Luk 16:1-31
16 Kẹsena ọ tẹ jẹ ta kẹ ilele riẹ nọ: “Ọdafe jọ o wo orieyero* ọnọ a ta nọ ọ be raha eware riẹ kufiẹ.
2 Fikiere o te sei ọ tẹ ta nọ, ‘Eme me bi yo kpahe owhẹ na? Rehọ okerefihotọ iruo ra kẹ omẹ, keme who gbe te ọnọ ọ rẹ rẹrote uwou na ha.’
3 Orieyero na ọ tẹ ta kẹ omobọ riẹ nọ, ‘Eme me re ru, nọ olori mẹ o bi si omẹ no iruo orieyero no na? Mẹ goma te epanọ me re ro kporo udhu hu, yọ oma ẹyare o rẹ vuọ omẹ.
4 Ẹhẹẹ! Mẹ riẹ oware nọ me ti ru re nọ a te si omẹ no iruo orieyero na no, ahwo a ve ti dede omẹ rehọ fihọ iwou rai.’
5 O te se enọ e reosa olori riẹ ọvuọvo, ọ tẹ ta kẹ ọrọ ọsosuọ nọ, ‘Ẹvẹ eware nọ whọ reosa olori mẹ i bu te?’
6 Ọ tẹ ta nọ, ‘Ekana ewhri olivi udhusoi.’ Ọ tẹ ta kẹe nọ, ‘Mi omẹ obe agrimeti ra whọ keria re who kere udhuvẹ gbe ikpe fihọ iẹe vẹrẹ vẹrẹ.’
7 Ọ tẹ jẹ ta kẹ ọfa nọ, ‘Kọ whẹ omara, ẹvẹ eware nọ whọ reosa rai i bu te?’ Ọ tẹ ta nọ, ‘Edrọmo eka udhusoi.’ Ọ tẹ ta kẹe nọ, ‘Mi omẹ obe agrimeti ra re who kere udhone fihọ iẹe.’
8 Olori riẹ o jiri orieyero na, dede nọ o kiẹrẹe he, fikinọ o ru oware areghẹ; keme emọ uyero-akpọ* nana a wo areghẹ vi emọ elo na evaọ oghẹrẹ nọ a bi ro yeri kugbe ahwo oge rai.
9 “Ofariẹ, mẹ be ta kẹ owhai nọ: Wha rehọ efe akpọ nana nọ o kiẹrẹe he na ro mu egbẹnyusu kẹ omarai, re nọ itieye i te re no, a ve ti dede owhai rehọ ruọ oria ẹria ebẹdẹ bẹdẹ.
10 Ohwo nọ ọ jọ oware osese dhesẹ nọ a re fievahọ iẹe ọ rẹ jọ ulogbo dhesẹ re nọ a re fievahọ iẹe, yọ ohwo nọ o kiẹrẹe he evaọ oware osese o re kiẹrẹe gbe he evaọ ulogbo.
11 Fikiere, otẹrọnọ wha jọ abọ efe akpọ nana nọ o kiẹrẹe he na dhesẹ nọ a re fievahọ owhai hi, ono ọ te kẹ owhai efe nọ o kiẹrẹe?
12 Yọ otẹrọnọ wha jọ oware omọfa dhesẹ nọ a re fievahọ owhai hi, ono ọ te kẹ owhai oware nọ o rẹ jọ ọrai?
13 Odibo ọvo ọ rẹ sae gbodibo kẹ ilori ivẹ hẹ, o re mukpahe ọjọ o ve you ọdekọ hayo ọ rẹ talamu ọjọ ọ vẹ siọ ọdekọ. Wha sae gbodibo kẹ Ọghẹnẹ gbe Efe he.”
14 Whaọ, otu Farisi enọ i you ugho, a jẹ gaviezọ kẹ eme nana kpobi, a te bi nye inwe họ iẹe.
15 Fikiere, ọ tẹ ta kẹ ae nọ: “Wha rẹ jọ iraro ahwo dhesẹ nọ wha kiẹrẹe, rekọ Ọghẹnẹ ọ riẹ udu rai. Keme oware nọ ahwo a re rri kpekpehru, o rrọ oware otọtọ evaọ aro Ọghẹnẹ.
