Luk 17:1-37
17 Kẹsena ọ tẹ ta kẹ ilele riẹ nọ: “Eware nọ e rẹ wha ezoruẹ ze e rẹ nyaze hrọ. Rekọ uye u te ọnọ ọ be wha eware yena ze!
2 O te mai woma kẹe otẹrọnọ a gba utho nọ a re ro wuhu eka fihọ iẹe ohọe a ve gbolo iei fihọ abade viukpenọ o re ru ọjọ evaọ usu esese nana zoruẹ.
3 Wha yọroma. Otẹrọnọ oniọvo ra o ru owhẹ thọ, whọku ei, o te kurẹriẹ, rọvrẹ riẹ.
4 Ọ tẹ maki ru owhẹ thọ isiahrẹ evaọ okpẹdẹ, o je zihe bru owhẹ ze isiahrẹ, be ta nọ, ‘Rọvrẹ omẹ, me ru thọ,’ whọ rẹ rọvrẹ riẹ hrọ.”
5 Ikọ na a tẹ ta kẹ Olori na nọ: “Tua ẹrọwọ mai.”
6 Olori na ọ tẹ ta nọ: “Otẹrọnọ wha te wo ẹrọwọ nọ ọ make kawo wọhọ ubi mọstad, wha te ta kẹ ure ifigi nana nọ, ‘Wolo no etenẹ kpobọ abade na!’ u ti yoẹme kẹ owhai.
7 “Ono evaọ usu rai nọ o wo ọrigbo nọ o bi kporo udhu hayo rẹrote uthuru ọ rẹ ta kẹe okenọ o te no obọ ẹwọ ze inọ, ‘Ziọ etenẹ ovavo whọ keria te re emu’?
8 Ukpoye, ogbẹrọnọ ọ te ta kẹe nọ, ‘Ruẹrẹ oware jọ họ kẹ emu owọwọ mẹ, je ku eprọno họ re whọ gbodibo kẹ omẹ bẹsenọ mẹ rẹ re jẹ da no, kẹsiẹe whọ vẹ tẹ re jẹ da’?
9 O ti yere ọrigbo na ha keme iruo nọ ọ kẹ riẹ o ru na, manikọ o ti ru ere?
10 Ere ọvona re, nọ wha te ru eware kpobi nọ a kẹ owhai nọ wha ru no, wha vẹ ta nọ: ‘Mai yọ erigbo nọ i fioka ha. Onọ u te omai eruo ma ru na.’”
11 Nọ o je kpobọ Jerusalẹm, ọ tẹ jẹ nya udevie Sameria gbe Galili vrẹ.
12 Epanọ ọ jẹ rọ ruọ evaọ iwhre jọ na, ezae ikpe nọ e be mọ oti a tẹ ruẹ e riẹ, rekọ a dikihẹ ugbo.
13 A te bo ta nọ: “Jesu, Owuhrẹ, jọ ohrọ mai o re owhẹ!”
14 Nọ ọ ruẹ e rai ọ tẹ ta kẹ ae nọ: “Wha nyai dhesẹ oma rai kẹ izerẹ na.” Epanọ a jẹ rọ nya na, oti rai o te kpo no.*
15 Nọ omọvo rai jọ ọ ruẹ nọ oti riẹ o kpo no, o te kuomarẹriẹ zihe, be rọ urru oruarua jiri Ọghẹnẹ.
16 O te kigwẹ vovao tuotọ evaọ aro Jesu bi yere iei. Yọ ohwo Sameria ọ rrọ.
17 Jesu ọ tẹ nọe nọ: “Ikpe na a ru fo, o gbẹ rrọ ere? Kọ izii nọ i kiọkọ e rrọ?
18 Kọ omọfa o gbe zihe ze te kẹ Ọghẹnẹ oruaro u te no ọzae nana nọ ọ rrọ ohwo orẹwho ofa na no?”
19 Kẹsena ọ tẹ ta kẹe nọ: “Kpama re who kpo; ẹrọwọ ra o siwi owhẹ no.”
20 Nọ otu Farisi a nọe okenọ Uvie Ọghẹnẹ o te rọ nyaze, ọ kẹ rai uyo nọ: “Orọnikọ Uvie Ọghẹnẹ o be nyaze evaọ oghẹrẹ nọ ahwo kpobi a re ro muẹrohọ iẹe he;
21 hayo kọ ahwo a te ta ha inọ, ‘Rri ọna!’ hayo, ‘Ọ rrọ obei!’ Keme Uvie Ọghẹnẹ o rrọ udevie rai.”
