nọ ọ rehọ iruo nọ e be re eva vọ kiọkọ, yọ ohọo o be jọ etenẹ kpe omẹ whu!
18 Mẹ rẹ kpama mẹ vẹ nya bru ọsẹ mẹ, mẹ vẹ ta kẹe nọ: “Ọsẹ, mẹ thuzi mukpahe odhiwu gbe owhẹ.
19 Me gbe te ọnọ a re se ọmọ ra ha. Rehọ omẹ wọhọ omọvo enọ whọ rehọ iruo.”’
20 Fikiere ọ tẹ kpama, be nya bru ọsẹ riẹ. Nọ ọ gbẹ jọ ugbothabọ, ọsẹ riẹ ọ tẹ kparo ruẹ e riẹ, ohrọ o tẹ riẹe, ọ tẹ dhẹ bru rie jẹ gbalọ iẹe, ọ tẹ nabe viọlọ iẹe.
21 Ọmọ na ọ tẹ ta kẹe nọ, ‘Ọsẹ, mẹ thuzi mukpahe odhiwu gbe owhẹ. Me gbe te ọnọ a re se ọmọ ra ha.’
22 Rekọ ọsẹ na ọ tẹ ta kẹ erigbo riẹ nọ, ‘Ovẹrẹ! wha rehọ ewu ze, ọnọ ọ mai woma, wha ku ei họ iẹe oma, je fi ẹmẹro họ uziobọ riẹ gbe eviẹ họ awọ riẹ.
23 Wha rehọ ọmọ-eruẹ ọpoporiẹ na ze re, wha kpei, re ma re je ru ehaa,
24 keme ọmọ mẹ nana o whu rekọ ọ wariẹ ziọ uzuazọ no; o vru rekọ a ruẹ e riẹ no.’ A te mu akpọ họ ẹre kuoma.
25 “Whaọ, ọmọ ọkpako riẹ ọ jọ obọ udhu, nọ o je kpozi ọ jẹ kẹle uwou no, o te yo edo ile gbe ahwo nọ a bi gbile.
26 O te se omọvo idibo na ọ tẹ nọe oware nọ o be via.
27 Ọ tẹ ta kẹe nọ, ‘Oniọvo ra o zihe ze no, ọsẹ ra o te kpe ọmọ-eruẹ ọpoporiẹ na fikinọ o te uwou oma kọkọ.’
28 Rekọ eva e tẹ dhae ọ gbẹ rọwo ruọ eva ha. Kẹsena ọsẹ riẹ ọ tẹ nya bru rie ze, o te mu ei họ ẹlẹ.
29 Ọ tẹ kpahe kẹ ọsẹ riẹ nọ, ‘Rri! Anwọ ikpe buobu mẹ be rọ gbodibo kẹ owhẹ na yọ mẹ re ghẹmeeyo kẹ owhẹ ẹsiẹvo ho, rekọ whọ re kẹ omẹ ọmọ-ẹwe ẹdẹvo ho inọ mẹ avọ egbẹnyusu mẹ ma rọ reakpọ kuoma.
30 Rekọ nọ ọmọ ra nana nọ ọ raha eyero ra kufiẹ kugbe igberẹ na o zihe ze, who te kpe ọmọ-eruẹ ọpoporiẹ na rọ kẹe.’
31 Ọ tẹ ta kẹe nọ, ‘Ọmọ mẹ, whọ rrọ kugbe omẹ ẹsikpobi, yọ eware kpobi nọ me wo era.
32 Rekọ u fo re ma ru ehaa jẹ ghọghọ, keme oniọvo ra o whu rekọ ọ wariẹ ziọ uzuazọ no; o vru rekọ a ruẹ e riẹ no.’”
Eme-Obotọ
^ Rri oria Otofa Eme.
^ Hayo “eyae nọ e rrọ egbẹnyusu riẹ.”
^ Rri oria Otofa Eme.
^ Hayo “igho eraha kufiẹ; owhọwhọhọ.”