16 “Rite oke Jọn, Uzi na gbe Eruẹaro na e ta kpahe eware nọ e te via. No oke yena vrẹ, Uvie Ọghẹnẹ họ usi uwoma nọ a bi whowho, yọ oghẹrẹ ahwo kpobi a be daoma re a ruọ eva riẹ.
17 Evaọ uzẹme, o mae lọhọ re odhiwu gbe akpọ e vrẹ viukpọ ẹmẹwẹ ubiẹme ovo evaọ Uzi na nọ u re rugba ha.
18 “Ohwo kpobi nọ ọ siọ aye riẹ ọ jẹ rehọ aye ọfa ọ thọ uzi ẹnwae-obro, yọ ohwo kpobi nọ ọ rehọ aye nọ ọzae riẹ ọ se o bruẹnwae.
19 “Ọdafe jọ ọ jariẹ nọ ọ jẹ hae rọ ehọ eghaghae ogorurẹ gẹgọ, yọ ọ be reakpọ kuoma kẹdẹ kẹdẹ.
20 Rekọ a jẹ hae wọ ọyare-eware jọ nọ a re se Lazarọs, ọnọ ela e vọ oma fihọ unuẹthẹ ighẹ riẹ,
21 yọ ọ jẹ hae gwọlọ nọ ọ rẹ re eware nọ i bi kie no emẹjẹ ọdafe na fihọ otọ. Ẹhẹ, makọ erakọ dede e jẹ nyaze te lalọ ela riẹ.
22 Whaọ, nọ u te oke jọ, ọyare-eware na o te whu, ikọ-odhiwu a tẹ wọe vrẹ kpohọ abotọ* Abraham.
“Ọdafe na o te je whu a te ki ei.
23 Nọ ọ jọ obọ Uki* kpare aro riẹ, avọ uye nọ ọ be ruẹ, ọ tẹ ruẹ Abraham evaọ ugbothabọ avọ Lazarọs nọ ọ rrọ abotọ* riẹ.
24 Fikiere o te bo nọ, ‘Abraham Ọsẹ, jọ ohrọ mẹ o re owhẹ, ta kẹ Lazarọs re o duwu ẹroro uziobọ riẹ họ ame re o su ei fihọ ẹrọo mẹ re oma mẹ u dhẹ, keme mẹ be reoja evaọ ebrerae nana.’
25 Rekọ Abraham ọ tẹ ta nọ, ‘Ọmọ, kareghẹhọ nọ whọ jẹ reawere eware iwoma okenọ whọ jọ akpọ, rekọ Lazarọs ọ ruẹ uye eware iyoma. Rekọ enẹna, ọ be jọ etenẹ wo omosasọ, rekọ whọ be reoja.
26 U te no enana kpobi no, ọgọdọ ologbo ọ rrọ udevie mai avọ owhai, fikiere ahwo nọ a gwọlọ no obonẹ bru owhai ze a sai ru ei hi, yọ ahwo a sai no oborai bru omai ze gbe he.’
27 Ọ tẹ ta nọ, ‘Nọ o rrọ ere na, ọsẹ, mẹ be lẹ owhẹ nọ, vi ei kpobọ uwou ọsẹ mẹ,
28 keme me wo inievo-emezae isoi, re ọ vẹvẹ ae unu ziezi re a siọ oria olahiẹ nana ba ẹnyaze re.’
29 Rekọ Abraham ọ tẹ ta nọ, ‘Mosis avọ Eruẹaro na a rrọ kugbe ae; jọ a gaviezọ kẹ enana.’
30 Ọ tẹ ta nọ, ‘Ijo, Abraham ọsẹ, otẹrọnọ ohwo jọ nọ o whu no ọ tẹ nya bru rai, a ti kurẹriẹ.’
31 Rekọ ọ tẹ ta kẹe nọ, ‘A gbẹ gaviezọ kẹ Mosis gbe Eruẹaro na ha, ohwo jọ nọ o whu no ọ tẹ make kparoma bru rai a ti kurẹriẹ ghele he.’”
Eme-Obotọ
^ Hayo “ọnọ ọ rẹ rẹrote iruẹru uwou.”
^ Rri oria Otofa Eme.
^ Evaọ Griki, “igbama Abraham.”
^ Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
^ Evaọ Griki, “igbama.”