22 Kẹsena ọ tẹ ta kẹ ilele na nọ: “Edẹ e be tha nọ wha te gwọlọ ruẹ ẹdẹ ọvo jọ evaọ edẹ Ọmọ ohwo, rekọ wha te ruẹ e riẹ hẹ.
23 Yọ ahwo a te ta kẹ owhai nọ, ‘Rri, ọ rrọ obei!’ hayo, ‘Ọ rrọ etenẹ!’ Wha lele ai hayo dhẹ lele ai hi.
24 Keme wọhọ epanọ elo egbrara o re lo no abọjọ akpọ na ruọ abọ ọfa akpọ na, ere Ọmọ ohwo ọ te jọ evaọ ẹdẹ riẹ.
25 Rekọ, o gba riẹ họ inọ ọ rẹ kake ruẹ uye eware buobu tao, oge nana ọ vẹ jẹ se iẹe.
26 Ofariẹ, wọhọ epanọ o jọ evaọ edẹ Noa, ere o te jọ evaọ edẹ Ọmọ ohwo:
27 a jẹ re, a jẹ da, ezae e jẹ rọo, yọ a jẹ rọ eyae kpohọ orọo bọo ẹdẹ nọ Noa ọ rọ ruọ okọ na, Owhe na ọ tẹ ze o te kpe ai kpobi no.
28 Ere ọvona re, o te wọhọ epanọ o via evaọ edẹ Lọt: a jẹ re, a jẹ da, a jẹ dẹ, a jẹ zẹ, a jẹ kọ, a jẹ bọ.
29 Rekọ ẹdẹ nọ Lọt o ro no Sọdọm, erae gbe isọ-ọre* i te no obọ odhiwu ze i te kpe ai kpobi no.
30 Ere ọvona o te jọ evaọ ẹdẹ yena nọ Ọmọ ohwo ọ te romavia.
31 “Evaọ ẹdẹ yena, jọ ohwo nọ ọ rrọ ehru uwou* rekọ nọ eyero riẹ e rrọ evaọ uwou na, ọ ziọ otọ te kwa ae he, ere ọvona re, ohwo nọ ọ rrọ obọ ẹwọ o re zihe bru eware nọ ọ nya seba vievie he.
32 Wha kareghẹhọ aye Lọt.
33 Ohwo kpobi nọ ọ be gwọlọ siwi uzuazọ riẹ, uzuazọ riẹ u ti vru, rekọ ohwo kpobi nọ uzuazọ riẹ u vru ọ te wariẹ woi.
34 Mẹ be ta kẹ owhai nọ, evaọ aso yena, imava a te jọ ehwa ọvo; a rẹ te rehọ ọvo vrẹ a vẹ nyasiọ ọdekọ ba.
35 Eyae ivẹ e rẹ te jọ oria ọvona bi wuhu eka; a rẹ te rehọ ọvo vrẹ a vẹ nyasiọ ọdekọ ba.”
36 ——
37 Fikiere a tẹ kpahe kẹe nọ: “Olori, kpohọ ibovẹ?” Ọ tẹ ta kẹ ae nọ: “Oria nọ ori ọ rrọ, etẹe igo i re kokohọ re.”
Eme-Obotọ
^ Hayo “a te ru ae fo.”
^ Isọ-ọre yọ oghẹrẹ ewẹ-itho jọ nọ e rẹ rrorro.
^ A jẹ hae bọ ehru iwou buobu praprarapra, yọ a jẹ hae jarai ru eware sa-sa.
